Jahon iqtisodiyoti va diplomatiya universiteti Xalqaro munosabatlar fakulteti 2-bosqich talabalari nemis tili o‘qituvchisi Umeda Istatovna Sultanova rahbarligida Qurbonov nomidagi Respublika bolalar psixonevrologiya dispanseriga xayriya missiyasi bilan tashrif buyurdi.

Dispanserda talabalar mehr va qalb qo‘rini talab qiladigan o‘ziga xos muhitga duch keldi. Yoshlar kichik bemorlar bilan bevosita suhbatlashib, ularning ehtiyojlari va kundalik qiyinchiliklari haqida bilib olish imkoniga ega bo‘ldi. Mehmonlar e’tibor va qo‘llab-quvvatlash belgisi sifatida bolalarga ijobiy his-tuyg‘ular, tabassum va bayramona kayfiyat ulashish maqsadida oldindan tayyorlangan kichik, ammo samimiy sovg‘alarni topshirdi.

Kasbiy faoliyati global kun tartibi bilan chambarchas bog‘liq bo‘lajak diplomatlar uchun bu tashrif BMTning Barqaror rivojlanish maqsadlarini (BRM) amalga oshirish bo‘yicha ko‘rgazmali amaliy dars bo‘ldi. Ushbu tadbir sog‘lom turmush tarzini ta’minlash va barcha yoshdagilarning farovonligini qo‘llab-quvvatlashga qaratilgan “Yaxshi salomatlik va farovonlik” nomli 3-BRM hamda aholining ijtimoiy himoyaga muhtoj qatlamlari huquq va imkoniyatlarini kengaytirishni ko‘zda tutuvchi “Tengsizlikni qisqartirish” nomli 10-BRM doirasida alohida ahamiyat kasb etadi.

Mazkur tashrif talabalarda XXI asr diplomatiga xos bo‘lgan insonparvarlik, hamdardlik, ijtimoiy mas’uliyat va inklyuziv tafakkur kabi muhim kompetensiyalarni shakllantirishga yordam berdi. Jahon iqtisodiyoti va diplomatiya universiteti haqiqiy diplomatiya mehrli yurak va yaqinlariga yordam berishga tayyorlikdan boshlanishini isbotlagan holda, ta’lim jarayoniga barqaror rivojlanish tamoyillarini tatbiq etishda davom etmoqda.