2025-yil 26–28-noyabr kunlari Jahon iqtisodiyoti va diplomatiya universitetida “UWED Career Fair 2025” karyera haftaligi bo‘lib o‘tdi. Uch kun davomida universitet talabalari, bitiruvchilari va O‘zbekiston hamda mintaqaning yetakchi ish beruvchilari uchrashadigan katta muloqot maydoniga aylandi.

Haftalikni tashkil etish va muvofiqlashtirish ishlari Jahon iqtisodiyoti va diplomatiya universitetining “Bitiruvchilar bilan ishlash va kasbiy rivojlanish sektori” tomonidan universitet rahbariyati va hamkor kompaniyalar bilan yaqindan hamkorlikda amalga oshirildi.

1-kun: HR & Employers Day – talabalar va ish beruvchilar uchrashuvi

Karyera haftaligi doirasidagi «HR & Employers Day» kuni JIDU talabalari va bitiruvchilarining mehnat bozoriga chiqish jarayonini qo‘llab-quvvatlashga qaratildi. Ushbu kunning asosiy maqsadi O‘zbekiston va mintaqada faoliyat yuritayotgan yetakchi kompaniyalar vakillarini kampusga jamlab, ularning kadrlar siyosati, stajirovka dasturlari hamda yosh mutaxassislarga qo‘yiladigan amaliy talablarni talabalar bilan bevosita muloqot orqali tanishtirishdan iborat bo‘ldi.

Tadbirni JIDU Raqamli transformatsiya va iqtisodiy masalalar bo‘yicha prorektor Muzaffar Djalalov karyera haftaligining ochilishi va universitetning ish beruvchilar bilan strategik hamkorligi haqida so‘zlab ochib berdi. Tadbir doirasida JIDU “Bitiruvchilar bilan ishlash va kasbiy rivojlanish sektori” Bosh mutaxassisi Zebiniso Maxmudova ish beruvchilar va hamkor tashkilotlar oldida sektor faoliyati, stajirovka dasturlarini muvofiqlashtirish, bitiruvchilarning bandligini monitoring qilish hamda JIDU bitiruvchilari tarmog‘i bilan ishlash mexanizmlariga bag‘ishlangan taqdimot bilan ishtirok etdi.

HR & Employers Day dasturi doirasida O‘zbekiston mehnat bozorining turli segmentlarini ifodalovchi yetakchi kompaniyalar vakillari so‘zga chiqdi. Avvalambor, Yuliya Yakovleva, O‘zbekiston Ish beruvchilar assotsiatsiyasi vakili va Person Hunters kompaniyasi direktori va asoschisi sifatida, O‘zbekistondagi ish beruvchilar pozitsiyasi, mehnat bozorining dolzarb tendensiyalari, kuchli nomzod profili va talabalarga zarur bo‘lgan kompetensiyalar haqida batafsil ma’lumot berdi. Keyingi chiqishlarda Wildberries Uzbekistan bosh direktor o‘rinbosari Saidakbarxon Mirzaev xalqaro e-commerce platformasining O‘zbekistondagi rivojlanishi va onlayn savdo sohasida karyera imkoniyatlarini yoritdi, ANTRIA GROUP sobiq HR direktori Viktoria Tokova shaxsiy brend va “biznes-netvorking”ning amaliy mexanizmlarini tushuntirdi, "Milliy banklararo protsessing markazi" AJ vakili Marina Gumina zamonaviy lider uchun zarur kompetensiyalarni ochib berdi. Shuningdek, KPMG Uzbekistan HR menejeri Daniya Pavlova, Beeline Uzbekistan Xodimlar bilan ishlash va tashkiliy rivojlantirish bo‘yicha direktori Sofiya Gaynutdinova, EY Uzbekistan Talent Team vakillari Irina Alimova va Anna Petina, Click kompaniyasining HR bo‘limi rahbari Elina Usmanova, Deloitte Uzbekistan HR rahbari Raxmonova Zulfiyaxon, Coca-Cola İçecek vakili Mohinur Robertson, “KapitalBank”  ATB HR direktori Yana Kim, shuningdek EPAM Systems Campus Hiring menedjeri Sarvarbek Jaloldinov va IT Park Uzbekistan HR biznes hamkori Xonzoda Turaxodjaeva o‘z kompaniyalaridagi stajirovka va boshlang‘ich lavozimlar, yosh mutaxassislarga qo‘yiladigan talablar, ichki o‘quv va rivojlanish dasturlari hamda talabalarga ochiq karyera yo‘nalishlari haqida atroflicha ma’lumot berib, talabalar bilan jonli savol-javob shaklida muloqot olib bordilar.

“HR & Employers Day” kuni davomida talabalar mehnat bozori vakillari bilan yuzma-yuz muloqot qilib, savollariga javob oldilar, shaxsiy karyera rejalari bo‘yicha tavsiyalar va professional fikr-mulohazalar bilan boyitildilar.

Career Fair – JIDU kampusida yirik ish yarmarkasi

Karyera haftaligining uchinchi va yakuniy — “Karyera kuni” mehnat yarmarkasi JIDU kampusida talabalar, bitiruvchilar va ish beruvchilarni bir maydonga jamlagan yirik uchrashuvga aylandi.

Karyera yarmarkasida quyidagi tashkilotlar ishtirok etdi: UZCARD, Akfa Group, KPMG Audit, Huawei, DanAds, Ernst & Young, Ucell, CLICK, Beeline Uzbekistan, Kapital Bank, PepsiCo (International Beverages Tashkent), IT Park, TBC Bank, EPAM, Alif, Texnomart LLC, Coca-Cola Icecek (CCI), JSCB “Tenge Bank”, Deloitte & Touche, PraeLegal, Vakhidov & Partners, UBI Consulting, Antria, UzAvto Motors, UzAvto Motors Powertrain, Insight Solutions.

Kun davomida talabalar va bitiruvchilar qisqa suhbat va intervyularda qatnashdilar, mavjud vakant lavozimlar va stajirovka dasturlari haqida bevosita ma’lumot oldilar. “Karyera kuni” talabalar uchun ilk professional aloqalarni o‘rnatish, ish beruvchilar bilan bevosita muloqot qilish va o‘z karyera yo‘lini aniqroq belgilab olishga xizmat qildi.

“UWED Career Fair 2025” JIDU talabalari va bitiruvchilari uchun ish beruvchilar bilan bevosita muloqot qiladigan mustahkam platformaga aylandi. JIDU “Bitiruvchilar bilan ishlash va kasbiy rivojlanish sektori” orqali yirik hamkor tashkilot va kompaniyalar bilan aloqalarni kuchaytirib, yoshlar bandligi va kasbiy o‘sishini izchil qo‘llab-quvvatlab boradi.