“The reading nook: give a book, take a book!” kitob almashinuvi loyihasi bo‘lib o‘tdi

2026-yil 9-noyabr kuni B binosining 3-qavati yo‘lagida Ingliz tili kafedrasi MEO seksiyasi o‘qituvchilari tashabbusi bilan talabalarning kitobxonlik madaniyatini rivojlantirish, mutolaa qilishga bo‘lgan qiziqishini oshirish hamda bilim almashish muhitini shakllantirish maqsadida “The Reading Nook: Give a Book, Take a Book!” nomli kitob almashinuvi loyihasining tantanali ochilish marosimi tashkil etildi.

Mazkur loyiha Birlashgan Millatlar Tashkilotining Barqaror rivojlanish maqsadlari (SDGs) doirasidagi 4-maqsad – Sifatli ta’lim, xususan, 4.6-bandida belgilangan barcha yoshlar va kattalarning savodxonlik ko‘nikmalarini rivojlantirish vazifalariga hamohang ravishda tashkil etildi.

Loyihaning asosiy maqsadi talabalar o‘rtasida kitobxonlikni ommalashtirish, o‘qilgan kitoblarni o‘zaro almashish orqali mutolaa imkoniyatlarini kengaytirish, mustaqil ta’lim olish va bilim almashish madaniyatini rivojlantirishdan iborat.

Tadbir davomida ishtirokchilarga “The Reading Nook” kitob almashinuvi burchagining faoliyat tamoyillari tushuntirildi. Loyiha quyidagi uchta asosiy tamoyil asosida yo‘lga qo‘yildi:

• Kitob olib kelish: talabalar o‘zlari mutolaa qilgan va boshqalarga ham tavsiya etishni istagan kitoblarini umumiy javonga joylashtiradilar.

• Kitob olish: har bir talaba javonda mavjud bo‘lgan kitoblardan birini tanlab, mutolaa qilish uchun olishi mumkin.

• Kitobni qaytarish yoki boshqalarga topshirish: kitob o‘qib bo‘lingach, uni javonga qaytarish yoki boshqa kitobxonga topshirish orqali kitob almashinuvi davom ettiriladi.

Yangi tashkil etilgan kitob almashinuvi burchagi talabalar uchun qulay va ochiq mutolaa maskani bo‘lib xizmat qiladi. Ushbu tashabbus orqali talabalar turli mavzulardagi adabiyotlar bilan tanishish, yangi bilim va dunyoqarashga ega bo‘lish hamda kitobxonlar hamjamiyatining faol ishtirokchisiga aylanish imkoniyatiga ega bo‘ladilar.

Xulosa qilib aytganda, “The Reading Nook” loyihasi universitetda kitobxonlik muhitini rivojlantirish, savodxonlikni oshirish, o‘zaro bilim almashish va mustaqil ta’lim olishni rag‘batlantirishga qaratilgan muhim tashabbus hisoblanadi. Mazkur loyiha SDG 4.6 maqsadiga erishishga hissa qo‘shish bilan birga, talabalarda mutolaa madaniyati va umrbod ta’lim olishga bo‘lgan intilishni shakllantirishga xizmat qiladi.