Joriy yilning 10-mart kuni Jahon iqtisodiyoti va diplomatiya universitetida huquqshunoslikning eng dolzarb yo‘nalishlaridan biri – “O‘zbekiston Respublikasi fuqarolik huquqida pudrat shartnomasining ahamiyati va amaliyotdagi o‘rni” mavzusiga bag‘ishlangan mahorat darsi bo‘lib o‘tdi. Mazkur tadbir talabalarning nazariy bilimlarini real huquqiy keyslar bilan boyitish, sohadagi zamonaviy tendensiyalarni tahlil qilish maqsadida “Fuqarolik huquqi va xalqaro xususiy huquq fanlari” kafedrasi mudiri Sh.Masadikov va kafedra professori N.Raimova tomonidan tashkil etildi. Mahorat darsida soha mutaxassislari – “Lawpower” yuridik firmasi korporativ yuristi Munira Ismoilova hamda JIDU “Xalqaro biznes huquqi” yo‘nalishi magistranti Zamira Allambergenova o‘z ma’ruzalari bilan ishtirok etishdi. Tadbirda “Fuqarolik huquqi va xalqaro xususiy huquq fanlari” kafedrasi professor-o‘qituvchilari bilan bir qatorda, “Xalqaro huquq” fakultetining 2-kurs talabalari faol qatnashib, sohadagi nozik huquqiy jihatlar yuzasidan o‘zaro fikr almashdilar. Mashg‘ulot davomida O‘zbekiston Respublikasi Fuqarolik kodeksi prizmasi orqali pudrat shartnomasining tushunchasi, uning tuzilishidagi o‘ziga xos protseduralar hamda taraflarning o‘zaro huquq va majburiyatlari atroflicha tahlil qilindi. Ma’ruzachilar tomonidan aynan qurilish va xizmat ko‘rsatish sohalarida shartnomalarni rasmiylashtirishda yo‘l qo‘yiladigan tipik amaliy xatolar hamda ish natijasini qabul qilishda yuzaga keladigan yashirin nuqsonlar uchun javobgarlik masalalari hayotiy misollar yordamida yoritib berildi. Shuningdek, uchrashuvda milliy qonunchiligimizda pudrat munosabatlaridan kelib chiqadigan nizolarni hal etishning samarali huquqiy mexanizmlari muhokama markazida bo‘ldi. Ushbu ilmiy-amaliy muloqot Barqaror rivojlanishning 9-maqsadi – “Sanoatlashtirish, innovatsiyalar va infratuzilma” hamda 16-maqsadi – “Tinchlik, adolat va samarali institutlar” g‘oyalari bilan hamohangligi bilan ajralib turadi. Infratuzilma loyihalarining huquqiy mustahkamligi mamlakatimizda barqaror qurilish va sifatli sanoatlashtirishning bosh garovi ekanligi alohida ta’kidlandi. Tadbir yakunida BRMning 16.3-bandi – “Qonun ustuvorligini ta’minlash va odil sudlov imkoniyatlarini kengaytirish” tamoyillari fuqarolik huquqidagi shartnomalar erkinligi va taraflar tengligi bilan qanchalik uzviy bog‘liqligi xususida xulosalar qilindi. Bu kabi mahorat darslari bo‘lajak mutaxassislarda huquqiy ongni yuksaltirishga hamda nazariya va amaliyotning mustahkam integratsiyasini ta’minlashga xizmat qilishi shubhasizdir.
Joriy yilning 10-mart kuni Jahon iqtisodiyoti va diplomatiya universiteti “Yevropa va turkiy tillar” kafedrasi nemis tili oʻqituvchilari Sh.M. Abdugʻaniyeva va U.I. Sultonovalar tomonidan “Chet tili darslarida yangi interaktiv metodlardan foydalanish (Yevropa universitetlari tajribasi asosida)” mavzusida mahorat darsi tashkil etildi. Mahorat darsida kafedra mudiri, filologiya fanlari nomzodi, dotsent Mamatqosimova Vasila Akramjonovna hamda kafedra oʻqituvchilari, shuningdek, Kirklareli universiteti dotsenti Yasin Yayla, Toshkent shahrining Mirzo Ulugʻbek tumanidagi 112-maktab nemis tili oʻqituvchisi K.Q. Istamova, JIDU akademik litseyi nemis tili fani oʻqituvchisi, Germaniya qoʻshma taʼlim dasturi koordinatori N.D. Zakirovalar ishtirok etdilar. Bugungi kunda taʼlim tizimini modernizatsiya qilish jarayonida zamonaviy pedagogik texnologiyalar va interaktiv metodlardan foydalanish muhim ahamiyat kasb etmoqda. Ayniqsa, chet tillarini oʻqitishda talabalarning faolligini oshirish, ularning kommunikativ koʻnikmalarini rivojlantirish hamda dars jarayonini qiziqarli tashkil etishda interaktiv metodlar keng qoʻllanilmoqda. Mahorat darsining maqsadi – interaktiv metodlar orqali oʻqituvchi va talaba oʻrtasidagi faol hamkorlikni taʼminlashdan iborat. Bunday metodlar yordamida talabalar dars jarayonida faol ishtirok etadi, oʻz fikrlarini erkin ifodalaydi va bilimlarini amaliyotda qoʻllash imkoniyatiga ega boʻladi. Mahorat darsi davomida ishtirokchilar tomonidan “Ijodiy va harakatli diktant”, “Rol oʻyinlari”, “Hikoyani davom ettirish”, “Grammatik mavzuga oid ijodiy diktant yozish”, “Kometalar uchishi”, “Harflar fantaziyasi” kabi interaktiv metodlar taqdim etildi. Ushbu metodlar talabalarning mustaqil fikrlashini, muloqot madaniyatini va ijodiy yondashuvini rivojlantirishga xizmat qilishi taʼkidlandi. Shuningdek, zamonaviy taʼlim jarayonida raqamli texnologiyalarning oʻrni alohida ahamiyatga ega. Yevropa universitetlarida chet tili darslarida Gimkit, Wordwall, Kahoot kabi onlayn platformalar orqali interaktiv oʻyinlar tashkil etilmoqda. Mazkur platformalar yordamida talabalarning bilimlarini mustahkamlash, lugʻat boyligini oshirish va dars jarayonini yanada qiziqarli qilish imkoniyati yaratiladi. Mahorat darsi soʻngida chet tili darslarida interaktiv metodlardan foydalanish taʼlim samaradorligini sezilarli darajada oshirishi qayd etildi. Yevropa universitetlari tajribasi shuni koʻrsatadiki, zamonaviy interaktiv metodlar va onlayn oʻyinlardan foydalanish talabalarning bilim olish jarayonini yanada qiziqarli va samarali qiladi. Shu bois chet tilini oʻqitishda zamonaviy pedagogik texnologiyalar, interaktiv metodlar hamda raqamli platformalardan keng foydalanish muhim ahamiyatga ega.
JIDU Postdoktorantura o‘qituvchilik va ilmiy-tadqiqot stipendiya dasturi - bu Jahon iqtisodiyoti va diplomatiya universitetida (JIDU) o‘qituvchilik, ilmiy-tadqiqot va akademik faoliyatda ishtirok etish uchun PhD dasturi bitiruvchilarini (postdoktorantlarni) jalb etishga qaratilgan akademik dasturdir. Mazkur dastur JIDUda akademik natijadorlik, ilmiy samaradorlikni va xalqaro hamkorlikni rivojlantirish maqsadida iqtidorli postdoktorantlarni o‘qituvchilik, ilmiy-tadqiqot va institutsional faoliyatga jalb etishni ko‘zda tutadi. Stipendiya dasturi yosh olimlarga dinamik akademik muhitgag munosib hissa qo‘shish, shu bilan birga o‘z akademik va kasbiy faoliyatini rivojlantirish uchun noyob imkoniyat yaratadi. Dastur maqsadlari Dasturning asosiy maqsadlari quyidagilardan iborat: JIDUning akademik va ilmiy-tadqiqot salohiyatini mustahkamlash; Xalqaro akademik hamkorlik va almashinuvni rag‘batlantirish; Yosh tadqiqotchilarning kasbiy rivojlanishini qo‘llab-quvvatlash; Yuqori sifatli akademik tadqiqotlar, siyosiy tahlillar va ilmiy nashrlar faoliyatini rivojlantirish Universitetning institutsional taraqqiyoti hamda o‘quv dasturlarini zamonaviylashtirishga ko‘maklashish. Stipendiyani amalga oshirish muddati • 10 oy: sentabrdan iyungacha (to‘liq bandlik, JIDUda bo‘lish, Toshkent shahri, O‘zbekiston Respublikasi) Ixtisoslik sohalari Quyidagi akademik yo‘nalishlar bo‘yicha arizalar qabul qilinadi: Xalqaro huquq Xalqaro munosabatlar Xalqaro iqtisodiyot va menejment Stipendiya imtiyozlari va moliyaviy yordam Tanlab olingan har bir ishtirokchiga quyidagilarni o‘z ichiga olgan keng qamrovli moliyaviy va institutsional qo‘llab-quvvatlash taqdim etiladi: · Oylik stipendiya: 1500 AQSH dollari · Yashash joyi: kampusda turar joy ajratiladi · Xalqaro aviaqatnov: Toshkent shahriga borish/kelish uchun ekonom-klass aviachiptalar · Tibbiy sug‘urta: butun stipendiya davri uchun tibbiy sug‘urta · Sertifikatlash: dastur muvaffaqiyatli yakunlangandan so‘ng JIDU dasturining rasmiy sertifikati. Eslatma: Dastur muvaffaqiyatli yakunlangan taqdirda, JIDU stipendiya muddatini yana bir yilga uzaytirishni taklif qilishi mumkin. Dastur ishtirokchilarining majburiyatlari Stipendiatlar universitetning akademik missiyasini amalga oshirishga salmoqli hissa qo‘shgan holda akademik, o‘qituvchilik va ilmiy-tadqiqot faoliyatida faol ishtirok etishlari lozim. 1. Ta’lim berish va akademik qo‘llab-quvvatlash · Bakalavriat va magistratura kurslarini o‘qitishda yordam berish · O‘qituvchilarga quyidagilarda ko‘maklashish: ma’ruzalar tayyorlash, seminarlar va amaliy mashg‘ulotlar o‘tkazish, shuningdek, o‘quv dasturlarini ishlab chiqish · Talabalarga ilmiy rahbarlik qilish va ularni qo‘llab-quvvatlashda ishtirok etish 2. Akademik loyihalar va ilmiy tadqiqotlar • Joriy va yangi boshlangan ilmiy-tadqiqot loyihalarida ishtirok etish • Tegishli sohalarda mustaqil va qo‘shma tadqiqotlar o‘tkazish • Siyosat ishlab chiqishga yo‘naltirilgan amaliy tadqiqotlar va tahliliy faoliyat bilan shug‘ullanish. • Akademik yozuvlar, ishchi maqolalar (working papers) va taqrizdan o‘tgan ilmiy nashrlar tayyorlashga hissa qo‘shish. • Ilmiy konferensiyalar, seminarlar va mahorat darslarini tashkil etishga ko‘maklashish Saralash mezonlari Nomzodlar quyidagi talablarga javob berishi kerak: • Jahonning eng yaxshi 500 ta universitetiga kiruvchi oliy ta’lim muassasasida PhD darajasiga ega bo‘lish yoki hozirda eng yaxshi 500 ta universitetga aloqador bo‘lish; • Xalqaro huquq, xalqaro munosabatlar yoki xalqaro iqtisodiyot va menejment sohasiga ixtisoslashish; • Nashrlar, konferensiyalardagi ma’ruzalar yoki grant loyihalarida ishtirok etish orqali tasdiqlangan yuqori akademik va ilmiy-tadqiqot yutuqlarini namoyish etish; • Ingliz tilini mukammal darajada bilish (yozma va og‘zaki); • O‘qitish, ilmiy tadqiqotlar va institutsional faoliyatga yuqori motivatsiyani ko‘rsatish; • Ko‘p madaniyatli akademik muhitda samarali ishlash qobiliyatini namoyish etish. Ariza topshirish uchun zarur hujjatlar Nomzodlar quyidagi hujjatlarni taqdim etishlari kerak: 1. Tarjimai hol (CV) 2. Motivatsiya xati (hajmi 1 000 tagacha so‘zdan iborat) 3. PhD diplomi va akademik ko‘chirma (transkript) 4. Bitta tavsiyanoma 5. Ilmiy nashrlar ro‘yxati 6. Dasturda ishtirok etish davrida ilmiy qiziqishlar, taklif etilayotgan tadqiqot loyihalari va kutilayotgan akademik hissa bayon etilgan 2-3 sahifali tadqiqot bayonoti (Research Statement) Saralash tartibi Saralash jarayoni quyidagi bosqichlarni o‘z ichiga oladi: 1. Hujjatlarni dastlabki ko‘rib chiqish 2. Dastlabki tanlovdan o‘tgan nomzodlar bilan onlayn suhbat 3. JIDU stipendiatlarini tanlab olish bo‘yicha Komissiya tomonidan yakuniy qaror Dastur natijalari va hisobotlari Dastur yakunida stipendiatlar quyidagilarni taqdim etishlari shart: • Akademik va o‘quv faoliyatini umumlashtiruvchi o‘qituvchilik faoliyati to‘g‘risidagi hisobot; · Tadqiqot natijalari, nashrlar va amalga oshirilgan loyihalar natijalari to‘g‘risidagi ma’lumotlarni o‘z ichiga olgan ilmiy-tadqiqot va loyiha faoliyati to‘g‘risidagi hisobot. Ariza topshirish muddati: 2026-yil 30-aprel Arizalar quyidagi shakl orqali topshiriladi: https://forms.gle/PYYnBaU9iuRbYDr87 Qo‘shimcha ma’lumot uchun Xalqaro akademik hamkorlik ofisiga quyidagi manzil orqali murojaat qiling.: international@uwed.uz
2026-yil 6-mart kuni Jahon iqtisodiyoti va diplomatiya universitetida O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyevning Italiya Respublikasining O‘zbekiston Respublikasidagi Favqulodda va Muxtor elchisi Gvido De Sanktis bilan uchrashuvi bo‘lib o‘tdi. Uchrashuv davomida tomonlar O‘zbekiston–Italiya munosabatlarini rivojlantirishning dolzarb masalalari, xususan, parlamentlararo aloqalar, akademik hamkorlik hamda ikki mamlakat ilmiy-ta’lim muassasalari o‘rtasidagi sheriklikni kengaytirish masalalarini muhokama qildilar. S.Safoyev O‘zbekiston va Italiya o‘rtasidagi munosabatlar barqaror ijobiy dinamika va yuqori darajadagi siyosiy ishonch bilan tavsiflanishini qayd etdi. Muntazam siyosiy muloqot va faol parlamentlararo hamkorlik, jumladan, parlament do‘stlik guruhlari faoliyati va parlament delegatsiyalari almashinuvi orqali ikki tomonlama aloqalarni yanada mustahkamlashga xizmat qilayotgani ta’kidlandi. Suhbat chog‘ida O‘zbekiston va Italiya o‘rtasidagi siyosiy, iqtisodiy va gumanitar sohalardagi hamkorlikni rivojlantirish istiqbollari ham ko‘rib chiqildi. JIDU va Italiyaning yetakchi universitetlari o‘rtasidagi akademik hamkorlik masalalariga alohida e’tibor qaratildi. Universitet Italiyaning bir qator oliy o‘quv yurtlari, jumladan, Bolonya, Perudja va Siena universitetlari bilan akademik almashinuv, til o‘rgatish va ilmiy hamkorlik dasturlarini amalga oshirib kelayotgani qayd etildi. Italiya elchisi JIDUning akademik salohiyatini yuqori baholab, ikki mamlakat universitetlari o‘rtasida ta’lim va ilmiy aloqalarni rivojlantirishga ko‘maklashishga tayyorligini bildirdi. Bundan tashqari, davlat boshqaruvi, xalqaro munosabatlar va iqtisodiy diplomatiya sohalarida qo‘shma ta’lim dasturlarini amalga oshirish imkoniyatlari, shuningdek, qo‘shma ilmiy tadqiqotlar va ekspert tadbirlarini o‘tkazish istiqbollari muhokama qilindi. Uchrashuv yakunida tomonlar siyosiy, ta’lim va ilmiy-tahliliy sohalarda O‘zbekiston–Italiya hamkorligini yanada mustahkamlashdan manfaatdor ekanliklarini tasdiqladilar.
2026-yil 2-mart kuni O‘zbekiston Respublikasi Oliy Majlisi Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyev ikki universitet o‘rtasidagi akademik hamkorlikni mustahkamlash maqsadida Glazgo universitetiga (Buyuk Britaniya) rasmiy tashrif buyurdi. Tashrif davomida S. Safoyev Glazgo universiteti rahbariyati va akademik hamjamiyati vakillari bilan uchrashuvlar o‘tkazdi. Jumladan, universitet vitse kansler o‘rinbosari professor Reychel Sendison, Huquq maktabi rahbari professor Kler MakDiarmind hamda universitet professorlari va akademik bo‘linmalar vakillari bilan muzokaralar olib borildi. Bugungi kunga qadar Jahon iqtisodiyoti va diplomatiya universiteti hamda Glazgo universiteti bir qator qo‘shma ta’lim va akademik tashabbuslarni muvaffaqiyatli amalga oshirib kelmoqda. Hamkorlik Executive Education (rahbarlar uchun ta’lim) dasturlari, xalqaro huquq va xalqaro munosabatlar yo‘nalishlari, shuningdek Glazgo universitetining Huquq maktabi hamda Ijtimoiy va siyosiy fanlar maktabi o‘rtasidagi hamkorlikni qamrab oladi. Tashrif doirasida universitetlar o‘rtasidagi akademik hamkorlikni yanada rivojlantirishga qaratilgan ikkita muhim hujjat imzolandi. Birinchi hujjat qo‘shma ikki diplomli dastur bo‘yicha memorandum bo‘lib, u huquqiy tadqiqotlar yo‘nalishida qo‘shma magistratura dasturini tashkil etishni nazarda tutadi. Ushbu dastur doirasida JIDU magistrantlari belgilangan akademik talablarni bajargan holda Glazgo universitetining Huquq maktabida tahsil olish hamda Buyuk Britaniyaning yetakchi yuridik oliy ta’lim muassasalaridan birining diplomini qo‘lga kiritish imkoniyatiga ega bo‘ladilar. Ikkinchi muhim hujjat Erasmus Mundus Joint Masters dasturining “Markaziy va Sharqiy Yevropa, Rossiya va Yevroosiyo tadqiqotlari” (CEERES) xalqaro konsorsiumiga JIDUning qo‘shilishi to‘g‘risidagi kelishuv bo‘ldi. Mazkur nufuzli ikki yillik dastur Yevrosiyo mintaqasidagi siyosiy, iqtisodiy va huquqiy jarayonlarni kompleks o‘rganishga qaratilgan. Konsorsiumdagi ishtirok akademik mobillikni kengaytirish, shuningdek xalqaro ilmiy hamkorlik va qo‘shma tadqiqot loyihalarini amalga oshirish uchun yangi imkoniyatlar yaratadi. Tashrif doirasida JIDU rektori S. Safoyev Glazgo universitetida va Shotlandiyaning boshqa akademik muassasalarida tahsil olayotgan hamda ilmiy faoliyat olib borayotgan o‘zbekistonlik talabalar va tadqiqotchilar bilan ham uchrashdi. Uchrashuvda matematika, biokimyo, genetika, xalqaro munosabatlar, pedagogika va huquqshunoslik kabi turli sohalarda tahsil olayotgan doktorantlar (PhD), tadqiqotchilar va talabalar ishtirok etdilar. Talabalar o‘zlarining akademik yutuqlari, so‘nggi ilmiy tadqiqotlari natijalari hamda xalqaro akademik muhitda o‘qish va ilmiy faoliyat olib borish tajribalari bilan o‘rtoqlashdilar. Muhokama jarayonida talabalar o‘z mamlakatining madaniy elchilari sifatidagi o‘rni alohida ta’kidlandi. Ular xalqaro akademik muhitda O‘zbekistonning boy an’analari va madaniy merosini targ‘ib etishga intilayotganliklarini, shuningdek xorijda orttirgan bilim va tajribalarini kelajakda mamlakat taraqqiyoti yo‘lida qo‘llashga tayyor ekanliklarini bildirdilar. S. Safoyev o‘z nutqida xorijda ta’lim olayotgan O‘zbekiston fuqarolariga davlat tomonidan ko‘rsatilayotgan har tomonlama qo‘llab-quvvatlashni alohida qayd etdi. U yosh olimlarning yutuqlarini yuqori baholab, ularga kelgusi ilmiy va kasbiy faoliyatlarida muvaffaqiyatlar tiladi hamda ularning bilim va salohiyati mamlakatning intellektual rivojiga muhim hissa qo‘shishini ta’kidladi. Tomonlar imzolangan kelishuvlar ikki universitet o‘rtasidagi uzoq muddatli strategik hamkorlikni yanada mustahkamlashiga, akademik almashinuvni rivojlantirishga hamda ilmiy hamkorlikni kengaytirishga xizmat qilishiga ishonch bildirdilar. Glazgo universiteti haqida 1451-yilda tashkil etilgan Glazgo universiteti ingliz tilida ta’lim beruvchi dunyodagi to‘rtinchi eng qadimiy universitet hisoblanadi. U Buyuk Britaniyaning yetakchi tadqiqot universitetlarini birlashtiruvchi nufuzli Russell Group tarkibiga kiradi hamda muntazam ravishda dunyoning eng yaxshi 100 ta universiteti qatoridan joy oladi. Universitet ko‘p asrlik tarix davomida ilmiy innovatsiyalar markazi sifatida tanilgan bo‘lib, uning bitiruvchilari va professorlari orasida Nobel mukofoti sovrindorlari, taniqli olimlar hamda davlat arboblari bor.
Joriy yilning 5-mart kuni Jahon iqtisodiyoti va diplomatiya universitetining Magistratura bosqichi “Xalqaro arbitraj va Nizolarni hal etish” yo‘nalishi talabalariga Nigeriyalik huquqshunos, venger kompaniyasining huquqiy savdo konsultanti Sopuruchukwu Elizabeth Anih tomonidan “Fuqarolik huquqi va xalqaro xususiy huquq fanlari” kafedrasi o‘qituvchisi Alisher Bobonazarov Bolmuhammad o‘g‘li tashabbusi bilan “Xorijiy davlatlar fuqarolik va savdo huquqi” fani doirasida “Nigeriya savdo va fuqarolik huquqiy tiziminign o‘ziga xos xususiyatlari” mavzusida mahorat darsi tashkil etildi. Dars davomida talabalarga Nigeriya huquqiy tiziminign o‘ziga xosliklari, huquqiy tizimlari va turli huquq manbaalari va turli huquqiy oilalarga mavjud huquq elementlarining qanday amalda uyg‘unlashganligi, mavjud kolliziyalar va ularning sababalari masalalari tahlil etildi. Elizabet Nigeriya qonunchiligida Anglo-sakson, Romano-german va Shariya huquqiy tizimlarining barchasi mavjud ekanligi va ular yagona va asosiy bo’gan konstitutsiya ostida birlashganligini va uyg’unlashtirilganligini, bundan tashqari qonunchilik manbaalri qadriyatlarga qarab shtatlar bo’yicha ham farq qilishi mumkinligini aytib o’tdi. Ushbu tadbir talabalarga “Xorijiy davlatlar fuqarolik va savdo huquqi” doirasida tajribali huquqshunos tomonidan xususiy bilimlarni olishida, yangi bilimlarni taqqoslash orqali tahliliy qobiliyatlarining kuchayishiga va Afrika davlatlariga oid o’zlari qiziqqan savollarga javob topishiga xizmat qildi.
Jahon iqtisodiyoti va diplomatiya universitetida (JIDU) “Zamonaviy xalqaro munosabatlar, jahon iqtisodiyoti va O'zbekiston manfaatlari” kursi doirasida Gretsiya Respublikasining O‘zbekiston Respublikasidagi Favqulodda va Muxtor Elchisi Paraskevi Tzeveleki xonimning tashrifi bo‘lib o‘tdi. Uchrashuv doirasida talabalar zamonaviy Gretsiya, uning tashqi siyosati va iqtisodiyoti bilan tanishdilar. Bunda milliy iqtisodiyotning tayanch tarmog‘i hisoblangan dengiz sanoatiga alohida e’tibor qaratildi. Shuningdek, ishtirokchilarga mamlakatning madaniy merosi, tarixiy an’analari va bugungi taraqqiyotini aks ettiruvchi mamlakatshunoslik videoroligi namoyish etildi. Savol-javoblarga boy o‘tgan sessiya davomida talabalar xalqaro xavfsizlik, tashqi iqtisodiy hamkorlik hamda O‘zbekiston va Gretsiya o‘rtasidagi o‘zaro aloqalar istiqbollarini muhokama qildilar. Elchi xonim o‘z tajribasi va dolzarb xalqaro jarayonlar bo‘yicha professional qarashlari bilan o‘rtoqlashdi. Tadbir ochiq va mazmunli muhitda o‘tdi hamda talabalar uchun xalqaro munosabatlar va diplomatik amaliyot bo‘yicha bilimlarini boyitishda muhim imkoniyatga aylandi.
2026-yil 5-mart kuni Fuqarolik huquqi va xalqaro xususiy huquq kafedrasi o‘qituvchisi Rushana Sadullaeva “Xalqaro investitsiya huquqi” kursi doirasida “Xalqaro iqtisodiyot” yo‘nalishi magistrantlari uchun navbatdagi mehmon ma’ruzasini tashkil qildi. Ma’ruzachi sifatida O‘zbekiston Respublikasi Qonunchilik va huquqiy siyosat instituti Xalqaro munosabatlar qonunchiligi sektori yetakchi ilmiy xodimi Timur Davlatov ishtirok etdi. O‘z chiqishida u investitsiya shartnomalari asosidagi arbitraj sohasida olib borilayotgan islohotlar haqida so‘z yuritdi. U investor-davlat nizolarini hal qilish (ISDS) tizimi oldida turgan dolzarb muammolarni chuqur tahlil qilib, dunyo mamlakatlarining taklif etilayotgan o‘zgarishlarga munosabati haqida ma’lumot berdi. Samsung Electronics Uzbekistan kompaniyasining yuridik va muvofiqlik maslahatchisi amaliyotchi mutaxassis Suhayl-bek Isokov o‘z tajribasi bilan o‘rtoqlashdi. U O‘zbekistondagi yetakchi investorlardan biri sifatida Samsung Electronics kompaniyasi faoliyati haqida so‘zlab, talabalarga yirik transmilliy korporatsiyada xalqaro investitsiya huquqi tamoyillari amalda qanday qo‘llanilishi haqida batafsil ma’lumot berdi. Mehmon ma’ruzasi magistrantlar orasida katta qiziqish uyg‘otdi va xalqaro investitsiya huquqining zamonaviy tendensiyalari hamda amaliy jihatlari bilan tanishish uchun muhim imkoniyat yaratdi.
