2025-yil 17-iyun kuni O‘zbekiston Respublikasi Sport vazirligida “Vazirlik rahbariyati va xodimlarining 2025-yil uchun eksport prognoz ko‘rsatkichlarini ta'minlashdagi roli va mas’uliyati” mavzusida o‘quv mashg‘uloti bo‘lib o‘tdi.

  Tadbirda Sport vazirligining markaziy apparati xodimlari, hududiy boshqarmalar vakillari, shuningdek, Jahon iqtisodiyoti va diplomatiya universiteti (JIDU) hamda Investitsiyalar, sanoat va savdo vazirligi ekspertlari ishtirok etdi.

   Mazkur treningning asosiy maqsadi ishtirokchilarda eksport siyosati bo‘yicha nazariy va amaliy bilimlarni shakllantirish, turli davlat idoralarining, shu jumladan ijtimoiy sohaning eksport salohiyatini oshirishdagi imkoniyatlari haqida tushunchani kengaytirish, hamda asosli boshqaruv qarorlarini qabul qilish uchun zarur bo‘lgan kompetensiyalarni rivojlantirishdan iborat bo‘ldi.

  Tadbir doirasida soha siyosatini shakllantirishda ishtirok etayotgan shaxslarning iqtisodiy savodxonligini oshirish, shuningdek, idoralararo muloqotni kuchaytirish masalalariga alohida e’tibor qaratildi.

 JIDUning “Xalqaro iqtisodiyot” kafedrasi professori, iqtisodiyot fanlari doktori Sh.A.Sharifxo‘jayev mamlakatning tashqi savdo faoliyati tendensiyalariga oid tahliliy ma’ruzani taqdim etdi. U o‘z nutqida ijtimoiy infratuzilma, jumladan sport sohasini eksport xizmatlari strategiyasiga kiritish zarurligini ta’kidladi.

   Shuningdek, eksport salohiyatini oshirish bo‘yicha amaliy mexanizmlar – hamkorlik aloqalarini rivojlantirish, yangi eksport yo‘nalishlarini shakllantirish va xalqaro tajribani integratsiya qilish masalalari muhokama qilindi. Investitsiyalar, sanoat va savdo vazirligi vakillari joriy yilning dastlabki besh oyi yakunlariga ko‘ra eksport hajmi 18% ga oshgani to‘g‘risida dolzarb ma’lumotlar bilan o‘rtoqlashdilar. Ishtirokchilarning fikriga ko‘ra, bu o‘sish idoralararo uzviy siyosat va davlat boshqaruvi samaradorligini oshirish bo‘yicha sa’y-harakatlar natijasidir.

   Tadbirning interaktiv shakli ochiq muhokamalar o‘tkazishga xizmat qildi, ishtirokchilarga o‘zlariga qiziq bo‘lgan savollarni berish, professional izohlar va faoliyat yo‘nalishiga moslashtirilgan tavsiyalar olish imkonini yaratdi. Natijada, mazkur trening davlat idoralari kadrlar salohiyatini rivojlantirish va ularning strategik maqsadlarga erishishdagi rolini mustahkamlash bo‘yicha tizimli ishlarning muhim bo‘g‘iniga aylandi.

   Mazkur o‘quv mashg‘uloti barqaror rivojlanish yo‘lida va milliy ustuvor yo‘nalishlarni barcha boshqaruv darajalarida amalga oshirish bo‘yicha muhim qadam bo‘ldi. Shu bilan birga, u iqtisodiy siyosat sohasida davlat hokimiyati organlarining institutsional salohiyatini rivojlantirish uchun samarali platformaga aylandi. Tadbir davomida mutaxassislar orasida iqtisodiy tafakkurni shakllantirish, shuningdek, strategik rejalashtirish va idoralararo hamkorlik ko‘nikmalarini rivojlantirish zarurligiga alohida urg‘u berildi.