JIDUda nizolarni muqobil hal etish bo‘yicha mutaxassis tomonidan mahorat darsi o‘tkazildi

Joriy yilning 19-mart kuni Jahon iqtisodiyoti va diplomatiya universitetida magistratura “Xalqaro arbitraj va nizolarni hal etish” mutaxassisligi talabalari uchun Toshkent mediatsiya markazi direktori va amaliyotchi mediator Diyorbek Kimsanov tomonidan “O‘zbekiston Respublikasida nizolarni muqobil hal etishning dolzarb amaliy jihatlari” deb nomlangan mahorat darsi bo‘lib o‘tdi. Tadbir Fuqarolik huquqi va xalqaro xususiy huquq kafedrasi mudiri Sherzodbek Masadikov va o‘qituvchi Alisher Bobonazarov tomonidan talabalarning nazariy bilimlarini amaliy tajriba bilan boyitish va ushbu sohadagi dolzarb tendentsiyalarni tahlil qilish maqsadida tashkil etildi.

Darsda milliy va xalqaro miqyosda mavjud muqobil nizolarni hal qilish usullari tahlil qilindi. Bundan tashqari, mediatsiyaning amaliy qo'llanilishi, uning turli sohalarda qo'llanilishi va mediativ kelishuvlarni ijro etish bilan bog'liq dolzarb muammolarni yoritish uchun misollar keltirildi. Samaradorlikni oshirish va sud tizimiga yukni kamaytirish masalalari ham muhokama qilindi.

Tadbir yakunida BMTning Barqaror rivojlanish maqsadlarining “Qonun ustuvorligini ta’minlash va adolatga erishishni kengaytirish”ga bag‘ishlangan 16.3-bandida mediatsiya va nizolarni hal qilishning boshqa muqobil shakllari sohasida keng ko‘lamli huquqiy islohotlarni amalga oshirish bilan bog‘liq tamoyillar, shuningdek, ushbu maqsadni kuchli demokratik institutlarni shakllantirishdagi ahamiyati ta’kidlandi.