JIDUda O‘zbekiston va Qozog‘iston regbi federatsiyalari o‘rtasidagi hamkorlik istiqbollari muhokama qilindi

2026-yil 6-avgust kuni Jahon iqtisodiyoti va diplomatiya universitetida O‘zbekiston regbi federatsiyasi rahbariyati hamda Qozog‘iston Respublikasi delegatsiyasi o‘rtasida rasmiy uchrashuv bo‘lib o‘tdi.

Uchrashuv O‘zbekiston Respublikasi Savdo-sanoat palatasining taklifiga binoan 4–5-avgust kunlari Toshkent shahrida o‘tkazilgan O‘zbekiston–Qozog‘iston biznes-forumi yakunlari doirasida tashkil etildi. Ishbilarmonlik dasturi yakunlanganidan so‘ng O‘zbekiston va Qozog‘iston regbi federatsiyalari rahbarlarining regbi sohasidagi ikki tomonlama hamkorlikni rivojlantirish va sheriklik aloqalarini mustahkamlash masalalariga bag‘ishlangan alohida uchrashuvi bo‘lib o‘tdi.

Uchrashuvda O‘zbekiston regbi federatsiyasi raisi, O‘zbekiston Respublikasi Oliy Majlisi Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyev; O‘zbekiston regbi federatsiyasi bosh kotibi Qahramon Jalilov; Qozog‘iston regbi federatsiyasi prezidenti, Qozog‘iston Respublikasi «Atameken» Milliy tadbirkorlar palatasi Prezidiumi raisi Kanat Sharlapayev, shuningdek, Qozog‘iston Tashqi savdo palatasi boshqaruvi raisi, «Atameken» MTP boshqaruvi raisi o‘rinbosari Murat Karimsakov ishtirok etdi.

Muzokaralar davomida tomonlar milliy federatsiyalar o‘rtasidagi hamkorlikning istiqbolli yo‘nalishlarini muhokama qildilar. Bolalar-o‘smirlar va talabalar regbisini rivojlantirish, sportchilar hamda mutaxassislarni tayyorlash borasida tajriba almashish, qo‘shma o‘quv-mashg‘ulot yig‘inlari va xalqaro musobaqalarni tashkil etish, shuningdek, Markaziy Osiyo mamlakatlarida regbini yanada ommalashtirishga qaratilgan tashabbuslarni amalga oshirish masalalariga alohida e’tibor qaratildi.

Uchrashuv ishtirokchilari mintaqaviy hamkorlikni kengaytirish hamda Markaziy Osiyo regbisining xalqaro maydondagi raqobatbardoshligini oshirish maqsadida milliy federatsiyalar sa’y-harakatlarini birlashtirish masalalarini ham ko‘rib chiqdilar.

Uchrashuv yakunida tomonlar sheriklikni mustahkamlashdan o‘zaro manfaatdor ekanliklarini tasdiqladilar hamda O‘zbekiston va Qozog‘iston regbi federatsiyalari o‘rtasidagi yaqin hamkorlikni rivojlantirish ushbu sport turini mintaqada yanada ommalashtirish yo‘lidagi muhim qadam bo‘lishiga ishonch bildirdilar.