“MASTER’S DEGREE ABROAD: KEY STRATEGIES TO YOUR SUCCESSFUL ADMISSION” MAVZUSIDA XORIJLIK MUTAXASSISLAR BILAN DAVRA SUHBATI TASHKIL ETILDI

Joriy yilning 3-noyabr kuni Jahon iqtisodiyoti va diplomatiya universitetida (JIDU) “Master’s Degree Abroad: Key Strategies to Your Successful Admission” (“Xorijda magistratura: muvaffaqiyatli qabul qilinishning asosiy strategiyalari”) mavzusida xorijlik mutaxassislar bilan davra suhbati tashkil etildi. Tadbir soat 11:30 da aralash (gibrid) formatda — SOK konferensiya zalida va Zoom platformasida — o‘tkazildi. Tadbirni JIDU “Fuqarolik huquqi va xalqaro xususiy huquq fanlari” kafedrasi o‘qituvchisi, Stipendium Hungaricum stipendiyasi asosida Seged universitetida magistr (LLM) darajasini olgan Alisher Bobonazarov tashkil etib, moderatorlik qildi. Davra suhbatining maqsadi talabalarga xorijda magistraturaga muvaffaqiyatli o‘qishga kirish bo‘yicha amaliy maslahatlar va shaxsiy tajriba ulashish edi.

Moderator bilan bir qatorda davra suhbatida o‘zlari ham xorijda magistratura bosqichida ta’lim olgan yoki olayotgan uchta mehmon spiker ishtirok etdi: Aberdin universitetida magistr (MSc) darajasini olgan, Eötvös Young Fellowship (EYUF) stipendiyasi sohibasi Zubayda Murotaliyeva; “Femida LLC” kompaniyasining asoschisi, Pensilvaniya shtat universitetida LLM darajasini olgan, shuningdek EYUF stipendiyasi sohibasi Farangiz Razakova; va xalqaro munosabatlar bo‘yicha mutaxassis, falsafa doktori (PhD), Segeda universiteti o‘qituvchisi, Sciences Po Lille bitiruvchisi hamda Stipendium Hungaricum stipendiyasi sohibasi Rachida Roukiaoui.

Muhokama davomida spikerlar xorijda magistraturaga muvaffaqiyatli o‘qishga kirish bo‘yicha amaliy strategiyalarni, jumladan mos universitet va dasturni tanlash, kuchli motivatsion xat va ilmiy insho tayyorlash, tavsiyanoma olish, til va standart test talablarini bajarish hamda o‘zining ilmiy va kasbiy tajribasini to‘g‘ri taqdim etish masalalarini o‘rtoqlashdi. Xususan, Stipendium Hungaricum va Eötvös Young Fellowship kabi xalqaro stipendiya dasturlari, ularga ariza topshirish bosqichlari, shuningdek yangi ilmiy muhitga va chet eldagi hayotga muvaffaqiyatli moslashish usullariga alohida e’tibor qaratildi.

Tadbirda “Fuqarolik huquqi va xalqaro xususiy huquq fanlari” kafedrasi professor-o‘qituvchilari, jumladan kafedra mudiri Sherzodbek Masadikov va professor Dilfuza Imamova, o‘qituvchi Qobiljon Nosirov, shuningdek shogird-o‘qituvchilar Munira Ismoilova, Xayitmurod Shaydullayev, Muhammadjon Masharipov va Mastura Yusupova ishtirok etib, talabalar bilan birga muhokamada faol qatnashdilar.

Ushbu davra suhbati Barqaror rivojlanish maqsadlarining 4-maqsadi — “Sifatli ta’lim” g‘oyalariga, xususan, barcha odamlarning arzon va sifatli oliy ta’limga teng kirish huquqini ta’minlashga qaratilgan 4.3-bandiga hamda rivojlangan davlatlarda oliy ta’lim olish uchun stipendiyalar sonini ko‘paytirishga qaratilgan 4.b-bandiga mos keladi. Tadbir, shuningdek, 17-maqsad — “Maqsadlar uchun hamkorlik”ni, xususan, muassasalar o‘rtasida xalqaro hamkorlikni mustahkamlash va bilim hamda tajriba almashishga oid 17.6-bandni aks ettiradi.

Ushbu tadbirning ma’naviy ahamiyati katta bo‘lib, u talabalarni yuksak ilmiy maqsadlar qo‘yishga ilhomlantiradi, ularning dunyoqarashini kengaytiradi hamda xorijda bilim va tajriba orttirib, ularni Vatan ravnaqi yo‘lida qo‘llaydigan yosh mutaxassislar avlodini tarbiyalashga xizmat qiladi. Bunday tadbirlar millatning ilmiy-intellektual salohiyatini mustahkamlaydi hamda yoshlarda o‘z kasbiy kelajagi uchun mas’uliyat tuyg‘usini oshiradi.