JIDU “Kelajak: bilimli qizlar jamiyati” forumida qizlarni fan va STEM yoʻnalishlarini tanlashga undadi

2025-yil 11-fevral kuni — Fanda ayollar va qizlarning xalqaro kunida Toshkent shahrida “Kelajak: bilimli qizlar jamiyati” respublika forumi boʻlib oʻtdi. Forum Oʻzbekiston Respublikasi Yoshlar ishlari agentligi tomonidan “Qizlar akademiyasi” loyihasi doirasida tashkil etildi. Unda yosh xotin-qizlar, maktab va litsey oʻquvchilari, talabalar hamda fan va taʼlim sohasida muvaffaqiyatga erishgan ayollar ishtirok etdi. Forumdan koʻzlangan maqsad — koʻproq qizlarni ayollar hali ham kam ishtirok etayotgan fan, texnologiya, matematika va ilmiy tadqiqot sohalarida kasb tanlashga ilhomlantirishdan iborat.

Forumda JIDU nomidan Tizimli tahlil va matematik modellashtirish kafedrasi oʻqituvchisi, jahon iqtisodiyoti yoʻnalishi boʻyicha doktorant Dilafruz Sodiqova ishtirok etdi. U ishtirokchilarga matematika, maʼlumotlar tahlili va iqtisodiy tadqiqotlar sohasiga kirib kelgan oʻz yoʻli haqida soʻzlab berdi. Dilafruz Sodiqova muvaffaqiyatga erishishida muhim boʻlgan asosiy qadamlar bilan oʻrtoqlashdi hamda miqdoriy va texnik yoʻnalishlarda tahsil olish va kasbiy faoliyat yuritishni rejalashtirayotgan qizlarga amaliy maslahatlar berdi. Shuningdek, u JIDUning xalqaro iqtisodiyot, maʼlumotlar tahlili va matematik modellashtirish kabi yoʻnalishlardagi taʼlim dasturlarini tanishtirib, qizlarni universitetga hujjat topshirishga chorladi.

Fan va taʼlim rivojiga qoʻshgan hissasi hamda “Pro Study” taʼlimiy blogi orqali yoshlarni ilhomlantirib kelayotgani uchun Dilafruz Sodiqova Yoshlar ishlari agentligi direktori A. Saʼdullayev tomonidan Minnatdorchilik yorligʻi bilan taqdirlandi.

JIDU fanda xotin-qizlar ishtirokini oshirishga qaratilgan milliy saʼy-harakatlarni qoʻllab-quvvatlaydi. Universitet oʻrnak boʻla oladigan oʻqituvchilari orqali koʻproq yosh ayollarni matematika, iqtisodiyot, maʼlumotlar tahlili va ular kam ishtirok etayotgan boshqa yoʻnalishlardagi dasturlarga hujjat topshirishga undaydi. Ushbu tashabbus BRM 4 “Sifatli taʼlim”, BRM 5 “Gender tengligi” va BRM 17 “Maqsadlar yoʻlidagi hamkorlik”ka hissa qoʻshadi.