Joriy yilning 1-noyabr kuni Jahon iqtisodiyoti va diplomatiya universitetida “Diplomatic Synergy” klubi tashabbusi bilan “Buyuk Ipak Yo‘li” Sammiti tashkil etildi. Tadbirda universitet professor-o‘qituvchilari va talabalari bilan bir qatorda, mamlakatimizning turli hududlaridan tashrif buyurgan 10 ga yaqin oliy ta’lim muassasalari vakillari ham faol ishtirok etdilar.

Sammit doirasida dunyo siyosatidagi dolzarb jarayonlar, Buyuk Ipak Yo‘lining tarixiy va geosiyosiy ahamiyati, Markaziy Osiyoda iqtisodiy-diplomatik hamkorlikning zamonaviy shakllari, shuningdek, O‘zbekistonning mintaqaviy va global maydondagi o‘rni yuzasidan chuqur tahliliy muhokamalar olib borildi.

Muhokama va debatlar jarayoni ochiq fikrlilik, analitik yondashuv, va intellektual raqobat ruhida kechdi. Ishtirokchilar mintaqaviy hamkorlik, transport-logistika diplomatiyasi, madaniy almashinuv, global savdo yo‘laklari va axborot integratsiyasi kabi yo‘nalishlarda o‘z qarashlarini ilgari surdilar.

Tadbirning asosiy maqsadi:

Buyuk Ipak Yo‘lining tarixiy-madaniy merosini bugungi geosiyosiy jarayonlar bilan uyg‘un tahlil qilish;

Yoshlar orasida diplomatik fikrlash, muloqot madaniyati va analitik yondashuvni rivojlantirish;

Oliy ta’lim muassasalari o‘rtasida hamkorlik platformasini kengaytirish;

Global jarayonlarda O‘zbekiston yoshlarining faol ishtirokini rag‘batlantirish.

Tadbir yakunida sammit ishtirokchilari o‘zaro hamkorlikni yanada kengaytirish, ilmiy-analitik tashabbuslarni qo‘llab-quvvatlash hamda yoshlar o‘rtasida diplomatik madaniyatni rivojlantirish borasida kelgusidagi rejalarni belgilab oldilar. Ushbu sammit mintaqaviy muloqot va intellektual hamkorlikning yangi bosqichini boshlab berdi.