2026-yil 3-noyabr kuni Jahon iqtisodiyoti va diplomatiya universitetida Taldau AI Analytics Vasiylik kengashi raisi Maulen Ashimbayev boshchiligidagi Qozog‘iston Respublikasi delegatsiyasi bilan uchrashuv bo‘lib o‘tdi. Uchrashuv davomida tomonlar mintaqaviy hamkorlikni mustahkamlash, xalqaro munosabatlar, diplomatiya va zamonaviy texnologiyalar sohasida qo‘shma ilmiy tadqiqotlarni rivojlantirish hamda mutaxassislar tayyorlash istiqbollarini muhokama qildilar. M. Ashimbayevning mintaqadagi beshta davlat mutaxassislarini birlashtiruvchi yagona ekspert-ta’lim platformasi — Markaziy Osiyo tahlil maktabini tashkil etish tashabbusiga alohida e’tibor qaratildi. Uning faoliyati mintaqaviy savdo, investitsiyalar, suv diplomatiyasi, barqaror rivojlanish, shuningdek, sun’iy intellektni qo‘llash va katta ma’lumotlarni (Big Data) tahlil qilish masalalarini qamrab olishi ko‘zda tutilgan. Tashabbusni amalga oshirishning birinchi bosqichi sifatida 2027-yilning bahorida Olmaota shahrida Markaziy Osiyo mamlakatlaridan 50 nafar mutaxassis ishtirokida ta’lim dasturini o‘tkazish taklif etildi. JIDU rektori mazkur tashabbusni qo‘llab-quvvatlab, universitetning xalqaro xavfsizlik, suv diplomatiyasi, mintaqaviy o‘zlikni anglash masalalari, sun’iy intellektni tartibga solish (AI Governance) va uni diplomatiyada qo‘llash kabi istiqbolli tadqiqot yo‘nalishlari bilan tanishtirdi. Shuningdek, tomonlar JIDUning Qozog‘istondagi yetakchi universitetlar va tahliliy markazlar bilan hamkorligini kengaytirish, qo‘shma ilmiy loyihalarni amalga oshirish hamda mintaqa mamlakatlari davlat organlari uchun amaliy tavsiyalar tayyorlash imkoniyatlarini muhokama qildilar. Uchrashuv yakunida Markaziy Osiyo tahlil maktabini tashkil etish tashabbusini atroflicha ishlab chiqish va uni amalga oshirishning bosqichma-bosqich rejasini tuzish bo‘yicha kelishuvga erishildi.
Amerikalik ekspertlar delegatsiyasining ta’lim safari doirasida Jahon iqtisodiyoti va diplomatiya universitetida talabalar bilan O‘zbekiston–AQSh munosabatlarining bugungi holati va rivojlanish istiqbollari, shuningdek, mintaqaviy va xalqaro siyosatning dolzarb masalalariga bag‘ishlangan uchrashuv bo‘lib o‘tdi. Tadbirda Endryu Kachins — CFTNI katta ilmiy xodimi, Jons Hopkins universitetining taklif etilgan professori, Marsha Oliv — Kaspiy siyosati markazi (Caspian Policy Center) Maslahat kengashi a’zosi hamda Pol Sonders — Milliy manfaatlar markazi (Center for the National Interest) prezidenti va bosh ijrochi direktori ishtirok etdilar. Uchrashuv davomida ekspertlar O‘zbekiston va AQSh o‘rtasidagi strategik sheriklikning ijobiy rivojlanish sur’atlarini alohida ta’kidladilar. O‘zbekiston Respublikasi Prezidenti Shavkat Mirziyoyevning mintaqaviy hamkorlikni mustahkamlash va Markaziy Osiyoning xalqaro maydondagi mavqeyini oshirishga qaratilgan tashqi siyosiy tashabbuslariga alohida e’tibor qaratildi. Ishtirokchilar parlament diplomatiyasini rivojlantirish, investitsiyaviy hamkorlikni kengaytirish, strategik ahamiyatga ega muhim mineral resurslar sohasida qo‘shma loyihalarni amalga oshirish, shuningdek, ta’lim va akademik almashinuvlarni rivojlantirish kabi ikki tomonlama hamkorlik istiqbollarini muhokama qildilar. Shuningdek, “C5+1” formatini yanada rivojlantirish, AQSh Davlat kotibi Marko Rubioning O‘zbekistonga tashrifi yakunlari hamda AQSh Kongressiga bo‘lib o‘tadigan oraliq saylovlarning Vashington tashqi siyosiy ustuvorliklariga ehtimoliy ta’siri yuzasidan fikr almashildi. Ochiq muloqot shaklida o‘tkazilgan uchrashuv talabalarga amerikalik ekspertlar bilan fikr almashish, zamonaviy xalqaro jarayonlar hamda O‘zbekiston–AQSh hamkorligining istiqbollari haqidagi bilimlarini kengaytirish imkonini berdi.
O‘zbekiston Respublikasi davlat mustaqilligining 35 yilligi munosabati bilan Jahon iqtisodiyoti va diplomatiya universiteti huzuridagi Diplomatik akademiyada “Diplomatik izohli lug‘at” va “Diplomatiya qadimgi davrlardan hozirgi kungacha” nomli darsligi taqdimoti bo‘lib o‘tadi. Mazkur nashrlar O‘zbekiston mustaqilligi yillarida diplomatiya sohasida yaratilgan ilk ixtisoslashtirilgan asarlardan bo‘lib, Markaziy Osiyoda ham ushbu yo‘nalishdagi dastlabki nashrlar qatoriga kiradi. Tadbir doirasida nashrlarning milliy diplomatiya maktabini rivojlantirish, diplomatik kadrlar, soha ekspertlari va tadqiqotchilarni tayyorlash, shuningdek, o‘zbek tilining xalqaro munosabatlar va diplomatiya sohasidagi nufuzini oshirishdagi ilmiy-amaliy ahamiyati muhokama qilinadi. Barcha qiziquvchilarni mazkur taqdimotda ishtirok etishga taklif etamiz! Sana: 2026-yil 6-noyabr Vaqt: 10:00 Manzil: Jahon iqtisodiyoti va diplomatiya universiteti, tadbirlar zali (B-203).
2026-yil 3-noyabr kuni O‘zbekiston Respublikasi Oliy Majlisi Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyevning Koreya Respublikasining Jahon savdo tashkiloti (JST) huzuridagi doimiy vakili o‘rinbosari, O‘zbekistonning JSTga a’zo bo‘lishi bo‘yicha Ishchi guruh raisi Sung-yo Choi hamda JSTning davlatlarning tashkilotga a’zo bo‘lish masalalari bo‘yicha departamenti direktori Maika Oshikava bilan uchrashuvi bo‘lib o‘tdi. Uchrashuv davomida tomonlar O‘zbekistonning JSTga a’zo bo‘lish jarayonining bugungi holati va istiqbollari, mamlakatda amalga oshirilayotgan iqtisodiy va qonunchilik islohotlari, shuningdek, O‘zbekiston va Koreya Respublikasi o‘rtasidagi hamkorlikni rivojlantirish masalalarini muhokama qildilar. JIDUning akademik masalalar bo‘yicha birinchi prorektori A. Umarov universitet ta’lim dasturlarini modernizatsiya qilish, xususan, xalqaro savdo va savdo diplomatiyasi sohasida mutaxassislar tayyorlashga yo‘naltirilgan “Xalqaro savdo huquqi” ta’lim yo‘nalishi tashkil etilgani haqida ma’lumot berdi. Uchrashuvda JIDU va JST o‘rtasida ta’lim hamda ilmiy-tadqiqot sohalaridagi hamkorlikni kengaytirish, jumladan, qo‘shma ilmiy tadqiqotlar, xalqaro konferensiyalar va ekspertlar uchrashuvlarini tashkil etish istiqbollariga alohida e’tibor qaratildi. Universitet rahbariyati bilan uchrashuvdan so‘ng JST vakillari JIDU talabalari uchun xalqaro savdo masalalari va O‘zbekistonning tashkilotga a’zo bo‘lish jarayoniga bag‘ishlangan ma’ruza o‘tkazdilar. Uchrashuv yakunida tomonlar o‘zaro hamkorlikni yanada rivojlantirish va qo‘shma tashabbuslarni amalga oshirishdan manfaatdor ekanliklarini bildirdilar.
“Barqaror rivojlanish maqsadlari haftaligi” doirasida Jahon iqtisodiyoti va diplomatiya universitetida BMT Barqaror rivojlanish maqsadlarining 5-maqsadi — “Gender tengligi”ga bag‘ishlangan “To‘siqlarni yengib: O‘zbekistonda gender tengligi” mavzusida davra suhbati tashkil etildi. Xalqaro tashkilotlar, fuqarolik jamiyati va akademik hamjamiyat vakillarini birlashtirgan tadbirda O‘zbekistonda gender tengligini ta’minlash borasidagi yutuqlar, mavjud muammolar va kelgusidagi ustuvor vazifalar muhokama qilindi. Davra suhbatida BMTning Gender tengligi va ayollar huquqlarini kengaytirish masalalari bo‘yicha tuzilmasi (UN Women) dastur tahlilchisi Caitlin Schobinger Carmody, dastur assistenti Khadicha Khoshimova hamda Nemolchi.uz loyihasi asoschisi va bosh direktori Irina Matvienko ma’ruza bilan ishtirok etdilar. Muhokamalar davomida ayollarning huquq va imkoniyatlarini kengaytirish, gender asosidagi zo‘ravonlikning oldini olish, jamiyatdagi gender stereotiplarini bartaraf etish hamda yoshlarning tenglik va kamsitishga qarshi kurashishdagi faol ishtirokini kuchaytirish masalalariga alohida e’tibor qaratildi. Tadbir gender tengligi sohasida xalqaro tashkilotlar, fuqarolik jamiyati va akademik hamjamiyat o‘rtasidagi muloqotni rivojlantirish, ilg‘or tajribalar almashinuvini rag‘batlantirish hamda yoshlarning ushbu global maqsadga erishishdagi mas’uliyatini oshirishga xizmat qildi.
2026-yil 2-noyabr kuni Jahon iqtisodiyoti va diplomatiya universitetida “UWED Startup inkubatsiya dasturi – 2026”ning tantanali ochilish marosimi bo‘lib o‘tdi. Mazkur tadbir universitetning Raqamli ta’lim, innovatsiyalar va akseleratsiya markazi tomonidan talabalarning innovatsion tashabbuslarini qo‘llab-quvvatlash, istiqbolli startap loyihalarini rivojlantirish, ularni amaliyotga tatbiq etish hamda yoshlar o‘rtasida tadbirkorlik madaniyatini shakllantirish maqsadida tashkil etildi. Tadbir davomida universitetning Raqamli transformatsiya va iqtisodiy masalalar bo‘yicha prorektori Zafar Davlatov inkubatsiya dasturi doirasida amalga oshirilgan ishlar, uning asosiy bosqichlari, istiqboldagi rejalar hamda ishtirokchilar va startap loyihalar soniga oid ma’lumotlarni taqdim etdi. Ta’kidlanganidek, joriy yilda dasturga 200 nafardan ortiq ishtirokchi va 100 dan ziyod startap loyiha jalb etilgan. Ushbu ko‘rsatkichlar talaba-yoshlarning innovatsion faoliyat va startap tadbirkorligiga bo‘lgan qiziqishi ortib borayotganini namoyon etadi. Ochilish marosimida O‘zbekiston Respublikasi Raqamli texnologiyalar vazirligi vakili Nodir Alibekov, IT Park Uzbekistan vakili Usmon Rahimjonov hamda Plug and Play kompaniyasining Markaziy Osiyo bo‘yicha direktor o‘rinbosari Ozodbek Odilbekov ishtirok etdilar. Mehmonlar o‘z chiqishlarida startap ekotizimini rivojlantirish, innovatsion g‘oyalarni amaliy loyihalarga aylantirish, yosh tadbirkorlarni qo‘llab-quvvatlash hamda mahalliy va xalqaro hamkorlikni kengaytirishning ahamiyatiga alohida to‘xtaldilar. Shuningdek, tadbir doirasida AQShda faoliyat yuritayotgan Silk Road Innovation Hub vakili Nilufar Majidovaning maxsus videomurojaati namoyish etildi. Ochilish marosimi yakunida O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev so‘zga chiqib, talaba-yoshlarga o‘z tilak va tavsiyalarini bildirdi. Rektor innovatsion fikrlash, tashabbuskorlik va zamonaviy bilimlarning yoshlar kasbiy kamolotidagi ahamiyatiga e’tibor qaratib, “UWED Startup inkubatsiya dasturi – 2026”ga rasman start berdi. Mazkur dastur universitetda innovatsion va tadbirkorlik muhitini yanada rivojlantirish, talabalarning istiqbolli g‘oyalarini amaliy loyihalarga aylantirish, ularning startap tashabbuslarini qo‘llab-quvvatlash hamda mahalliy va xalqaro hamkorlik imkoniyatlarini kengaytirishga xizmat qiladi.
2026-yil 2-noyabr kuni Jahon iqtisodiyoti va diplomatiya universitetida O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev boshchiligida universitet rahbariyati va faol talabalar ishtirokida navbatdagi ochiq muloqot tashkil etildi. Uchrashuvning asosiy maqsadi universitet rahbariyati va talaba-yoshlar o‘rtasidagi bevosita muloqotni mustahkamlash, talabalarning taklif va tashabbuslarini qo‘llab-quvvatlash, ular uchun yaratilayotgan imkoniyatlarni kengaytirish hamda universitet hayotiga oid dolzarb masalalarni muhokama qilishdan iborat bo‘ldi. Tadbir davomida Yoshlar masalalari va ma’naviy-ma’rifiy ishlar bo‘yicha birinchi prorektor Oydin Mannopova avvalgi rektor va talabalar uchrashuvida ko‘tarilgan masalalar yuzasidan amalga oshirilgan ishlar, ko‘rilgan chora-tadbirlar hamda erishilgan natijalar haqida ma’lumot berdi. Ochiq muloqot davomida talabalar o‘zlarini qiziqtirgan savollar bilan universitet rahbariyatiga bevosita murojaat qilib, ta’lim jarayoni, talabalarga yaratilayotgan shart-sharoitlar, universitet hayotini yanada takomillashtirish hamda yoshlar tashabbuslarini qo‘llab-quvvatlash yuzasidan o‘z fikr va takliflarini bildirdilar. Shuningdek, uchrashuvda talabalarning universitet hayotidagi ishtirokini faollashtirish, ularning yetakchilik va ijodiy salohiyatini rivojlantirish, innovatsion g‘oyalar va istiqbolli loyihalarni qo‘llab-quvvatlash masalalariga alohida e’tibor qaratildi. Uchrashuv yakunida talabalar tomonidan bildirilgan taklif va tashabbuslarni tegishli tartibda ko‘rib chiqish, ko‘tarilgan masalalar yuzasidan izchil ish olib borish hamda universitet rahbariyati va talabalar o‘rtasidagi ochiq muloqotni muntazam davom ettirish muhimligi ta’kidlandi. Mazkur uchrashuv JIDUda talaba-yoshlarning fikr va tashabbuslariga alohida e’tibor qaratilayotgani, ularning universitet rivojidagi faol ishtirokini ta’minlash hamda rahbariyat bilan samarali muloqotni mustahkamlashga qaratilgan sa’y-harakatlarning davomidir.
JIDU Xalqaro huquq fakulteti “Xalqaro huquq va ommaviy huquq fanlari” kafedrasi professori v.b. Surayyo Usmanova AQShdagi Fulbrayt tadqiqotchisi sifatidagi ilmiy faoliyati doirasida Birlashgan Millatlar Tashkilotining institutsional faoliyati hamda Barqaror rivojlanish maqsadlariga bag‘ishlangan xalqaro tadbirlarda ishtirok etdi. Xususan, Nyu-York shahridagi BMT bosh qarorgohiga tashrif buyurib, Bosh Assambleya va Xavfsizlik Kengashi majlislarida kuzatuvchi sifatida qatnashdi. Mazkur tashrif O‘zbekiston Respublikasining BMT huzuridagi Doimiy vakolatxonasi ko‘magida amalga oshirildi. Tashrif davomida BMTning asosiy organlari faoliyati, xalqaro tinchlik va xavfsizlikni ta’minlashga qaratilgan ko‘p tomonlama diplomatik muzokaralar, xalqaro qarorlar qabul qilish tartibi hamda xalqaro huquq normalarining amaliy tatbiqi bilan bevosita tanishish imkoniyati yaratildi. Shuningdek, 2026-yil 25-oktabr kuni S. Usmanova AQShning Pensilvaniya shtatida BMT tashkil etilgan kun munosabati bilan o‘tkazilgan tadbirida Pensilvaniya universitetida akademik hamjamiyati vakili sifatida ishtirok etdi.AQSh BMT Assotsiatsiyasining Markaziy Pensilvaniya bo‘limi tomonidan tashkil etilgan mazkur tadbir “Ochlikka barham berish sari: Yoshlar oziq-ovqat laboratoriyasining innovatsion yechimlari” (“Towards Zero Hunger: Innovative Solutions from the Youth Food Lab”) mavzusiga bag‘ishlandi. Tadbir doirasida BMTning 2030-yilgacha bo‘lgan Barqaror rivojlanish kun tartibi, xususan, 2-maqsad “Ochlikka barham berish” (SDG 2: Zero Hunger) bilan bog‘liq dolzarb masalalar muhokama qilindi. Global oziq-ovqat xavfsizligini ta’minlash, barqaror oziq-ovqat tizimlarini rivojlantirish, yoshlarning innovatsion tashabbuslarini qo‘llab-quvvatlash hamda Barqaror rivojlanish maqsadlariga erishishda xalqaro hamkorlikni kuchaytirish masalalariga alohida e’tibor qaratildi.Mazkur ikki tadbir BMT faoliyatining o‘zaro bog‘liq yo‘nalishlarini xalqaro tinchlik va xavfsizlikni ta’minlashga qaratilgan institutsional mexanizmlar hamda barqaror rivojlanish sohasidagi global va mahalliy tashabbuslarni amaliy jihatdan o‘rganish imkonini berdi. S. Usmanovaning mazkur tadbirlardagi ishtiroki xalqaro tashkilotlar faoliyatiga oid amaliy tajribani o‘rganish, xalqaro huquq ta’limida nazariya va amaliyot uyg‘unligini ta’minlash, shuningdek, olingan bilim va kuzatuvlarni JIDUning ilmiy-tadqiqot hamda ta’lim jarayonlariga tatbiq etishga xizmat qiladi.
