Test Title

Test Title

    JIDU talabalari O‘zbekistonning xorijiy davlatlardagi diplomatik vakolatxonalarida amaliyot o‘tamoqdalar

    JIDU talabalari O‘zbekistonning xorijiy davlatlardagi diplomatik vakolatxonalarida amaliyot o‘tamoqdalar

    Jahon iqtisodiyoti va diplomatiya universiteti talabalari Xamrakulov Jasurbek va G‘anixo‘jayev Asrorxo‘ja O‘zbekiston Respublikasining Belgiya Qirolligidagi Elchixonasida amaliyot o‘tamoqda. Amaliyot davomida talabalar O‘zbekiston va Yevropa Ittifoqi o‘rtasidagi siyosiy, iqtisodiy va gumanitar hamkorlik, shuningdek, Yevropa Ittifoqining institutsional tuzilmasi, faoliyat yo‘nalishlari va qaror qabul qilish mexanizmlari bilan yaqindan tanishish imkoniga ega bo‘lmoqdalar. Jumladan, talabalar Yevropa Parlamentiga tashrif buyurib, uning tuzilishi, vakolatlari va faoliyatining asosiy yo‘nalishlari bilan batafsil tanishdilar. Tashrif davomida Yevropa Parlamentining Yevropa Ittifoqi institutsional tizimidagi o‘rni, Yevropa fuqarolarining manfaatlarini ifodalashdagi roli, qonunchilik jarayonidagi ishtiroki hamda Yevropa Ittifoqining boshqa institutlari bilan o‘zaro hamkorligi haqida ma’lumotlarga ega bo‘ldilar. Shuningdek, talabalar Yevropa Parlamenti deputatlarining faoliyati, siyosiy guruhlarning parlament ishini tashkil etishdagi o‘rni, parlament qo‘mitalari va fraksiyalarining vazifalari, qonunchilik tashabbuslarini ko‘rib chiqish hamda Yevropa Ittifoqi darajasida siyosiy qarorlarni shakllantirish jarayonlari bilan tanishdilar. Tashrif davomida Yevropa Ittifoqining tashqi siyosati va xalqaro hamkorlik mexanizmlari, xususan, Yevropa Parlamentining tashqi aloqalardagi o‘rni ham o‘rganildi. Alohida e’tibor O‘zbekiston va Yevropa Ittifoqi o‘rtasidagi munosabatlarning rivojlanishi, siyosiy muloqot, savdo-iqtisodiy hamkorlik, investitsiyalar, ta’lim va ilmiy almashinuv, transport va logistika, shuningdek, Markaziy Osiyo bilan mintaqaviy hamkorlik kabi yo‘nalishlarga qaratildi. Mazkur tashrif talabalar uchun Yevropa Ittifoqi institutlarining faoliyatini bevosita o‘rganish, xalqaro munosabatlar va diplomatik jarayonlarga oid nazariy bilimlarini amaliy kuzatuvlar bilan boyitish hamda O‘zbekiston–Yevropa Ittifoqi munosabatlarining bugungi holati va istiqbollarini yanada chuqurroq anglashda muhim tajriba bo‘ldi.

    JIDU o‘qituvchilari 275-maktab o‘quvchilari uchun “Mustaqillik darslari”ni o‘tkazdilar

    JIDU o‘qituvchilari 275-maktab o‘quvchilari uchun “Mustaqillik darslari”ni o‘tkazdilar

    Jahon iqtisodiyoti va diplomatiya universiteti “Siyosatshunoslik” kafedrasi o‘qituvchilari N. Aminova hamda M. Abduraxmanova Toshkent shahar Mirzo Ulug'bek tumanidagi 275-umumta'lim maktabida o‘quvchilar ishtirokida “Yagona vatan, yagona xalq bo‘lib, yangi hayot va kelajak yarataylik!” shiori ostida “Mustaqillik darslari” mavzusida ma'naviy-ma‘rifiy tadbir o‘tkazdilar. Tadbir O‘zbekiston Respublikasi davlat mustaqilligining 35 yilligi keng nishonlanayotgan bir paytda, yosh avlod qalbida vatanparvarlik, milliy o‘zlikni anglash, yurt taqdiriga daxldorlik va fuqarolik mas'uliyati tuyg'ularini yuksaltirish, shuningdek, ta‘lim muassasalarida olib borilayotgan ma'naviy-ma'rifiy ishlar samaradorligini oshirish maqsadida tashkil etildi. Ochiq dars davomida o‘qituvchilar o‘quvchilarga milliy davlatchiligimiz tarixi, mustaqillikka erishish yo‘lidagi tarixiy jarayonlar hamda istiqlolning xalqimiz hayotidagi bebaho ahamiyati haqida atroflicha ma'lumot berdilar. Mustaqillik yillarida mamlakatimizda amalga oshirilgan keng ko‘lamli islohotlar, iqtisodiyot, ta'lim, fan va ijtimoiy sohalardagi salmoqli yutuqlar aniq misollar asosida yoritildi. Tadbirning interaktiv qismida o‘quvchilar bilan savol-javob va erkin fikr almashish tashkil etilib, yoshlar davlat boshqaruvi, xalqaro munosabatlar va yurtimizning kelajagi bilan bog'liq savollariga asosli javoblar oldilar. O‘quvchilarning faolligi va mavzuga bo‘lgan qiziqishi tadbirning samarali o‘tishini ta'minladi.

    Ta’limdan xalqaro tajribagacha: JIDU Xalqaro huquq fakulteti talabalarining yangi yutuqlari

    Ta’limdan xalqaro tajribagacha: JIDU Xalqaro huquq fakulteti talabalarining yangi yutuqlari

    Jahon iqtisodiyoti va diplomatiya universiteti Xalqaro huquq fakulteti talabalari 2026-yilda xalqaro ta’lim dasturlari, yozgi maktablar, xalqaro konferensiyalar, amaliyot va ilmiy loyihalarda faol ishtirok etib, akademik hamda kasbiy salohiyatlarini rivojlantirmoqdalar. Amerkulova Munisaxon Odilovna — Xitoyning Chengdu shahridagi Janubiy-g‘arbiy moliya va iqtisodiyot universiteti “SWUFE” tomonidan tashkil etilgan “SWUFE RIEM Global Academy” yozgi maktabida 13–23-iyul kunlari ishtirok etdi. Dastur doirasida zamonaviy iqtisodiyot, global boshqaruv va xalqaro munosabatlar bo‘yicha bilimlarini boyitdi. Joriy yilning 7-iyul kuni 2-kurs talabalari “Islom sivilizatsiyasi: tinchlik, bag‘rikenglik va ilm-ma’rifat yo‘li” mavzusidagi I Xalqaro islom sivilizatsiyasi forumida volontyor-tarjimon sifatida qatnashdilar. Volontyorlar orasida tashakkurnoma va Prezident nomidan esdalik sovg‘alari bilan taqdirlangan talabalar ham bor. Talabalarimiz xalqaro maydondagi faolligi bilan bir qatorda, ilmiy izlanishlarda ham o‘z so‘zini aytib, nufuzli nashrlarda maqolalarini chop ettirmoqda. Xalqaro huquq fakulteti 2-bosqich talabasi Madatov Saloxiddinning “Axborotlashgan jamiyatda fuqarolarning axborot xavfsizligini ta’minlash masalalari” mavzusidagi ilmiy maqolasi Naubaxar Uzakbaeva ilmiy rahbarligida “Huquq va Burch” jurnalida chop etildi. Yana bitta iste’dodli talabamiz Lola Jahongirova 28-iyun – 3-iyul kunlari Budapesht shahrida Ludovika University of Public Service mezbonligida tashkil etilgan “V4 Diplomatic Academy” xalqaro yozgi dasturida ishtirok etdi. Dasturda diplomatiya, xalqaro munosabatlar, mintaqaviy hamkorlik va zamonaviy geosiyosiy jarayonlar muhokama qilindi. Davronov Muhammadaziz 29-iyul – 9-avgust kunlari Ruminiyaning Timishoara shahrida o‘tkazilgan “ISWinT 2026” xalqaro talabalar dasturida qatnashib, xalqaro tajriba va madaniyatlararo muloqot ko‘nikmalarini rivojlantirdi. Bobosharipov Shahboz va Nutfullayev Mirfayz 4–6-sentabr kunlari Samarqandda o‘tkazilgan “RCOY Central Asia 2026” konferensiyasida ishtirok etib, iqlim o‘zgarishi, suv xavfsizligi, iqlim adolati va barqaror rivojlanish masalalarini muhokama qildilar. Hamroyev Avazbek Otabekovich, Abdujabborova Sarvinoz Umidjon qizi, Kojalepesova Dilfuza Bayronbay qizi va Abdug‘afforova Gulira’no Zuhriddin qizi Xitoyning Lanzhou (Lanjou) shahrida tashkil etilgan xitoy tili bo‘yicha yozgi maktabda ishtirok etdilar. Dastur ularga xitoy tilini amaliy muhitda rivojlantirish va Xitoy madaniyati bilan yaqindan tanishish imkonini berdi. Abdullayeva Dilafruz, Abdunazarova Jasmina va Muhammadjonov Hojiakbar 3–7-avgust kunlari Bishkek shahrida tashkil etilgan “Markaziy Osiyo Jessup yozgi maktabi”da qatnashdilar. Dastur davomida xalqaro ommaviy huquq, huquqiy tahlil, notiqlik va Jessup sud musobaqasiga tayyorgarlik bo‘yicha ko‘nikmalarini rivojlantirdilar. Shuningdek, 3-bosqich talabalari Abduvahobova Rayxona — Bulung‘ur tuman sudi, Sulaymonova Gulinura — Qashqadaryo viloyati Koson tuman prokuraturasi hamda Yunusov Oxunbobo — AT Xalq Banki Kogon BXMda malakaviy amaliyot o‘tamoqdalar. Xalqaro huquq fakultetining 4-bosqich talabalari Shaxruz Tolibov va Sevara Qodirova Istanbul shahrida tashkil etilgan “OSCE Central Asia and Türkiye Youth Talks 2026” xalqaro dasturida ishtirok etdilar. Mingdan ortiq arizalar orasidan Markaziy Osiyo va Turkiyadan 20 nafar yosh saralangan dasturda sun’iy intellekt va xavfsizlik, yoshlarning qarorlar qabul qilishdagi ishtiroki, tadbirkorlik va mintaqaviy hamkorlik masalalari muhokama qilindi. Dastur yakunida “Yoshlar deklaratsiyasi” qabul qilindi. Talabalarimiz nazariy bilimlar bilan cheklanmay, ularni amaliyotda ham muvaffaqiyatli qo‘llamoqda. Jumladan, xalqaro huquq fakulteti talabasi Mirjahon Fayzullayev 8-avgust – 8-sentabr kunlari O‘zbekiston Respublikasining Ozarbayjon Respublikasidagi Elchixonasida malakaviy amaliyot o‘tadi. Amaliyot davomida u diplomatik hujjatlar, tahliliy materiallar, konsullik masalalari, O‘zbekiston–Ozarbayjon munosabatlari va iqtisodiy diplomatiya yo‘nalishlarida faoliyat olib bordi. Shuningdek, Ozarbayjon Prezidentining 23–24-avgust kunlari O‘zbekistonga davlat tashrifini tayyorlash va tashkil etish jarayonida ishtirok etdi. Amaliyot yakunida uning faoliyati a’lo darajada baholanib, O‘zbekistonning Ozarbayjondagi Favqulodda va Muxtor Elchisi B.Ashrafxonov tomonidan tashakkurnoma bilan taqdirlandi. Talabalarning 2026-yildagi xalqaro dasturlar, amaliyotlar, ilmiy loyihalar va konferensiyalardagi ishtiroki ularning nazariy bilimlarini amaliy tajriba bilan uyg‘unlashtirish, xorijiy tillar va professional ko‘nikmalarini rivojlantirish hamda xalqaro muhitda faoliyat yuritishga tayyorlanishiga xizmat qilmoqda. JIDU Xalqaro huquq fakulteti — bilim, amaliyot va xalqaro tajriba uyg‘unlashadigan makon.

    159Xalqaro huquq
    JIDU talabalar turar joyida 1-bosqich talabalari bilan ijtimoiy-psixologik adaptatsion uchrashuvlar muntazam tashkil etilmoqda

    JIDU talabalar turar joyida 1-bosqich talabalari bilan ijtimoiy-psixologik adaptatsion uchrashuvlar muntazam tashkil etilmoqda

    Jahon iqtisodiyoti va diplomatiya universitetining talabalar turar joyida 2026/2027-o‘quv yilida 1-bosqichga qabul qilingan talabalarining yangi muhitga moslashuvini qo‘llab-quvvatlash maqsadida muntazam ijtimoiy-psixologik adaptatsion uchrashuvlar, davra suhbatlari va seminarlar tashkil etilmoqda. Mazkur uchrashuvlar universitet psixologi N. Norova, Yoshlar ittifoqi hamda UWED Force jamoatchilik guruhi hamkorligida tashkil etilib, talabalar turar joyida yangi jamoaga moslashish, tengdoshlar bilan samarali muloqot o‘rnatish, o‘zaro hurmat va hamkorlikka asoslangan ijobiy ijtimoiy-psixologik muhitni shakllantirishga qaratilgan. Talabalar turar joyida tashkil etilayotgan adaptatsion uchrashuvlarda 1-bosqich talabalarining yangi ijtimoiy muhitga, jamoaga va talabalar turar joyidagi kundalik hayotga moslashuvi bilan bog‘liq masalalarga alohida e’tibor qaratilmoqda. Universitet psixologi N. Norova o‘z nutqida yangi muhitga moslashish talabaning yangi o‘quv sharoitlariga, turli dunyoqarash va hayotiy tajribaga ega insonlar bilan muloqotga ko‘nikishini talab etishini ta’kidladi. Shuningdek, talabalar turar joyida o‘zaro hurmat, shaxsiy chegaralarni anglash, umumiy qoidalarga rioya qilish va jamoaviy mas’uliyat muhim ahamiyatga ega ekanini qayd etdi. Uchrashuvlarda yangi jamoaga kirishish, tengdoshlar bilan ijobiy munosabatlar o‘rnatish, turli fikr va qarashlarga hurmat bilan yondashish hamda kundalik vaziyatlarga konstruktiv munosabat bildirish masalalari muhokama qilinmoqda. Shuningdek, talabalarning akademik muhitga moslashuvi, o‘quv motivatsiyasi, darslardagi faolligi va mustaqil ta’lim olish ko‘nikmalarini rivojlantirish masalalari ham ijtimoiy-psixologik yondashuv asosida yoritilmoqda. Uchrashuv va seminarlar davomida faol tinglash, fikrni aniq va hurmat bilan ifodalash, suhbatdoshning nuqtayi nazarini tushunish hamda kelishmovchiliklarni konstruktiv yo‘l bilan hal etish ko‘nikmalarini rivojlantirishga e’tibor qaratilmoqda. Shu bilan birga, yangi muhitga moslashish davrida hissiyotlarni anglash va boshqarish, stressli vaziyatlarga moslashish, psixologik barqarorlikni mustahkamlash hamda zarur hollarda psixologik yordamdan foydalanish bo‘yicha tavsiyalar berilmoqda. Talabalarga universitet psixologi bilan maxfiylik, ixtiyoriylik, hurmat va xolislik tamoyillari asosida murojaat qilish imkoniyatlari haqida ham ma’lumot berilmoqda. Talabalar turar joyida muntazam tashkil etilayotgan uchrashuvlar ochiq muloqot va interaktiv yondashuv asosida o‘tkazilib, 1-bosqich talabalari o‘zlarini qiziqtirgan masalalar yuzasidan savol, fikr va takliflari bilan faol ishtirok etmoqda. Muloqotlar davomida talabalar turar joyidagi kundalik hayot, tengdoshlar bilan munosabatlar, yangi muhitga ko‘nikish, o‘zaro hamkorlik, psixologik barqarorlik va akademik faollik bilan bog‘liq masalalar muhokama qilinmoqda. Bunday uchrashuvlar talabalarning mustaqil fikrlashi, kommunikativ ko‘nikmalari, ijtimoiy faolligi va jamoaviy hamkorligini rivojlantirish bilan birga, ularning talabalar turar joyida o‘zini erkin va qulay his etishiga ko‘maklashmoqda. JIDU talabalar turar joyida 1-bosqich talabalari bilan muntazam tashkil etilayotgan ijtimoiy-psixologik adaptatsion uchrashuv va seminarlar talabalarning yangi muhitga samarali moslashuvini qo‘llab-quvvatlash, ular o‘rtasida sog‘lom munosabatlarni shakllantirish hamda universitet hayotiga faol jalb etishga qaratilgan tizimli ishlarning muhim yo‘nalishlaridan biridir. Ushbu uchrashuv va seminarlar davom etmoqda hamda talabalarning yangi muhitga moslashuvi, ijtimoiy va akademik faolligini qo‘llab-quvvatlash, talabalar turar joyida o‘zaro hurmat, ishonch, bag‘rikenglik va hamkorlikka asoslangan ijobiy ijtimoiy-psixologik muhitni mustahkamlashga xizmat qilmoqda.

    Talabalikning ilk kuni muborak!

    Talabalikning ilk kuni muborak!

    Joriy yilning 7-sentabr kuni Jahon iqtisodiyoti va diplomatiya universiteti Xalqaro huquq fakultetining 1-bosqich talabalari universitetdagi ilk saboqlarini boshladilar. Shu munosabat bilan tashkil etilgan tadbir davomida talabalar universitet muhiti, ta’lim jarayoni hamda ichki tartib-qoidalar bilan yaqindan tanishtirildi. Tadbirda Xalqaro huquq fakulteti dekani Serikbek Muratayev shuningdek, profilaktika inspektori, universitet psixologi hamda yoshlar masalalari bo‘yicha mas’ul xodimlar so‘zga chiqib, talabalarni yangi bosqich bilan samimiy tabriklab, universitetning qadriyatlari va ta’lim muhiti, o‘quv jarayonining tashkil etilishi;ichki tartib-intizom qoidalari, talabalarning huquq va majburiyatlari, xavfsizlik, psixologik qo‘llab-quvvatlash hamda yoshlar uchun yaratilgan imkoniyatlar haqida batafsil ma’lumot berildi. Mazkur uchrashuv talabalar uchun nafaqat universitet hayotiga ilk qadam, balki kelgusidagi professional faoliyatiga mustahkam poydevor bo'ladigan muhim yo‘l-yo‘riq vazifasini o‘tadi.

    139Xalqaro huquq
    JIDU professori Harbiy xavfsizlik va mudofaa universitetida mustaqillik darsi o‘tkazdi

    JIDU professori Harbiy xavfsizlik va mudofaa universitetida mustaqillik darsi o‘tkazdi

    O‘quv yilining ilk kunlarida yurtimizdagi barcha ta’lim muassasalarida “Mustaqillik darslari”ni o‘tkazish yaxshi an’anaga aylangan. Mazkur darslar yosh avlod qalbida Vatanga muhabbat va sadoqat tuyg‘ularini yanada mustahkamlash, milliy istiqlolimizning tarixiy ahamiyati va bugungi taraqqiyotimizdagi beqiyos o‘rnini chuqur anglashga xizmat qiladi. Shu munosabat bilan, O‘zbekiston Respublikasi Harbiy xavfsizlik va mudofaa universitetida “Mustaqillik – tarixiy orzu va buyuk ne’mat” shiori ostida “Mustaqillik darsi” tashkil etildi. Unda Jahon iqtisodiyoti va diplomatiya universiteti professori, siyosiy fanlar doktori Qodir Jo‘rayev ishtirok etib, kursantlarga “Yangi O‘zbekiston dunyo xaritasida: islohotlar, imkoniyatlar va istiqbollar” mavzusida ma’ruza qildi. Ma’ruzada O‘zbekistonning mustaqillik yillarida jahon hamjamiyatida munosib o‘rin egallab borayotgani, mamlakatimizning xalqaro munosabatlar tizimiga tobora chuqur integratsiyalashayotgani, milliy manfaatlarga asoslangan proaktiv, ochiq, pragmatik va tinchliksevar tashqi siyosat izchil amalga oshirilayotgani haqida atroflicha ma’lumot berildi. Shuningdek, O‘zbekistonning Markaziy Osiyoda tinchlik, barqarorlik va yaxshi qo‘shnichilik muhitini mustahkamlash, mintaqaviy hamkorlikni yangi bosqichga olib chiqish borasidagi tashabbuslari, diversifikatsiyalashgan tashqi savdo-iqtisodiy aloqalari va samarali iqtisodiy diplomatiyasiga ham alohida to‘xtalib o‘tildi. Dars davomida mamlakatimiz tashqi siyosati sohasida erishilayotgan yutuqlar bilan bir qatorda, Markaziy Osiyoda mintaqaviy hamkorlikni yanada chuqurlashtirish, transport va logistika yo‘laklarini diversifikatsiya qilish, raqamli diplomatiya imkoniyatlaridan keng foydalanish, madaniy diplomatiya va “yumshoq kuch” salohiyatini samarali ishga solish, shuningdek, ekologik va suv diplomatiyasini rivojlantirish kabi dolzarb vazifalar yuzasidan ham fikr almashildi. Ma’ruzachi O‘zbekistonning bugungi tashqi siyosati faqat diplomatik munosabatlarni rivojlantirish bilan cheklanib qolmayotgani, balki mamlakatning xavfsizligi, iqtisodiy taraqqiyoti, xalqaro nufuzi va milliy manfaatlarini ta’minlashning muhim omiliga aylanayotganini ta’kidladi. Kursantlar O‘zbekistonning tinchliksevar tashqi siyosati, global va mintaqaviy tashabbuslari, mamlakatimizning xalqaro maydondagi o‘rni va nufuzi haqida yangi ma’lumotlarga ega bo‘ldilar. Ma’ruza ularda mustaqillikning naqadar ulkan tarixiy ne’mat ekani, uni asrash va mustahkamlash har bir avlodning muqaddas burchi ekanini yana bir bor anglashga xizmat qildi. Tadbir yakunida Vatan ravnaqi, uning tinchligi va xavfsizligini ta’minlash, mamlakat taraqqiyotiga munosib hissa qo‘shish har bir fuqaroning, ayniqsa, Vatan himoyachisi bo‘lishdek sharafli kasbga tayyorlanayotgan yoshlarning eng muhim vazifalaridan biri ekani alohida ta’kidlandi.

    Xalqaro huquq fakultetida yangi o‘quv yilining ilk ilmiy-metodologik seminari o‘tkazildi

    Xalqaro huquq fakultetida yangi o‘quv yilining ilk ilmiy-metodologik seminari o‘tkazildi

    Jahon iqtisodiyoti va diplomatiya universiteti Xalqaro huquq fakultetida 2026/2027-o‘quv yilining ilk ilmiy-metodologik seminari muvaffaqiyatli o‘tkazildi. Seminar davomida Xalqaro huquq fakulteti dekani, yuridik fanlari nomzodi, dotsent Serikbek Muratayev “Tabiiy va pozitiv huquq nazariyalarining nisbati” mavzusida ilmiy ma’ruza qildi. Ma’ruzada tabiiy va pozitiv huquq nazariyalarining o‘zaro bog‘liqligi, ularning zamonaviy huquqiy tafakkurdagi o‘rni hamda amaliy ahamiyati ilmiy-metodologik yondashuv asosida tahlil qilindi. Shuningdek, Davlat va huquq nazariyasi, Davlat va huquq tarixi, Konstitutsiyaviy huquq hamda Ma’muriy huquq fanlariga oid dolzarb ilmiy qarashlar va nazariy xulosalar professor-o‘qituvchilar ishtirokida muhokama qilindi. Seminar yakunida ishtirokchilar mavzu yuzasidan fikr almashib, ilmiy-metodologik yondashuvlarni yanada takomillashtirishga qaratilgan taklif va mulohazalarini bildirdilar.

    279Xalqaro huquq
    Qayta o'qishi va akademik qarzdorlik tartibi qanday tashkil etilgan?

    Qayta o'qishi va akademik qarzdorlik tartibi qanday tashkil etilgan?

    Ijtimoiy tarmoqlarda universitetda baholash tizimi va akademik qarzdorlikni bartaraf etish tartibi yuzasidan tarqalgan murojaat yuzasidan quyidagilar maʼlum qilinadi. Universitetda taʼlim jarayoni, jumladan, qayta o'qish tizimi, baholash mezonlari hamda akademik qarzdorlikni bartaraf etish tartibi amaldagi normativ-huquqiy hujjatlar va universitetning Akademik nizomiasosida tashkil etiladi. Baholash jarayoni talabalarning bilim, koʻnikma va kompetensiyalarini xolis baholash tamoyillariga asoslanadi. Barcha talabalar uchun baholash mezonlari va qayta topshirish tartiblari oʻquv jarayoni boshida eʼlon qilinib, ularga bir xil tartibda qoʻllaniladi. Shu bilan birga, universitet taʼlim jarayonini takomillashtirish, talabalar uchun yanada qulay va samarali akademik muhitni shakllantirish maqsadida ularning taklif va mulohazalarini muntazam oʻrganib boradi. Ijtimoiy tarmoqlarda bildirilgan fikrlar ham belgilangan tartibda koʻrib chiqilib, amaldagi tartiblarni yanada takomillashtirish imkoniyatlari yuzasidan tahlil qilinadi. Universitet taʼlim sifati, akademik halollik va baholashning shaffofligini taʼminlashni oʻz faoliyatining ustuvor yoʻnalishlaridan biri sifatida davom ettiradi.

    JIDU huzuridagi Yuridik klinika tomonidan ko‘zi ojiz bolalar uchun ixtisoslashtirilgan maktabda huquqiy targ‘ibot tadbiri tashkil etildi

    JIDU huzuridagi Yuridik klinika tomonidan ko‘zi ojiz bolalar uchun ixtisoslashtirilgan maktabda huquqiy targ‘ibot tadbiri tashkil etildi

    2026-yil 12-iyun kuni Jahon iqtisodiyoti va diplomatiya universiteti huzuridagi Yuridik klinika hamda “Qaldirg‘och” Street Law loyihasi ishtirokchilari tomonidan Toshkent shahridagi 77-sonli ko‘zi ojiz bolalar uchun ixtisoslashtirilgan maktabda huquqiy targ‘ibot tadbiri tashkil etildi. Tadbirning asosiy maqsadi o‘quvchilarning huquqiy ongi va huquqiy madaniyatini yuksaltirish, ularni o‘z huquq va majburiyatlari to‘g‘risida xabardor qilish hamda huquqiy bilimlarini mustahkamlashdan iborat bo‘ldi. Tadbir interaktiv suhbat va savol-javoblar shaklida o‘tkazilib, o‘quvchilar o‘zlarini qiziqtirgan savollarga javob oldilar. Kelgusida ham Yuridik klinika va “Qaldirg‘och” Street Law loyihasi doirasida aholi, ayniqsa yoshlar o‘rtasida huquqiy targ‘ibot va huquqiy ta’limga qaratilgan tadbirlarni davom ettirish rejalashtirilgan.

    JIDU talabasining xalqaro moliyaviy xavfsizlik olimpiadasidagi muvaffaqiyati

    JIDU talabasining xalqaro moliyaviy xavfsizlik olimpiadasidagi muvaffaqiyati

    Jahon iqtisodiyoti va diplomatiya universiteti xalqaro huquq sohasida yuqori malakali kadrlar tayyorlash tizimidagi mavqeini mustahkamlashda davom etmoqda, bu esa talaba-yoshlarning ilmiy-tadqiqot va olimpiada tayyorgarligi borasidagi barqaror yuqori natijalarida o'z aksini topmoqda. Universitetning ta'lim va ilmiy siyosati samaradorligining navbatdagi tasdig'i sifatida Xalqaro huquq fakulteti 2-kurs talabasi Aliyev Asilbek Bahromovichning Xalqaro moliyaviy xavfsizlik olimpiadasida "Yurisprudensiya" yo'nalishi bo'yicha qatnashib, faxrli 3-o'rinni qo'lga kiritgani alohida e'tirofga loyiqdir. Talabani olimpiadaga tayyorlash jarayoni "Xalqaro huquq va ommaviy huquq fanlari" kafedrasi o'qituvchisi Uzakbaeva Naubaxor ilmiy rahbarligida amalga oshirildi. Uning ilmiy-metodik ishni tashkil etishdagi yuksak professionalligi va tizimli yondashuvi talabaning xalqaro miqyosda muhim natijaga erishishiga yana bir bor xizmat qildi. Xalqaro moliyaviy xavfsizlik olimpiadasi turli mamlakatlardan iqtidorli yoshlarni birlashtiruvchi nufuzli ilmiy-ta'lim maydoni bo'lib, unda ishtirokchilar moliyaviy xavfsizlikni huquqiy tartibga solish, jinoiy yo'l bilan olingan daromadlarni legallashtirishga qarshi kurashish, shuningdek, milliy va xalqaro moliya tizimlarining shaffofligi va barqarorligini ta'minlash sohasidagi nazariy bilimlari, tahliliy tafakkuri va amaliy ko'nikmalarini namoyish etish imkoniyatiga ega bo'ladilar. Bunday intellektual musobaqalarda ishtirok etish nafaqat xalqaro va milliy huquq sohasidagi chuqur bilimlarni, balki ularni murakkab amaliy vaziyatlarda qo'llay olish mahoratini ham talab etadi, bu esa universitetimiz talabasi tomonidan to'liq namoyon etildi. Saralash bosqichini muvaffaqiyatli yakunlagach, Asilbek Aliyev joriy yilning sentyabr oyida Rossiya Federatsiyasi hududida bo'lib o'tadigan olimpiadaning final bosqichida ishtirok etish huquqiga ega bo'ldi. Ushbu yutuq nafaqat talaba va uning ilmiy rahbarining shaxsiy muvaffaqiyati, balki Jahon iqtisodiyoti va diplomatiya universitetining xalqaro ilmiy nufuzini mustahkamlashga qo'shilgan salmoqli hissa, shuningdek, universitetda amalga oshirilayotgan, iqtidorli yoshlarni xalqaro ilmiy-ta'lim makoniga jalb etishga qaratilgan siyosatning samaradorligidan dalolat beradi. Universitet ma'muriyati ilmiy rahbar Uzakbaeva Naubaxorga talabalarni tayyorlashdagi yuksak professionalligi va vijdonan mehnati uchun samimiy minnatdorchilik bildiradi, shuningdek, Asilbek Aliyevni munosib mukofot bilan tabriklab, unga Rossiya Federatsiyasida bo'lib o'tadigan final bosqichida yanada yuqori g'alaba qozonishini tilaydi.

    JIDUda ta’limda tillarni o‘qitishning muammo va yechimlariga bag‘ishlangan xalqaro ilmiy-amaliy konferensiyasi bo‘lib o‘tdi

    JIDUda ta’limda tillarni o‘qitishning muammo va yechimlariga bag‘ishlangan xalqaro ilmiy-amaliy konferensiyasi bo‘lib o‘tdi

    2026-yil 4-iyun kuni Jahon iqtisodiyoti va diplomatiya universitetida “Taʼlimda tillarni o‘qitishning muammo va yechimlari” mavzusida xalqaro ilmiy-amaliy konferensiyasi bo‘lib o‘tdi. Konferensiya Yevropa va turkiy tillar hamda O‘zbek va rus tillari kafedralari tomonidan har yili an’anaviy tarzda tashkil etilib, joriy yilda xalqaro nufuzli oliy ta’lim muassasalari ishtiroki bilan alohida ahamiyat kasb etdi.  Mazkur anjuman oliy ta’lim tizimida fillogiya fanlarini o‘qitish masalalari, sun’iy intellekt vositalarining chet tili o‘qitishdagi didaktik imkoniyatlari, zamonaviy til ta’limi sifatini ta’minlashning strategiya va usullari, madaniyatlararo aloqa kontekstida chet tilini o‘qitishning dolzarb vazifalari hamda zamonaviy tilshunoslikda fanlararo integratsiyaning kognitiv, neyrolingvistik va raqamli yondashuvlari kabi yo‘nalishlarni o‘z ichiga olgan. Konferensiyada Ozarbayjon Tillar Universiteti, Naxchivon Davlat Universiteti, M.V. Lomonosov nomidagi Moskva davlat universitetining Boku filiali, Turkiyaning Kirklareli universiteti Fan va adabiyot fakulteti Turk tili va adabiyoti bo‘limi, Kayseri shahridagi Erjiyes universiteti, shuningdek, Ispaniya va Italiya davlatlaridan tashrif buyurgan olimlar hamda tadqiqotchilar ishtirok etdi.  Xususan, Turkiyaning Kirklareli universiteti olimlari, fan doktori Beytulloh Bekar, fan doktori Halil Ibrohim Iskandar va tadqiqotchi Edanur Uyanik, fan doktori Yasin Yayla, Ozarbayjon Tillar Universiteti vakillari filologiya fanlari nomzodi, dotsent Ulfat Zokir o‘g‘li Ibrohim, Naxchivon Davlat Universiteti o‘qituvchisi Alaviyya Bahruz Nuri, M.V. Lomonosov nomidagi Moskva davlat universitetining Boku filiali vakili Xalilova Gamida Azizaga qizi, Ispaniya vakili Alexandro Peres Guterres hamda Italiya vakili Marko Brinone kabi ma’ruzachilar bugungi globallashuv va raqamli transformatsiya davrida til siyosati, lingvistik muammolar va til ta’limidagi muammolar va ularning ychmlari to‘g‘risida o‘z fikrlari va ilmiy qarashlari bilan o‘rtoqlashdilar.   Bugungi kunda globallashuv jarayonlari ta’lim sohasida yangi yondashuvlarni talab etib, chet tillarini o‘qitish sifati, ko‘p tillilikni rivojlantirish, zamonaviy pedagogik texnologiyalarni ta’lim amaliyotiga integratsiya qilish va madaniyatlararo muloqotni takomillashtirish masalalarini dolzarb vazifalar qatoriga olib chiqmoqda. Shu nuqtayi nazardan, konferensiya doirasida muhokama qilingan ilmiy g‘oyalar va ilg‘or tajribalar mazkur yo‘nalishlarda olib borilayotgan ilmiy izlanishlarning rivojiga munosib hissa qo‘shadi.

    TTJda dildan suhbat: Bayram ta’tilida psixologik trening tashkil etildi

    TTJda dildan suhbat: Bayram ta’tilida psixologik trening tashkil etildi

    Joriy yilning 30-may kuni JIDU Talabalar turar joyida universitet psixologi N. Norova tomonidan talabalar uchun “Sog‘lom ma’naviy-psixologik muhitni shakllantirish va dildan suhbat” mavzusida seminar-trening tashkil etildi. Qurbon hayiti bayrami ta’tili kunlarida o‘tkazilgan mazkur tadbir talabalarning ruhiy salomatligini mustahkamlash, ularda ijobiy kayfiyatni shakllantirish hamda o‘quv yilining yakuniy bosqichidagi ruhiy zo‘riqishlarni kamaytirishga qaratildi.Trening davomida talabalarga stressni boshqarish, hissiy holatlarni nazorat qilish, ruhiy barqarorlikni saqlash hamda kundalik hayotda uchraydigan turli psixologik vaziyatlarga to‘g‘ri yondashish bo‘yicha amaliy tavsiyalar berildi. Shuningdek, bayram ta’tili davrida oila a’zolari, ota-onalar va yaqinlar bilan samimiy muloqotni yo‘lga qo‘yish, emotsional intellektni rivojlantirish hamda sog‘lom ijtimoiy munosabatlarni mustahkamlash masalalariga alohida e’tibor qaratildi. Seminar-trening interaktiv usullar asosida tashkil etilib, unda turli psixologik mashqlar, amaliy topshiriqlar, guruhiy muhokamalar va savol-javoblar o‘tkazildi. Talabalar o‘z fikr va mulohazalarini erkin bildirish, ichki kechinmalarini tahlil qilish hamda ruhiy xotirjamlikni ta’minlashga xizmat qiluvchi foydali tavsiyalar bilan tanishish imkoniyatiga ega bo‘ldilar. Samimiy va ochiq muloqot ruhida o‘tgan uchrashuv ishtirokchilarda katta qiziqish uyg‘otib, ularning ma’naviy-psixologik salomatligini mustahkamlash, ijobiy dunyoqarashni shakllantirish hamda bayram ta’tili kunlarini mazmunli va samarali o‘tkazish borasida muhim ahamiyat kasb etdi.