JIDU rektori Lund universiteti bilan strategik ilmiy va akademik hamkorlikka start berdi

O‘zbekiston Respublikasi Oliy Majlisi Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyev JIDU va Lund universiteti o‘rtasida ilmiy tadqiqotlar va akademik rivojlanish sohasida strategik sheriklik yo‘lga qo‘yilganini rasman e’lon qildi. Mazkur yuqori darajadagi tadbir Lund universiteti binosida bo‘lib o‘tdi.

Tashabbusning ochilish marosimida O‘zbekiston Respublikasining Shvetsiya, Norvegiya va Daniya qirolliklaridagi Favqulodda va muxtor elchisi Rahmatulla Nurimbetov, Shvetsiyaning O‘zbekistondagi elchisi Ingrid Tersman (2016-2021) hamda O‘zbekiston va Shvetsiyaning taniqli olimlari, tadqiqotchilari va akademik doiralari rahbarlari ishtirok etdilar.

Tadbirni ochar ekan, S.Safoyev bilimga asoslangan taraqqiyotni qo‘llab-quvvatlash, ilmiy-tadqiqot salohiyatini mustahkamlash hamda global jarayonlarga jalb etilgan olim va mutaxassislarning yangi avlodini tayyorlashda xalqaro akademik hamkorlikning ahamiyati ortib borayotganini ta’kidladi. U universitetlarning xalqaro muloqot, innovatsiyalar va siyosiy ahamiyatga molik tadqiqotlar uchun platforma sifatidagi rolini alohida qayd etdi.

Ushbu hamkorlik JIDU va Yevropaning yetakchi tadqiqot universitetlaridan biri o‘rtasidagi uzoq muddatli hamkorlik uchun keng qamrovli zamin yaratadi. U ilmiy tadqiqotlar sifatini oshirish, doktorantlarni tayyorlash jarayonini takomillashtirish, xalqaro akademik tarmoqlarni rivojlantirish va grantlar olish bo‘yicha hamkorlikni yo‘lga qo‘yish, shuningdek, O‘zbekiston va Shvetsiya o‘rtasidagi ta’limiy va ilmiy almashinuvlarni kengaytirishga xizmat qiladi.

Hamkorlik quyidagilarni o‘z ichiga oladi:

• Qo‘shma xalqaro tadqiqot loyihalari va nashrlar;

• Grantlar uchun qo‘shma arizalar tayyorlash;

• Xalqaro anjumanlar va ilmiy seminarlar;

• Doktorantlar va yosh tadqiqotchilar uchun qishki va yozgi maktablar;

• Ilmiy faoliyatni boshqarish, nashr strategiyalari va grant arizalarini yozish bo‘yicha o‘quv dasturlari;

• Shimoliy Yevropa va Markaziy Osiyo o‘rtasidagi akademik hamkorlik tarmoqlarini kengaytirish.

Hamkorlikning yo‘lga qo‘yilishiga bag‘ishlangan “Markaziy Osiyoda bilimga asoslangan taraqqiyot va akademik hamkorlik” nomli anjumanda rektor Sodiq Safoyev, elchi Rahmatulla Nurimbetov, professor Hokan Hyuden, professor Patrik Olsson, professor Rustamjon O‘rinboyev va professor Timur Dadaboyev asosiy ma’ruzalar bilan chiqish qildi. Shuningdek, Markaziy Osiyo va Shimoliy Yevropa o‘rtasidagi akademik hamkorlikning istiqboldagi yo‘nalishlari yuzasidan muhokamalar bo‘lib o‘tdi.

Hamkorlikning amaliy ijrosini JIDUning ilmiy ishlar va innovatsiyalar bo‘yicha prorektori, professor Timur Dadaboyev hamda Lund universiteti professori Rustamjon O‘rinboyev muvofiqlashtiradi. Ular qo‘shma tadqiqot, ta’lim va tarmoq faoliyatining rivojlanishini nazorat qilib boradilar.

JIDU va Lund universiteti o‘rtasidagi strategik hamkorlik Markaziy Osiyo, Shimoliy Yevropa va boshqa mintaqalar tadqiqotchilari, doktorantlari hamda siyosiy doiralar vakillarini birlashtiruvchi yetakchi platformaga aylanishi kutilmoqda. Bu O‘zbekistonda oliy ta’lim va ilm-fanning xalqarolashuviga, shuningdek, O‘zbekiston va Skandinaviya mintaqasi o‘rtasidagi akademik aloqalarning mustahkamlanishiga hissa qo‘shadi.