Joriy yilning 11-iyun kuni Jahon iqtisodiyoti va diplomatiya universitetida (JIDU) muhim uchrashuv bo‘lib o‘tdi. Unda Finlyandiya tashqi ishlar vaziri va YeXHT raisi Elina Valtonen boshchiligidagi delegatsiya universitetga tashrif buyurdi. Bu tashrif Finlyandiya va O‘zbekiston o‘rtasidagi ikki tomonlama munosabatlarni mustahkamlashda muhim qadam bo‘ldi.

Uchrashuvda ikki mamlakat o‘rtasidagi hamkorlikning asosiy jihatlari, jumladan, JIDU va Finlyandiyaning yetakchi oliy o‘quv yurtlari o‘rtasidagi akademik almashinuv istiqbollari muhokama etildi. Valtonen xonim diplomatik aloqalar va madaniy almashinuvni rivojlantirish uchun ta’lim dasturlari va qo‘shma tadqiqotlarning dolzarbligini ta’kidladi.

JIDU talabalari bilan uchrashuvga alohida e’tibor qaratildi. Unda Elina Valtonen Finlyandiyaning boshqa davlatlar bilan diplomatik munosabatlari haqidagi o‘z fikrlarini bayon etdi, shuningdek, mamlakat xavfsizligi masalalarini muhokama qildi. Talabalar o‘zlarini qiziqtirgan savollarni fin tilida berish imkoniyatiga ega bo‘ldilar. Vazir ularga mamnuniyat bilan javob berdi, bu esa faol muloqot va fikr almashishga turtki bo‘ldi.

Uchrashuv yakunida Elina Valtonen universitet rahbariyatiga samimiy qabul va bo‘lajak diplomatlar bilan tanishish imkoniyati uchun o‘z minnatdorchiligini izhor etdi. Ushbu tashrif nafaqat xalqaro aloqalarni mustahkamlashda muhim qadam bo‘ldi, balki talabalarni diplomatiya va xalqaro munosabatlarni yanada chuqurroq o‘rganishga ilhomlantirdi.