JIDU VIS MOOT JAMOASI XALQARO TIJORAT ARBITRAJI BO‘YICHA XALQARO TANLOVDA MUVAFFAQIYATLI ISHTIROK ETDI

Joriy yilning 1-4 oktabr kunlari Jahon iqtisodiyoti va diplomatiya universiteti jamoasi Markaziy Osiyo nizolarni hal qilish assotsiatsiyasi (CADRA) va AQSH Savdo vazirligining Tijorat huquqini rivojlantirish dasturi (CLDP) hamkorligida tashkil etilgan yillik "Annual Central Asia Dispute Resolution Association Kick-Off Pre-Moot" tanlovida ishtirok etdi.

Tanlovda Markaziy va Janubiy Osiyo, Kavkaz mintaqasi va Afrika universitetlari jamoalari ishtirok etdi. Bunday xalqaro musobaqalarda ishtirok etish talabalarga og‘zaki eshituvlarni olib borish, huquqiy pozitsiyani asoslash va xalqaro tijorat arbitraji normalarini amaliyotda qo‘llash ko‘nikmalarini takomillashtirish, shuningdek, xorijiy universitetlar vakillari bilan tajriba almashish imkoniyatini beradi.

Tanlov yakuniga ko‘ra, JIDU jamoasi finalga chiqdi va birinchi vitse-chempion (First Runner-Up) unvonini qo‘lga kiritdi.

Bundan tashqari, jamoa a’zosi, JIDU "Xalqaro huquq" fakulteti 4-bosqich talabasi Kamronbek Shermetov "Javobgar tomonidan eng yaxshi notiq" (Best Oralist for Respondent) nominatsiyasida g‘olib bo‘ldi.

JIDU jamoasiga rahbarlik va tayyorgarlikni Fuqarolik huquqi va xalqaro xususiy huquq fanlari kafedrasi vakillari kafedra mudiri Sherzodbek Masadikov, professor Dilfuza Imamova va o‘qituvchi Alisher Bobonazarov ta’minlamoqda. Jamoa tayyorgarligiga JIDU bitiruvchilari Bahodir Dadayev va Kamola Usmonova ham jalb etilgan bo‘lib, ular avval universitet jamoasi tarkibida "Vis Moot" musobaqasida ishtirok etishgan.

JIDU jamoasining ushbu tadbirdagi ishtiroki va jamoaning muvaffaqiyatli chiqishi 4-maqsad "Sifatli ta’lim," xususan, kelajakdagi mehnat faoliyati uchun talab qilinadigan kasbiy ko‘nikma va malakalarni rivojlantirishga qaratilgan 4.4-vazifani amalga oshirishga yordam beradi. Tanlovga tayyorgarlik ko‘rish va arbitraj eshituvlarida ishtirok etish tahliliy fikrlashni, yuridik yozish ko‘nikmalarini, og‘zaki dalillarni va xalqaro tijorat huquqini amalda qo‘llashni rivojlantirishga yordam beradi.

Bundan tashqari, xalqaro tanlovda ishtirok etish "Tinchlik, odil sudlov va samarali institutlar" 16-maqsadini, eng avvalo, qonun ustuvorligiga ko‘maklashish va odil sudlovdan teng foydalanishni ta’minlashni nazarda tutuvchi 16.3-vazifani amalga oshirishga ko‘maklashadi. Xalqaro tijorat arbitraji mexanizmlarini o‘rganish va transchegaraviy tijorat nizolarini hal qilish ko‘nikmalarini rivojlantirish nizolarni samarali hal qilish uchun huquqiy vositalarni qo‘llay oladigan malakali huquqshunoslarni tayyorlashga xizmat qiladi.

Tadbir, shuningdek, xalqaro hamkorlikni mustahkamlashga qaratilgan "Barqaror rivojlanish yo‘lidagi hamkorlik" 17-maqsadiga mos keladi. Tanlovda ishtirok etish akademik aloqalarni kengaytirish, kasbiy tajriba almashish, yuridik ta’lim va nizolarni hal qilish sohasida universitetlar va xalqaro tashkilotlar o‘rtasidagi hamkorlikni rivojlantirishga xizmat qiladi.

Erishilgan natija JIDUda xalqaro standartlarga muvofiq mutaxassislar tayyorlashning yuqori darajasini tasdiqlaydi va universitetning xalqaro akademik nufuzini yanada mustahkamlashga xizmat qiladi.