Jahon iqtisodiyoti va diplomatiya universiteti professori Alisher Fayzullayevning yangi ilmiy maqolasi diplomatiya yo‘nalishidagi nufuzli xalqaro ilmiy nashrlardan biri The Hague Journal of Diplomacy jurnalida chop etildi.

“Presentability and Representability: Rethinking Individual Diplomatic Representation” nomli maqola jurnalning eng so‘nggi materiallari qatorida e’lon qilingan bo‘lib, u 2026-yil 23-mart sanasida onlayn nashr etilgan.

Mazkur tadqiqot diplomatik vakillikni individual darajada yangi nazariy yondashuv asosida tahlil qiladi. Muallif diplomatiya samaradorligini tushuntirishda ikki asosiy o‘lchov prezentabellik (presentability) va vakillik qobiliyati (representability) tushunchalarini ilgari suradi va ularni tizimli ravishda asoslab beradi.

Tadqiqotning asosiy xulosasiga ko‘ra, zamonaviy diplomatiyada samaradorlik ushbu ikki omilning alohida mavjudligiga emas, balki ularning o‘zaro uyg‘unlashgan holda namoyon bo‘lishiga bevosita bog‘liq. Muallif amaliyot nazariyasi va signal nazariyasi asosida olib borilgan tahlil orqali tarixiy hamda zamonaviy diplomatik tajribalarni solishtiradi va turli sifatlar kombinatsiyasining diplomatik natijalarga ta’sirini ilmiy jihatdan asoslab beradi.

Maqolaning The Hague Journal of Diplomacy kabi xalqaro miqyosda tan olingan ilmiy jurnalda e’lon qilinishi professor Alisher Fayzullayevning diplomatiya va xalqaro munosabatlar sohasidagi ilmiy izlanishlari yuksak e’tirof etilayotganidan dalolat beradi.

Ta’kidlash joizki, professor Alisher Fayzullayevning diplomatiya nazariyasi va amaliyotiga oid tadqiqotlari avval ham xalqaro ilmiy maydonda e’tibor qozongan. Ochiq manbalarda uning diplomatiya, muzokaralar va xalqaro munosabatlarga bag‘ishlangan bir qator ilmiy ishlari va kitoblari, jumladan Brill nashriyotida chop etilgan asarlari qayd etilgan.

Maqolani quyidagi havola orqali o‘qish mumkin.