O‘zbekiston Respublikasi Prezidenti tashabbusi bilan amalga oshirilayotgan “Dolzarb 90 kun” loyihasi doirasida 2026-yil 23–26-iyun kunlari Toshkent viloyatidagi “Pyramids Resort” majmuasida, “Nogironligi bo‘lgan shaxslarning huquqlarini ta’minlashda yuridik klinikalarning roli: amaliy ko‘nikmalar, ijtimoiy himoya va inklyuziv yondashuv” mavzusida tashkil etilgan mazkur yozgi maktabda Jahon iqtisodiyoti va diplomatiya universiteti huzuridagi Yuridik klinika a’zolari Murodbek Egamqulov va Samira Xudjamova ishtirok etmoqda. Yozgi maktabning asosiy maqsadi nogironligi bo‘lgan shaxslarning huquq va qonuniy manfaatlarini himoya qilish, ularga sifatli yuridik yordam ko‘rsatish hamda bu borada yuridik klinikalarning amaliy imkoniyatlarini kengaytirishdan iborat. Mashg‘ulotlar davomida ijtimoiy himoya mexanizmlarini takomillashtirish, inklyuziv yondashuvni huquqiy amaliyotga tatbiq etish va aholining ehtiyojmand qatlamlari bilan samarali ishlash masalalari muhokama qilinmoqda. Shuningdek, ishtirokchilar amaliy mashg‘ulotlar, muhokamalar va tajriba almashish jarayonida huquqiy maslahat berish, murojaatlarni tahlil qilish, muammolarga huquqiy yechim topish hamda nogironligi bo‘lgan shaxslar bilan ishlash bo‘yicha kasbiy bilim va ko‘nikmalarini mustahkamlamoqda.
Jahon iqtisodiyoti va diplomatiya universiteti 2026-yil uchun e’lon qilingan Times Higher Education (THE) Impact Rankings xalqaro reytingida ishtirok etib, BMTning Barqaror rivojlanish maqsadlari (SDGs)ni amalga oshirishga qo‘shayotgan hissasi bilan xalqaro miqyosda e’tirof etildi. Mazkur reyting reytingi Birlashgan Millatlar Tashkilotining 17 ta Barqaror rivojlanish maqsadlariga (Sustainable Development Goals – SDGs) qo‘shayotgan hissasini baholovchi xalqaro reyting hisoblanadi. Reytingda oliy ta’lim muassasalari nafaqat ta’lim va ilmiy tadqiqotlar natijalari, balki gender tengligi, ijtimoiy inklyuziya, ekologik barqarorlik, samarali boshqaruv, xalqaro hamkorlik hamda jamiyat rivojiga qaratilgan tashabbuslari asosida ham baholanadi. Mazkur reyting bugungi kunda universitetlarning barqaror rivojlanish yo‘nalishidagi faoliyatini xalqaro miqyosda baholovchi eng nufuzli reytinglardan biri sifatida e’tirof etiladi. 2026-yilgi natijalarga ko‘ra, JIDU quyidagi yo‘nalishlarda yuqori natijalarni qayd etdi: · Umumiy natija (Overall Sustainability Impact Rating): 600+ · SDG 4 – Sifatli ta’lim: 600+ · SDG 5 – Gender tengligi: 400+ · SDG 8 – Munosib mehnat va iqtisodiy o‘sish: 400+ · SDG 16 – Tinchlik, adolat va samarali institutlar: 100+ · SDG 17 – Maqsadlar yo‘lida hamkorlik: 300+ Ushbu natijalar universitetda so‘nggi yillarda amalga oshirilayotgan ta’lim sifatini oshirish, gender tengligini ta’minlash, ilmiy tadqiqotlar salohiyatini rivojlantirish, xalqaro hamkorlikni kengaytirish hamda institutsional boshqaruvni takomillashtirish borasidagi tizimli islohotlarning amaliy samarasini namoyon etadi. Ayniqsa, SDG 16 – “Tinchlik, adolat va samarali institutlar” yo‘nalishida erishilgan natija universitetning huquq ustuvorligi, ochiq va samarali boshqaruv, akademik halollik hamda ijtimoiy mas’uliyat tamoyillariga sodiqligini tasdiqlaydi. JIDU o‘z faoliyatida BMTning Barqaror rivojlanish maqsadlarini universitet strategiyasi bilan uyg‘unlashtirishga alohida e’tibor qaratib kelmoqda. Ta’lim, ilm-fan, xalqaro hamkorlik va jamoatchilik bilan ishlash yo‘nalishlaridagi tashabbuslar barqaror rivojlanishga xizmat qiluvchi muhim omillardan biri bo‘lib qolmoqda. Jahon iqtisodiyoti va diplomatiya universiteti kelgusida ham barqaror rivojlanish, sifatli ta’lim va xalqaro hamkorlik sohalaridagi tashabbuslarni izchil davom ettirib, global miqyosdagi ijobiy ta’sirini yanada kengaytirishni maqsad qilgan.
Jahon iqtisodiyoti va diplomatiya universiteti ingliz tili o‘qituvchisi Nodiraxon Turg‘unova “Zakovat” intellektual teleo‘yinining Oliy liga yozgi mavsum saralash bosqichida Bahodir Anorov sardorligidagi jamoa tarkibida ishtirok etdi. Saralash bosqichi doirasida jamoalar jami beshta o‘yinda o‘z bilim va mantiqiy fikrlash salohiyatini sinovdan o‘tkazmoqda. Mazkur bosqichning ikkinchi o‘yinida Bahodir Anorov jamoasi yuqori natija qayd etib, va-bank imkoniyatidan foydalanmagan holda 6:0 hisobida ishonchli g‘alabaga erishdi. Ushbu muvaffaqiyat jamoaning final bosqichiga yo‘l olish imkoniyatlarini yanada mustahkamladi. Intellektual bellashuv davomida jamoa a’zolari keng dunyoqarash, tezkor fikrlash, murakkab savollarni tahlil qilish va to‘g‘ri qaror qabul qilish borasidagi mahoratini namoyish etdi. Ayniqsa, ishtirokchilarning o‘zaro hamjihatligi va har bir savolga puxta yondashuvi muvaffaqiyatli natijaga erishishda muhim omil bo‘ldi. Nodiraxon Turg‘unovaning ushbu nufuzli intellektual teleo‘yindagi ishtiroki JIDU professor-o‘qituvchilarining nafaqat pedagogik va ilmiy, balki intellektual salohiyati ham yuqori ekanini ko‘rsatadi.
Jahon iqtisodiyoti va diplomatiya universitetining “Siyosatshunoslik” kafedrasi professor-o‘qituvchilari Mirzo Ulug‘bek tumanidagi “Azamat” mahalla fuqarolar yig‘iniga tashrif buyurdilar. Tashrif doirasida mamlakatimizda amalga oshirilayotgan keng ko‘lamli islohotlarning mazmun-mohiyati, yoshlar siyosati hamda ta’lim sohasidagi yangilanishlarga bag‘ishlangan uchrashuv tashkil etildi. Uchrashuvdan ko‘zlangan asosiy maqsad mahalla faollari va jamoatchilik vakillarini JIDUning ta’lim, ilmiy-tadqiqot va xalqaro hamkorlik yo‘nalishlaridagi faoliyati bilan yaqindan tanishtirishdan iborat bo‘ldi. Tadbir davomida universitetda joriy etilayotgan zamonaviy ta’lim dasturlari, yoshlarni har tomonlama qo‘llab-quvvatlashga qaratilgan tashabbuslar hamda ilmiy salohiyatni rivojlantirish borasida olib borilayotgan ishlar haqida ma’lumot berildi. Shuningdek, “Dolzarb 90 kun” dasturi doirasida mahalla yoshlarining bo‘sh vaqtini mazmunli tashkil etish, ularning intellektual va ijodiy salohiyatini ro‘yobga chiqarishga xizmat qiluvchi ta’limiy hamda ma’naviy-ma’rifiy loyihalarni amalga oshirish masalalari muhokama qilindi. Muloqot jarayonida universitet va mahalla o‘rtasida yoshlarni kasbga yo‘naltirish, xorijiy tillarni o‘qitish, ilmiy-ma’rifiy tadbirlarni tashkil etish hamda iqtidorli yoshlarni qo‘llab-quvvatlash yo‘nalishlarida hamkorlikni rivojlantirish istiqbollari yuzasidan fikr almashildi. Uchrashuv yakunida tomonlar yoshlarning bilim va ko‘nikmalarini oshirish, ularni zamonaviy kasb va mutaxassisliklarga yo‘naltirish, shuningdek, mahalla va oliy ta’lim muassasasi o‘rtasidagi hamkorlikni yanada mustahkamlashga qaratilgan amaliy chora-tadbirlarni birgalikda amalga oshirishga kelishib oldilar.
Jahon iqtisodiyoti va diplomatiya universitetida Xalqaro huquq fakultetining Yuridik klinikasida tahsil olgan 4-bosqich talabalarning an’anaviy tantanali kuzatish marosimi bo‘lib o‘tdi. Tadbir avvalida JIDU Xalqaro huquq fakulteti dekani hamda professor-o‘qituvchilar so‘zga chiqib, bitiruvchilarni ushbu muhim bosqichni muvaffaqiyatli yakunlaganliklari bilan samimiy tabrikladilar. O‘z nutqlarida ular talabalarning Yuridik klinika faoliyatidagi faolligi va amaliy ko‘nikmalarini alohida e’tirof etib, kelgusidagi kasbiy faoliyatlari uchun qimmatli tavsiyalar hamda ezgu tilaklarini bildirdilar. Rasmiy qismdan so‘ng, talabalar va ustozlar o‘rtasida samimiy suhbat tarzidagi norasmiy uchrashuv bo‘lib o‘tdi. Unda bitiruvchilarga JIDU Yuridik klinikasidagi faoliyati davomida orttirgan bilim va tajribalarini, erishgan yutuqlarini yana bir bor yodga olish hamda ustoz va tengdoshlari bilan unutilmas xotiralarni baham ko‘rish imkonini berdi.
2026-yil 22-iyun kuni Jahon iqtisodiyoti va diplomatiya universitetida “Ma’muriy huquq islohoti: hayot yo‘li” mavzusida davra suhbati bo‘lib o‘tdi. Yuridik fanlar doktori, professor Isa Ahlimanovich Xamedov xotirasiga bag‘ishlangan tadbir davlat hokimiyati va sud organlari, oliy ta’lim muassasalari, ilmiy-tadqiqot markazlari, xalqaro tashkilotlar vakillari, shuningdek, olimning hamkasblari, shogirdlari va oila a’zolarini birlashtirdi. Davra suhbatini O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev ochib berdi. U ma’muriy huquqning samarali davlat boshqaruvini ta’minlash, fuqarolarning huquq va qonuniy manfaatlarini himoya qilishdagi muhim o‘rnini ta’kidladi. Shuningdek, professor Isa Xamedovning O‘zbekistonda zamonaviy ommaviy huquq maktabini shakllantirish, yuridik ta’limni rivojlantirish va yuqori malakali mutaxassislarni tayyorlashga qo‘shgan beqiyos hissasini alohida qayd etdi. Tadbirda Toshkent davlat yuridik universiteti rektori, yuridik fanlar doktori, professor Baxshillo Xodjayev ma’ruza qilib, Isa Xamedovning milliy yuridik fan va oliy ta’lim tizimidagi ko‘p yillik samarali faoliyatiga yuksak baho berdi. Professor ellikdan ortiq fan doktori va falsafa doktori (PhD)ni tarbiyalagan nufuzli ilmiy maktab asoschisi sifatida e’tirof etildi. Tadbir davomida unga “Toshkent davlat yuridik universitetining faxriy professori” unvoni berilgani e’lon qilinib, tegishli guvohnoma olimning oila a’zolariga tantanali ravishda topshirildi. Davra suhbati doirasida O‘zbekistondagi ma’muriy-huquqiy islohotlarning bugungi holati va istiqbollari, so‘nggi yigirma yilda amalga oshirilgan o‘zgarishlar, Ma’muriy sud ishlarini yuritish to‘g‘risidagi kodeksning yangi tahriri loyihasi hamda sudgacha bo‘lgan ma’muriy adliya tizimini rivojlantirish masalalari muhokama qilindi. “Ma’muriy tartib-taomillar to‘g‘risida”gi Qonunning davlat boshqaruvida shaffoflikni ta’minlash, halol boshqaruv mexanizmlarini mustahkamlash va korrupsiyaning oldini olishdagi ahamiyatiga alohida e’tibor qaratildi. Muhokamalar yakunida ilmiy hamjamiyat, davlat organlari, xalqaro tashkilotlar va ta’lim muassasalari o‘rtasidagi hamkorlikni yanada kuchaytirish zarurligi ta’kidlandi. Professor I.A. Xamedov tavalludining 75 yilligiga bag‘ishlangan “Xamedov o‘qishlari – 2027” an’anaviy ilmiy konferensiyasini tashkil etish tashabbusi qo‘llab-quvvatlandi. Tadbir JIDUda professor Isa Ahlimanovich Xamedov nomidagi auditoriyaning tantanali ochilishi bilan yakunlandi.
Nazarbayev universitetida Markaziy Yevrosiyo tadqiqotlari jamiyatining CESS–2026 mintaqaviy konferensiyasi bo‘lib o‘tdi. “Markaziy Yevrosiyoni qayta anglash: makonlar, jamiyatlar va hokimiyat” mavzusida tashkil etilgan mazkur anjuman 39 mamlakatdan 500 nafardan ortiq olim va ekspertni birlashtirdi. Bugungi kunda Markaziy Yevrosiyo tadqiqotlari jamiyati — CESS dunyo bo‘ylab 500 dan ziyod tadqiqotchilarni birlashtirib, Markaziy Yevrosiyo bo‘yicha ilmiy izlanishlarni rivojlantirish, akademik hamkorlikni kengaytirish hamda fanlararo yondashuvlarni qo‘llab-quvvatlashga xizmat qilmoqda. Konferensiyaning ochilish marosimida Nazarbayev universiteti vitse-prezidenti Gulmira Qanay, universitetning Davlat siyosati oliy maktabi dekani Rikkardo Pelitstso hamda CESSning 2026-yildagi prezidenti, Davlat siyosati oliy maktabining ilmiy ishlar bo‘yicha dekan o‘rinbosari Dina Sharipova so‘zga chiqdi. Anjumanning asosiy ma’ruzasi Yaponiyaning Tsukuba universiteti hamda O‘zbekiston Respublikasi Tashqi ishlar vazirligi huzuridagi Jahon iqtisodiyoti va diplomatiya universiteti Ilmiy vishlar va innovatsiyalar bo'yicha prorektor, professor Timur Dadabayev tomonidan taqdim etildi. O‘z ma’ruzasida professor Timur Dadabayev o‘zgarib borayotgan global siyosiy muhitda Markaziy Yevrosiyoning o‘rni va ahamiyatiga alohida e’tibor qaratdi. U uzoq yillar davomida Markaziy Osiyo yirik davlatlar raqobatining obyekti, tranzit yo‘lagi yoki chekka hudud sifatida talqin qilib kelinganini ta’kidladi. Shu bilan birga, zamonaviy ilmiy tadqiqotlarda mintaqa davlatlari va jamiyatlarining mustaqil subyekt sifatidagi roli, mahalliy qarashlar, dekolonial yondashuvlar hamda mintaqani anglashning muqobil usullari tobora ko‘proq ilgari surilayotganini qayd etdi. Shuningdek, milliy davlatchilik va qo‘shnichilik munosabatlari bir-biridan ajralmas tushunchalar ekani ta’kidlandi. Kuchli davlat barqaror mintaqaviy muhitga, muvaffaqiyatli milliy taraqqiyot esa qo‘shni mamlakatlar bilan tinch va o‘zaro manfaatli hamkorlikka bevosita bog‘liq ekani qayd etildi. CESS–2026 konferensiyasida 180 dan ortiq universitet, ilmiy markaz va xalqaro tashkilot vakillari ishtirok etdi. Tadqiqot taqdimotlari, panel muhokamalari va akademik muloqotlar davomida jamiyat, boshqaruv, migratsiya, mobillik va mintaqaviy transformatsiya masalalari bo‘yicha yangi ilmiy yondashuvlar muhokama qilindi.
“Dolzarb 90 kunlik” dasturi doirasida Jahon iqtisodiyoti va diplomatiya universitetining “Siyosatshunoslik” kafedrasi professor-o‘qituvchilari hamda “Lider qizlar” klubi a’zolari tashabbusi bilan Mirzo Ulug‘bek tumanidagi “Yangi Olmachi” mahallasida “Mahallamiz yoshlari — kelajak diplomatlari” mavzusida ma’naviy-ma’rifiy va kasbga yo‘naltiruvchi uchrashuv tashkil etildi. Mazkur tadbirning asosiy maqsadi mahalla yoshlarining oliy ta’limga bo‘lgan qiziqishini yanada oshirish, ularni kelajak kasbini ongli ravishda tanlashga yo‘naltirish, xalqaro munosabatlar va diplomatiya sohalari haqida kengroq tasavvur hosil qilish, shuningdek, yoshlarning intellektual va kasbiy salohiyatini rivojlantirishdan iborat bo‘ldi. Uchrashuvda yoshlarning zamonaviy bilim va ko‘nikmalarni egallashi, mustaqil fikrlashi, liderlik fazilatlarini shakllantirishi, jamiyat hayotida faol ishtirok etishi hamda mamlakat taraqqiyotiga munosib hissa qo‘shishi muhim ekani ta’kidlandi. Ayniqsa, diplomatiya, xalqaro munosabatlar va davlat boshqaruvi yo‘nalishlarida faoliyat yuritishni maqsad qilgan yoshlar uchun zarur bo‘lgan bilim, mas’uliyat, muloqot madaniyati va xorijiy tillarni puxta egallash masalalariga alohida e’tibor qaratildi. Mazkur tadbir yoshlarning oliy ta’limga bo‘lgan qiziqishini kuchaytirish, ularni o‘z ustida muntazam ishlashga rag‘batlantirish, kasbiy maqsadlarini aniq belgilashga ko‘maklashish hamda mahalla va oliy ta’lim muassasasi o‘rtasidagi o‘zaro hamkorlikni yanada mustahkamlashga xizmat qildi.
