2026-yil 22–30-oktabr kunlari Jahon iqtisodiyoti va diplomatiya universitetida Koreys yozuvi kuni (Hangil) munosabati bilan koreys tili va madaniyatini keng targ‘ib etishga qaratilgan qator madaniy-ma’rifiy tadbirlar tashkil etildi. Tadbirlar tashkilotchisi Jahon iqtisodiyoti va diplomatiya universitetining Sharq tillari kafedrasi bo‘ldi. Tadbirlarning asosiy maqsadi talabalarning koreys tilini o‘rganishga bo‘lgan qiziqishini oshirish, ularni koreys yozuvining o‘ziga xos xususiyatlari, milliy an’analari va madaniy merosi bilan yaqindan tanishtirish, shuningdek, interaktiv tanlovlar va qiziqarli o‘yinlar orqali madaniyatlararo muloqot ko‘nikmalarini rivojlantirishdan iborat bo‘ldi. Tadbirlarda universitetning 2–3-bosqich talabalari faol ishtirok etib, o‘zlarining til bo‘yicha bilimlari, ijodiy qobiliyatlari, topqirligi hamda jamoada ishlash ko‘nikmalarini namoyon etish imkoniyatiga ega bo‘ldilar. Dastur doirasida kafedra o‘qituvchilari tomonidan turli interaktiv va intellektual tanlovlar tashkil etildi. Dilnoza Nasullayeva tomonidan pantomima tanlovi o‘tkazilib, unda talabalar koreys tilidagi so‘z va iboralarni imo-ishoralar hamda harakatlar orqali tushuntirdilar. Mazkur mashg‘ulot ishtirokchilarning muloqot ko‘nikmalari va obrazli fikrlash qobiliyatini rivojlantirishga xizmat qildi. Olmos Niyozova bo‘g‘inlardan so‘z tuzish bo‘yicha tanlov tashkil etib, talabalarning lug‘at boyligini kengaytirish, til sezgirligi va tezkor fikrlash ko‘nikmalarini rivojlantirishga e’tibor qaratdi. Anastasiya Tsoy tomonidan savol-javob shaklidagi intellektual viktorina o‘tkazildi. Ushbu tanlov talabalarga koreys tili, Koreya tarixi va madaniyatiga oid bilimlarini sinovdan o‘tkazish hamda yanada boyitish imkonini berdi. Guzal Nurmatova talabalarni koreys xalqining an’anaviy milliy o‘yinlari bilan tanishtirdi. Mazkur o‘yinlar jamoaviy hamkorlikni mustahkamlash, ishtirokchilar o‘rtasida faol muloqotni rivojlantirish va madaniy tajriba almashish uchun qulay muhit yaratdi. Tadbirlar davomida talabalar yuqori faollik va qiziqish namoyon etib, topshiriqlarni bajarishda ijodiy yondashdilar hamda koreys tili bo‘yicha egallagan bilimlarini amaliyotda qo‘llash imkoniyatiga ega bo‘ldilar. Bunday madaniy-ma’rifiy tadbirlar talabalarning dunyoqarashini kengaytirish, madaniyatlararo muloqotni mustahkamlash, xorijiy tillarni o‘rganishga bo‘lgan qiziqishni oshirish hamda yoshlarni boshqa xalqlarning boy madaniy merosi bilan yaqindan tanishtirishga xizmat qiladi.
2026-yil 31-oktabr kuni Jahon iqtisodiyoti va diplomatiya universiteti (JIDU) Xalqaro munosabatlar va Xalqaro huquq fakultetlari talabalari ingliz tili kafedrasi o‘qituvchisi Nargiza Voxidova hamrohligida “India Up Close: Threads of the Silk Road”nomli madaniyat festivalida ishtirok etdilar. Tadbir Hindistonning Toshkent shahridagi elchixonasi tomonidan tashkil etilib, Hindiston madaniyati va an’analarining boyligi hamda rang-barangligini namoyish etishga qaratildi. Festival doirasida Hindistonning madaniy merosini aks ettiruvchi turli madaniy chiqishlar va interaktiv mashg‘ulotlar tashkil etildi. Dasturdan tabla jo‘rligida ijro etilgan an’anaviy hind raqslari, yoga va meditatsiya mashg‘ulotlari, mehendi va rangoli bo‘yicha mahorat darslari, shuningdek, hind modasi va milliy taomlari namoyishlari o‘rin oldi. Tashrif buyuruvchilar mashhur Bollivud qo‘shiqlari, raqs chiqishlari hamda turli an’anaviy hind taomlaridan ham bahramand bo‘ldilar. Bayramona muhit, rang-barang chiqishlar va madaniy jarayonlarda bevosita ishtirok etish imkoniyati festivalni talabalar uchun ayniqsa mazmunli va qiziqarli tajribaga aylantirdi. Musiqa, raqs, san’at va milliy taomlar orqali ular Hindistonning madaniy an’analari hamda zamonaviy madaniy hayoti bilan yaqindan tanishish imkoniga ega bo‘ldilar. Bunday xalqaro madaniy tadbirlarda ishtirok etish talabalarning dunyoqarashini kengaytirish, madaniyatlararo anglashuvni rivojlantirish va madaniy xilma-xillikka hurmat ruhini shakllantirishda muhim ahamiyat kasb etadi. Xalqaro munosabatlar va huquq sohasining bo‘lajak mutaxassislari uchun turli madaniy an’analar bilan bevosita tanishish xalqaro hamkorlik va diplomatiyaning madaniy jihatlarini chuqurroq anglashga ham xizmat qiladi. Mazkur festival xalqlar o‘rtasidagi do‘stlik va o‘zaro anglashuvni mustahkamlashda madaniy diplomatiya hamda ta’lim sohasidagi almashinuvlarning muhim o‘rnini yana bir bor namoyon etdi.
2026-yil 31-oktabr kuni Jahon iqtisodiyoti va diplomatiya universiteti Xalqaro huquq va ommaviy huquq fanlari kafedrasi katta o‘qituvchilari M.Ibragimova va D.Soliyevlar tashabbusi bilan “Moliya va soliq huquqi” fani doirasida “Markaziy bankning moliyaviy nazorat sohasidagi vakolatlarini huquqiy tartibga solish” mavzusida mahorat darsi tashkil etildi. Amaliy nashg‘ulotda O‘zbekiston Respublikasi Markaziy banki Yuridik departament boshqarma boshlig‘i Kobulov Baxtiyor Odiljon o‘g‘li ishtirok etib, talabalarga Markaziy bankning moliyaviy nazorat sohasidagi vakolatlari, bank tizimini davlat tomonidan tartibga solish mexanizmlari hamda ushbu sohadagi milliy qonunchilikning o‘ziga xos xususiyatlari yuzasidan ma’lumot berdi. Mazkur mahorat darsi davomida O‘zbekiston Respublikasi Markaziy bankining huquqiy maqomi, banklar faoliyati ustidan nazoratni amalga oshirish tartibi, prudensial normativlar, moliyaviy barqarorlikni ta’minlash mexanizmlari hamda bank qonunchiligi talablarini buzganlik uchun qo‘llaniladigan huquqiy ta’sir choralari muhokama qilindi. Shuningdek, O‘zbekiston Respublikasining “O‘zbekiston Respublikasining Markaziy banki to‘g‘risida”gi va “Banklar va bank faoliyati to‘g‘risida”gi qonunlari asosida Markaziy bankning nazorat funksiyalari va ularni amalga oshirishning huquqiy mexanizmlariga alohida e’tibor qaratildi. Bank tizimining barqarorligi va shaffofligini ta’minlash iqtisodiy o‘sish hamda moliyaviy xizmatlardan foydalanish imkoniyatlarini kengaytirishning muhim sharti sifatida 8-maqsad — “Munosib mehnat va iqtisodiy o‘sish” (BRM – 8) bilan uzviy bog‘liqdir. Mashg‘ulotning muhim jihati nazariy bilimlarni amaliy faoliyat bilan bog‘lash, talabalarda moliyaviy-huquqiy munosabatlarni tahlil qilish, normativ-huquqiy hujjatlarni sharhlash hamda huquqiy muammolarga mustaqil yondashish ko‘nikmalarini shakllantirishga qaratilganligi bilan belgilanadi. Amaliyotchi mutaxassisning bevosita ishtiroki talabalarga huquqni qo‘llash amaliyotining dolzarb masalalari bilan yaqindan tanishish imkonini berdi. Bu esa sifatli va amaliyotga yo‘naltirilgan ta’limni ta’minlash orqali 4-maqsad — “Sifatli ta’lim” (BRM – 4) ga erishishga xizmat qiladi. Moliyaviy nazorat institutlarining qonuniylik, shaffoflik va hisobdorlik tamoyillari asosida faoliyat yuritishi to‘g‘risidagi bilimlarni yoshlar ongiga singdirish jamiyatda qonun ustuvorligini mustahkamlashga xizmat qilib, 16-maqsad — “Tinchlik, adolat va samarali institutlar” (BRM – 16) ni amalga oshirishda muhim o‘rin tutadi. Shu bilan birga, ta’lim muassasasi va moliya sohasi mutaxassislari o‘rtasidagi bunday hamkorlik 17-maqsad — “Maqsadlar yo‘lida hamkorlik” (BRM – 17) ni amalga oshirishga ham hissa qo‘shadi. Umuman olganda, mazkur mahorat darsi talabalarning bank-moliya tizimi faoliyatini huquqiy tartibga solish sohasidagi bilimlarini mustahkamlash, ularning kasbiy kompetensiyalarini rivojlantirish hamda nazariya va amaliyot o‘rtasidagi uzviy bog‘liqlikni ta’minlashga xizmat qiluvchi samarali ta’limiy-huquqiy amaliyot sifatida baholanishi mumkin.
Jahon iqtisodiyoti va diplomatiya universiteti Xalqaro huquq fakulteti talabalari 2026-yilda ilmiy, akademik, sport va jamoat faoliyatida qator muvaffaqiyatlarga erishib, universitetimiz nufuzini munosib namoyon etmoqdalar. Fakultetimiz 1-bosqich talabasi, Toshkent shahar terma jamoasi a’zosi Abdulhamidova Nilufar Lochinbekovna «U-21 Qo‘mondonlik kubogi» o‘q otish musobaqasida faxrli 1-o‘rinni egalladi. 2-bosqich talabasi Madatov Saloxiddin «Huquq va Burch» jurnalida fuqarolarning axborot xavfsizligiga bag‘ishlangan ilmiy maqolasini chop ettirdi. Shu bosqich talabalari Bocharov Emirxan Temurovich va Xotamov Ulug‘bek Umrbek o‘g‘li Toshkent davlat yuridik universitetida o‘tkazilgan ilmiy-amaliy konferensiyada faol qatnashdilar. Konferensiyada Bocharov Emirxan Temurovich «Best Speaker» nominatsiyasi bilan taqdirlandi. Universitetimizning yana bitta faol talabasi Aliyev Asilbek Bahromovich Rossiyaning Krasnoyarsk shahrida 27-sentabrdan 2-oktabrgacha o‘tkazilgan moliyaviy xavfsizlik bo‘yicha xalqaro olimpiadada “Yurisprudensiya” yo‘nalishi bo‘yicha faxrli 2-o‘rinni qo‘lga kiritdi. 45 davlatdan 700 nafardan ortiq talaba ishtirok etgan ushbu musobaqada erishilgan natija bilan talabamizni, uning ota-onasi hamda ilmiy rahbari — JIDU o‘qituvchisi Uzakbayeva Naubaxar Baxadirovnani samimiy tabriklaymiz. Fakultetning 4-bosqich talabasi Rajabova E’zoza 9–11-oktabr kunlari Turkiyaning Kocaeli shahrida “Türk Dünyası Gençlik Buluşması” xalqaro tadbirida O‘zbekiston va JIDU nomidan ishtirok etdi. Tadbir doirasida u O‘zbekistonning Istanbul shahridagi Bosh konsuli Sherzod Shuhratovich Abdunazarov hamda Turkiyaning AK Parti raisi o‘rinbosari — Prof. Dr. Kürşad Zorlu bilan muloqot qilib, ikki davlat o‘rtasidagi diplomatik hamkorlik, mushtarak qadriyatlar va yoshlarning xalqaro aloqalardagi o‘rni yuzasidan fikr almashdi. 16-oktabr kuni JIDUda AQShning Penn State Dickinson Law huquq maktabi vakili Stiven Barns (Stephen Barnes) ishtirokida mahorat darsi tashkil etildi. Talabalar AQShda hokimiyatlar bo‘linishi tamoyili, Oliy sud qarorlari, LL.M. magistratura dasturlari va xalqaro stipendiya imkoniyatlari bilan tanishib, xalqaro huquqiy bilimlarini kengaytirdilar. 15-oktabr kuni «Yosh siyosatchilar» marafonida JIDUning bakalavriat va magistratura bosqichlarida tahsil olayotgan Yoshlar parlamenti a’zolari faol qatnashib, dolzarb siyosiy, ijtimoiy va iqtisodiy masalalar yuzasidan o‘z fikr va tashabbuslarini ilgari surdilar. Shuningdek, 2026/2027-o‘quv yili uchun Rektor stipendiyasi tanlovida Xalqaro huquq fakulteti talabalari Qurbonov Shahruz Anvar o‘g‘li, Alijonov Asrorbek Adhamjon o‘g‘li va Davlatova Kamola Xolmurod qizi stipendiya sohiblari bo‘ldilar. Ushbu e’tirof ularning akademik natijalari, ilmiy izlanishlari va universitet hayotidagi faolligining munosib samarasidir. Talabalarimizning yutuqlari bilimga intilish, izchil mehnat va tashabbuskorlikning yorqin namunasidir. Barcha talabalarimizni, ularning ustozlari va ilmiy rahbarlarini samimiy tabriklaymiz hamda kelgusidagi ilmiy, akademik, sport va kasbiy faoliyatlarida yangi zafarlar tilaymiz!
2026-yil 30-oktabr kuni Jahon iqtisodiyoti va diplomatiya universiteti (JIDU) Xalqaro huquq fakulteti talabalari ingliz tili kafedrasi o‘qituvchisi Nargiza Voxidova hamrohligida Turkiya Respublikasining Toshkent shahridagi elchixonasi tomonidan tashkil etilgan bayram konsertida ishtirok etdilar. Turkiya Respublikasining eng muhim milliy bayramlaridan biri — Respublika kuni (Cumhuriyet Bayramı) munosabati bilan tashkil etilgan tadbirda taniqli turk xonandasi Mustafa Ceceli konsert dasturi bilan chiqish qildi. Konsert talabalarga turk musiqasi va madaniyati bilan yaqindan tanishish, shuningdek, Turkiya tarixidagi muhim sanalardan biriga bag‘ishlangan bayram tadbirida ishtirok etish imkoniyatini yaratdi. Mazmunli musiqiy dastur va ko‘tarinki bayramona muhit turli jamoalar vakillarini birlashtirib, xalqlar o‘rtasidagi do‘stlik, o‘zaro hurmat va madaniy hamjihatlik ruhini namoyon etdi. Bunday tadbirlarda ishtirok etish JIDU talabalari uchun turli xalqlarning madaniyati bilan yaqindan tanishish, madaniyatlararo muloqot ko‘nikmalarini rivojlantirish hamda xalqaro do‘stlik va xalqlar o‘rtasidagi aloqalarning ahamiyatini chuqurroq anglashda muhim ahamiyat kasb etadi. Mazkur bayram tadbiri madaniy diplomatiyaning xalqlarni bir-biriga yaqinlashtirish, o‘zaro anglashuv va hamkorlikni mustahkamlashdagi muhim o‘rnini yana bir bor namoyon etdi.
2026-yil 30-oktabr kuni O‘zbekiston Respublikasi Tashqi ishlar vazirligi huzuridagi Jahon iqtisodiyoti va diplomatiyasi universitetida (JIDU) Xalqaro huquq fakultetining 4-kurs talabalari uchun “Xalqaro gumanitar huquq” fani doirasida “Qizil Xoch va Qizil Yarim Oy emblemalarini himoya qilish” mavzusida mahorat darsi “Xalqaro huquq va ommaviy huquq fanlari” kafedrasi dotsenti Xamdamova Sh. M. tomonidan tashkil etildi. Mashg‘ulotda Xalqaro Qizil Xoch Qo‘mitasining (XQXQ) Markaziy Osiyodagi mintaqaviy delegatsiyasi huquqiy masalalar bo‘yicha maslahatchisi Marat Sayarovich Aminov ishtirok etdi. Mahorat darsi xalqaro gumanitar huquqda himoya emblemalarining huquqiy maqomi, ularni qo‘llash qoidalari va ulardan noto‘g‘ri foydalanishning oqibatlariga bag‘ishlandi. Mashg‘ulot davomida Qizil Xoch va Qizil Yarim Oy emblemalarining qurolli mojarolar sharoitida tibbiy xodimlar, tibbiy tuzilmalar va transport vositalarini identifikatsiya qilish hamda himoya qilishdagi ahamiyati ko‘rib chiqildi. Emblemalarning himoya belgisi va farqlovchi belgi sifatida qo‘llanilishi o‘rtasidagi tafovutlarga alohida e’tibor qaratildi. Shuningdek, 1949-yilgi Jeneva konvensiyalari va ularga Qo‘shimcha protokollarda belgilangan qoidalar, emblemalarni hurmat qilish va ulardan noqonuniy foydalanishning oldini olish bo‘yicha davlatlarning majburiyatlari muhokama qilindi. Emblemalardan ruxsatsiz foydalanish, ularni taqlid qilish va qurolli mojaro paytida suiiste’mol qilish bilan bog‘liq huquqiy masalalar tahlil etildi. Mahorat darsining amaliy qismida talabalar turli vaziyatlarda emblemalarni qo‘llashning qonuniyligini xalqaro gumanitar huquq normalari asosida baholash masalalarini muhokama qildilar. Savol-javoblar davomida himoya belgilarining daxlsizligini ta’minlash, ularni noto‘g‘ri qo‘llashning oldini olish va milliy qonunchilikdagi tegishli choralar yuzasidan fikr almashildi. Mazkur mahorat darsi talabalarning xalqaro gumanitar huquq bo‘yicha nazariy bilimlarini amaliy masalalar bilan bog‘lash, xalqaro huquq normalarini aniq vaziyatlarda qo‘llash ko‘nikmalarini rivojlantirish hamda gumanitar himoya belgilariga hurmat tamoyilini chuqurroq anglashga xizmat qildi.
Jahon iqtisodiyoti va diplomatiya universitetida talaba-yoshlarni kitob mutolaasiga keng jalb etish, ularning badiiy savodxonligi va kitobxonlik madaniyatini oshirish, shuningdek, yosh avlodni vatanparvarlik va yurtimiz kelajagiga daxldorlik ruhida tarbiyalash maqsadida “Ma’rifat ulashib” loyihasi doirasida adiblar hamda talabalar ishtirokida ijodiy uchrashuv tashkil etildi. Uchrashuvda O‘zbekiston Yozuvchilar uyushmasi a’zolari — Mehri Abdurahmonova, Shodi Otamurod va Asror Mo‘minov ishtirok etib, talaba-yoshlar bilan adabiyot, ijod, kitobxonlik va ma’naviyatning inson hayotidagi o‘rni xususida suhbatlashdilar. Muloqot davomida badiiy adabiyotning yoshlar dunyoqarashini kengaytirish, ularning tafakkuri va nutq madaniyatini rivojlantirish, ezgu qadriyatlar hamda milliy o‘zlikni anglashdagi ahamiyatiga alohida e’tibor qaratildi. Ijodkorlar o‘zlarining hayotiy va ijodiy tajribalari bilan o‘rtoqlashib, kitob mutolaasiga bo‘lgan qiziqishni oshirish, muntazam o‘qish va o‘qilgan asarlar ustida fikr yuritish yuzasidan tavsiyalar berdilar. Samimiy va mazmunli muloqot davomida talabalar o‘zlarini qiziqtirgan savollar bilan murojaat qilish, adiblar bilan fikr almashish hamda ijodkorlarning qarashlari va tajribalaridan bahramand bo‘lish imkoniga ega bo‘ldilar. Bunday uchrashuvlar yoshlarning ma’naviy-intellektual salohiyatini yuksaltirish, kitobxonlik madaniyatini rivojlantirish, milliy adabiyotimizga bo‘lgan qiziqishini kuchaytirish hamda ularni yurt taqdiriga daxldor, faol va vatanparvar insonlar etib tarbiyalashda muhim ahamiyat kasb etadi.
2026-yil 29-oktabr kuni taniqli diplomat va jurnalist Abror G‘ulomov Jahon iqtisodiyoti va diplomatiya universitetining Siyosatshunoslik fakultetida “Siyosat va OAV” fanini o‘rganayotgan 2-bosqich talabalari uchun mahorat darsi o‘tkazdi. A. G‘ulomov Milliy universitetning jurnalistika fakultetini tamomlaganidan so‘ng boshlangan kasbiy faoliyati haqida so‘zlab berdi. U “Toshkent haqiqati” gazetasidagi faoliyati, Madaniyat vazirligi matbuot xizmatidagi mehnat faoliyati, keyinchalik O‘zbekiston Respublikasi Prezidenti devonidagi mas’uliyatli faoliyati hamda mamlakat Tashqi ishlar vazirligidagi qariyb 25 yillik xizmat faoliyati haqidagi xotiralari bilan o‘rtoqlashdi. U Tashqi ishlar vazirligi huzuridagi “Jahon” (hozirgi “Dunyo”) axborot agentligining tashkil etilishida faol ishtirok etgan, o‘n yildan ortiq vaqt davomida O‘zbekistonning Istanbul shahridagi Bosh konsulxonasiga rahbarlik qilgan, shuningdek, O‘zbekiston Milliy axborot agentligi (O‘zA)ning xalqaro bo‘limida faoliyat yuritgan. Talabalar bilan uchrashuv davomida tajribali jurnalist va diplomat O‘zbekistonning xalqaro maydondagi ijobiy imijini ilgari surish maqsadida mahalliy va xorijiy ommaviy axborot vositalari bilan hamkorlik qilish borasidagi tajribasi haqida so‘zlab berdi. U dunyoning yetakchi ommaviy axborot vositalari bilan qanday aloqalar o‘rnatgani, shuningdek, mustaqillikka endigina erishgan mamlakatga qarshi qaratilgan axborot kampaniyalariga qarshi kurashish bo‘yicha olib borgan faoliyati bilan o‘rtoqlashdi. Diplomat Turkiya ommaviy axborot vositalari faoliyatining o‘ziga xos xususiyatlari haqida ham batafsil fikr bildirdi. Uchrashuv yakunida A. G‘ulomov so‘nggi o‘n yil davomida ommaviy axborot vositalari sohasida yuz bergan keng ko‘lamli o‘zgarishlarga alohida to‘xtalib, bugungi kunda dunyoning yetakchi nashrlarida keng yoritilayotgan Yangi O‘zbekistonning zamonaviy qiyofasi haqida so‘z yuritdi. Mahorat darsi yakunida A. G‘ulomov talabalarning ommaviy axborot vositalarining xalqaro munosabatlar va jahon siyosatidagi o‘rniga oid ko‘plab savollariga javob berdi.
