Joriy yilning 17-mart kuni Jahon iqtisodiyoti va diplomatiya universiteti Yuridik klinikasi sud zalida Toshkent shahar Jinoyat ishlari bo‘yicha Mirzo Ulug‘bek tumani sudining sayyor sud majlisi bo‘lib o‘tdi. Ushbu sayyor sud majlisida jinoyat ishlari bo‘yicha tuman sudyasi B.B. Berdiyev, tergov sudyasi S.R. Ho‘jamqulova hamda Mirzo Ulug‘bek tuman prokurori yordamchisi M.A. Abduvohidov ishtirok etishdi. JIDU Yoshlar masalalari va maʼnaviy-maʼrifiy ishlar boʻyicha birinchi prorektori Yusupdjanov O.A. kirish so‘zi bilan tadbirning mazmun mohiyati yuzasidan fikr bildirdilar. Mazkur sud majlisi yoshlar o‘rtasida huquqiy madaniyatni yuksaltirish hamda giyohvandlik vositalarining noqonuniy muomalasi bilan bog‘liq jinoyatlarning oldini olish maqsadida tashkil etildi.

Universitet professor-o‘qituvchilari hamda talabalarining faol ishtirokida tashkil etilgan mazkur sayyor sud majlisi yosh avlodni huquqiy jihatdan tarbiyalash, ularning sud-huquq tizimi faoliyati to‘g‘risidagi bilim va tasavvurlarini kengaytirishda muhim amaliy ahamiyat kasb etdi. Xususan, ushbu tadbir orqali talabalar sud organlarining institutsional tuzilmasi, sud muhokamasining protsessual bosqichlari, dalillarni baholash mezonlari hamda jinoyat ishlarini ko‘rib chiqishning o‘ziga xos jihatlari bilan bevosita tanishish imkoniyatiga ega bo‘ldilar. Bu esa nazariy bilimlarni amaliyot bilan uyg‘unlashtirishda samarali pedagogik vosita sifatida namoyon bo‘ldi hamda Birlashgan Millatlar Tashkilotining Barqaror rivojlanish maqsadlari doirasida, xususan, 4-maqsad — “Sifatli ta’lim” (BRM – 4) ni ta’minlashga xizmat qiladi.

Sud jarayoni davomida giyohvandlik vositalari va psixotrop moddalarining noqonuniy muomalasi bilan bog‘liq jinoyatlarning ijtimoiy-huquqiy mohiyati, ularning kelib chiqish sabablari hamda jamiyat uchun keltirib chiqaradigan salbiy oqibatlari atroflicha tahlil qilindi. Jumladan, mazkur turdagi jinoyatlarning yoshlar orasida kengayishiga olib kelayotgan omillar, ularning oldini olish mexanizmlari va profilaktika choralarining samaradorligi muhokama markazida bo‘ldi. Bu jihatlar o‘z navbatida sog‘lom turmush tarzini shakllantirish, zararli odatlarning oldini olish va aholining farovonligini oshirishga qaratilgan 3-maqsad — “Sog‘liqni saqlash va farovonlik” (BRM - 3) bilan uzviy bog‘liqdir.

Sud majlisiga raislik qiluvchi sudya va tergov sudyasi tomonidan jinoyat hamda ma’muriy qonunchilik normalarini qo‘llash amaliyoti yuzasidan tizimli va asoslantirilgan tushuntirishlar berildi. Ayniqsa, yoshlar o‘rtasida giyohvandlik vositalarining noqonuniy muomalasiga qarshi kurashish borasida amaldagi qonunchilikning mazmun-mohiyati, javobgarlik choralarining turlari va ularni qo‘llashdagi huquqni qo‘llash amaliyotining dolzarb jihatlari batafsil yoritildi. Mazkur yondashuv huquqiy ong va huquqiy madaniyatni yuksaltirish orqali jamiyatda qonun ustuvorligini ta’minlashga xizmat qilib, 16-maqsad — “Tinchlik, adolat va samarali institutlar” (BRM - 16) ga erishishda muhim o‘rin tutadi.

Shu bilan birga, sayyor sud majlisi formatida o‘tkazilgan bunday tadbirlar yoshlarning huquqiy ongini yuksaltirish, ularda qonunlarga hurmat ruhini shakllantirish hamda huquqbuzarliklarning oldini olishga qaratilgan huquqiy madaniyatni rivojlantirishda muhim vosita sifatida e’tirof etiladi. Talabalarning sud jarayonida bevosita ishtirok etishi ularning nafaqat nazariy bilimlarini mustahkamlash, balki amaliy ko‘nikmalarini rivojlantirish, mustaqil fikrlash va huquqiy pozitsiyasini asoslash qobiliyatini shakllantirishga xizmat qiladi. Bu esa o‘z navbatida ta’lim muassasalari va davlat organlari o‘rtasidagi hamkorlikni kuchaytirib, 17-maqsad — “Maqsadlar yo‘lida hamkorlik” (BRM - 17) ni amalga oshirishga ham hissa qo‘shadi.

Umuman olganda, mazkur sayyor sud majlisi yoshlarni har tomonlama barkamol etib tarbiyalash, ularning jamiyat va davlat oldidagi mas’uliyat hissini kuchaytirish, shuningdek qonuniylik, adolat va huquq-tartibot tamoyillarini mustahkamlashga qaratilgan kompleks ta’limiy-huquqiy mexanizm sifatida alohida ahamiyat kasb etadi hamda Barqaror rivojlanish maqsadlarini milliy darajada amalga oshirishga xizmat qiluvchi samarali institutsional amaliyot sifatida baholanishi mumkin.

Tadbir yakunida Universitet birinchi prorektori O.A. Yusupjanov, yuridik klinika rahbari Z.Ubaydullayev, o‘qituvchi D.Soliyevlar tomonidan sayyor sud majlisini tashkil etishda amaliy yordam bergan JIB Mirzo-Ulug‘bek tuman sudiga alohida minnatdorchilik bildirilib, kelgusida ushbu hamkorlikni davom ettirish zarurligi ta’kidlab o‘tildi.