Joriy yil 15-noyabr kuni “Xalqaro huquq” fakulteti talabalari uchun “Koordinatorlik soati” doirasida “Korrupsiya — taraqqiyot kushandasi” mavzusida ma’rifiy suhbat tashkil etildi. Tadbirning asosiy maqsadi — talabalarda korrupsiyaga nisbatan ongli va tanqidiy yondashuvni shakllantirish, uning jamiyat taraqqiyotiga ko‘rsatadigan salbiy ta’sirini chuqur anglash, shuningdek, halollik va mas’uliyat tamoyillarini yanada mustahkamlashdan iborat bo‘ldi.

Suhbat davomida kurs koordinatorlari tomonidan korrupsiyaning kelib chiqishi, uning yuzaga kelishiga sabab bo‘ladigan omillar, davlat boshqaruvi va jamiyat hayotiga keltiradigan zararli oqibatlar haqida batafsil ma’lumot berildi. Xususan, korrupsiyaning iqtisodiy barqarorlikka putur yetkazishi, islohotlar samaradorligini pasaytirishi hamda adolat va ishonch muhitiga salbiy ta’siri alohida ta’kidlandi. Shuningdek, mamlakatimizda korrupsiyaga qarshi kurash bo‘yicha amalga oshirilayotgan tizimli islohotlar, huquqiy asoslar va profilaktik mexanizmlar talabalarga tushunarli tarzda tushuntirildi.

Tadbirning amaliy qismi davomida talabalar tomonidan mavzu yuzasidan taqdimotlar, ma’lumotli chiqishlar hamda videoroliklar taqdim etildi. Ularda korrupsiyaning turli ko‘rinishlari, uning yoshlar hayoti va jamiyat taraqqiyotiga ta’siri talabalarning o‘z qarashlari asosida yoritib berildi. Muhokama jarayonida esa halollik, qonuniylik, shaxsiy mas’uliyat va fuqarolik pozitsiyasining ahamiyati yuzasidan fikr almashinuvi tashkil etildi.

Mazkur ma’rifiy uchrashuv talabalarda korrupsiyaga nisbatan murosasiz munosabatni shakllantirish, huquqiy madaniyatni rivojlantirish hamda fuqarolik mas’uliyatini oshirishga xizmat qildi. Fakultetda bunday tadbirlarning muntazam tashkil etilib borilishi yoshlarning huquqiy ongini mustahkamlashda muhim omil bo‘lib qolmoqda.