JIDU va Konrad Adenauer jamg‘armasi o‘rtasida strategik hamkorlik istiqbollari muhokama qilindi

2026-yil 7-iyul kuni Jahon iqtisodiyoti va diplomatiya universitetida (JIDU) Germaniyaning Konrad Adenauer jamg‘armasi Bosh kotibi doktor Mark Shpayx boshchiligidagi delegatsiya bilan uchrashuv bo‘lib o‘tdi.

Muloqot davomida O‘zbekistonda amalga oshirilayotgan keng ko‘lamli islohotlar, parlament va mahalliy o‘zini o‘zi boshqarish organlarining roli tobora ortib borayotgani alohida ta’kidlandi. Shu nuqtayi nazardan, ijtimoiy yo‘naltirilgan bozor iqtisodiyotini shakllantirish bo‘yicha Germaniya tajribasini o‘rganish, shuningdek, davlat boshqaruvi, byudjet jarayoni, davlat siyosati va strategik rejalashtirish yo‘nalishlarida zamonaviy kompetensiyalarga ega davlat xizmatchilari, parlament a’zolari hamda rahbar kadrlarni tayyorlash borasida Konrad Adenauer jamg‘armasi bilan hamkorlikni rivojlantirishga o‘zaro qiziqish bildirildi.

Hamkorlikning dastlabki amaliy qadami sifatida JIDUda Lyudvig Erxard merosi hamda ijtimoiy bozor iqtisodiyoti konsepsiyasining zamonaviy rivojlanishiga bag‘ishlangan ilmiy seminar tashkil etishga kelishib olindi.

Shuningdek, tomonlar Yevropa parlamenti, Yevropa komissiyasi va Yevropaning yetakchi universitetlari bilan hamkorlikni kengaytirish istiqbollarini muhokama qildilar. Uchrashuv davomida dolzarb xalqaro va mintaqaviy masalalarga bag‘ishlangan konferensiyalarni birgalikda tashkil etish, shuningdek, qo‘shma ilmiy-tahliliy nashrlar tayyorlash yuzasidan ham kelishuvga erishildi.

Uchrashuv yakunida JIDU va Konrad Adenauer jamg‘armasi o‘rtasidagi uzoq muddatli hamkorlikni tizimli ravishda rivojlantirish maqsadida Strategik sheriklik bo‘yicha qo‘shma “Yo‘l xaritasi” ni ishlab chiqishga kelishib olindi. Mazkur hujjatda ijroiya ta’limini rivojlantirish, yosh rahbarlar va davlat xizmatchilarini tayyorlash, mintaqaviy integratsiya, barqaror rivojlanish hamda davlat boshqaruvi sohalarida qo‘shma tadqiqotlar olib borish, xalqaro konferensiyalar, davra suhbatlari va ekspert forumlarini tashkil etish, shuningdek, O‘zbekiston, Germaniya va Yevropa Ittifoqi o‘rtasidagi akademik almashinuvlarni kengaytirish ustuvor yo‘nalishlar sifatida belgilandi.

Mazkur uchrashuv JIDU va Konrad Adenauer jamg‘armasi o‘rtasidagi hamkorlikni yangi bosqichga olib chiqish hamda ta’lim, ilm-fan va davlat boshqaruvi yo‘nalishlarida xalqaro sheriklikni yanada mustahkamlash yo‘lida muhim qadam bo‘ldi.