Joriy yilning 3-sentabr kuni Jahon iqtisodiyoti va diplomatiya universitetida “Barqaror rivojlanish, tibbiyot, geosiyosat” mavzusida xalqaro davra suhbati o‘tkazildi. Tadbir turli soha mutaxassislari o‘rtasidagi muloqot uchun nufuzli maydonga aylandi.

Davra suhbatida taniqli xalqaro arboblar, jumladan, Armaniston Respublikasining to‘rtinchi prezidenti Armen Sarkisyan va Singapur Milliy universiteti Xalqaro tibbiyot kengashi raisi, Favqulodda va muxtor elchi, professor Kishore Mahbubani ishtirok etdi. Muhokamaga davlat organlari va jamoat boshqaruvi vakillari, xalqaro tashkilotlar, O‘zbekistonda akkreditatsiyadan o‘tgan diplomatik korpus a’zolari, shuningdek, O‘zbekiston va xorijiy mamlakatlar ilmiy hamjamiyatining yetakchi olimlari hamda ekspertlari ham qo‘shildi.

Tadbirni O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev kirish so‘zi bilan ochdi. U bugungi kunning global muammolarini hal qilishda fanlararo yondashuvning ahamiyati tobora ortib borayotganini ta’kidladi. S.Safoyev barqaror rivojlanish, sog‘liqni saqlash va geosiyosiy dinamika masalalari bir-biri bilan chambarchas bog‘liq ekanligini va xalqaro ekspertlar hamjamiyatining birgalikdagi sa’y-harakatlarini talab qilishini alohida qayd etdi.

Davra suhbati ishtirokchilari global o‘zgarishlarning iqtisodiy, siyosiy va madaniy jihatlarini atroflicha muhokama qildilar. E’tibor markazida Osiyo mamlakatlarining ta’siri kuchayishi, jahon maydonidagi kuchlar muvozanatining o‘zgarishi va mavjud dunyo tartibiga bo‘lgan tahdidlar masalalari turdi. Mutaxassislar iqtisodiy va texnologik modellar o‘rtasidagi raqobat, qadriyatlarga yondashuvdagi farqlar, shuningdek, yangi tarixiy davr sharoitida Sharq va G‘arb o‘rtasidagi samarali muloqot va hamkorlik istiqbollarini tahlil qildilar.

Ushbu davra suhbatining JIDU doirasida o‘tkazilishi universitetning global kun tartibidagi eng dolzarb masalalarni chuqur va mazmunli muhokama qilish uchun yetakchi platforma sifatidagi mavqeini tasdiqladi. Tadbir fanlararo muloqotni mustahkamlashga va iqtisodiyot, siyosat hamda sog‘liqni saqlash chorrahasidagi murakkab muammolarni hal qilish bo‘yicha konstruktiv takliflarni ishlab chiqishga xizmat qildi.