Joriy yilning 30-aprel kuni universitetning Yoshlar masalalari va ma’naviy-ma’rifiy ishlar bo‘yicha birinchi prorektori O. Yusupdjanov Talabalar turar joyida (TTJ) istiqomat qilayotgan talaba-yoshlar bilan yuzma-yuz muloqot o‘tkazdi.

Prezidentimiz tomonidan ilgari surilayotgan “Inson qadri uchun” tamoyili asosida tashkil etilgan ushbu uchrashuvdan ko‘zlangan asosiy maqsad — talabalarning yashash sharoitlarini yanada yaxshilash, ularning bo‘sh vaqtlarini mazmunli tashkil etish va mavjud masalalarga joyida yechim topishdan iborat.

Samimiy va ochiq ruhda o‘tgan uchrashuvda birinchi prorektor bugungi kunda oliy ta’lim tizimidagi islohotlar, xususan, talabalarning ijtimoiy himoyasini kuchaytirish borasidagi yangiliklarga to‘xtalib o‘tdi.

Uchrashuv davomida quyidagi masalalar atroflicha muhokama qilindi:

Maishiy sharoitlar: TTJdagi xonalarning holati, isitish va suv tizimi hamda oshxonalarning jihozlanishi;

Raqamlashtirish: Talabalar turar joyida yuqori tezlikdagi Wi-Fi hududlarini kengaytirish va AKT xonalaridan unumli foydalanish;

Ma’naviy muhit: “Besh muhim tashabbus” doirasida to‘garaklar faoliyatini jonlantirish va kutubxona fondini boyitish.

Muloqot davomida talabalar nafaqat muammolarni bayon etishdi, balki TTJ hayotini yaxshilashga qaratilgan qator kreativ takliflarni ham o‘rtaga tashlashdi. Jumladan, talabalar o‘rtasida sport musobaqalari va intellektual o‘yinlarni ko‘paytirish, shuningdek, TTJ hududida kichik "Co-working" markazlarini tashkil etish masalalari ko‘rib chiqildi.

“Bizning asosiy vazifamiz — sizning sifatli ta’lim olishingiz va munosib sharoitda yashashingizni ta’minlash. Har bir taklifingiz universitet rahbariyati tomonidan alohida nazoratga olinadi,” — deya ta’kidladi O. Yusupdjanov.

Uchrashuv yakunida bildirilgan taklif va shikoyatlar yuzasidan mas’ullarga aniq vazifalar yuklatildi. Bu kabi muloqotlar universitetda "Ustoz-shogird" an’analarini mustahkamlashga va talabalarning ijtimoiy faolligini oshirishga xizmat qiladi.