O‘zbekistonda Prezidentning PQ-171-sonli qarori bilan tasdiqlangan Ekologik sanalar bo‘yicha tadbirlar rejasiga muvofiq, Butunjahon tozalik kuni (World Cleanup Day) munosabati bilan aksiyalar o‘tkazish rejalashtirilgan.

Joriy yilning 10-oktabr kuni Jahon iqtisodiyoti va diplomatiya universitetida Ekologik klub faollari universitet talabalari ishtirokida plogging aksiyasini tashkil etdilar va o‘tkazdilar. Plogging - bu butun dunyo bo‘ylab ommalashgan sog‘lomlashtiruvchi va ekologik harakat bo‘lib, yugurish bilan axlat yig‘ishni uyg‘unlashtiradi.

Tadbir davomida ishtirokchilar yugurish paytida plastik, qog‘oz, metall va boshqa chiqindilarni yig‘ib, ularni keyinchalik qayta ishlash uchun saralashdi.

Aksiya ekologik madaniyatni oshirish, tabiatga mas’uliyatli munosabatni shakllantirish, jamoaviy ruhni rivojlantirish va Butunjahon tozalik kunining global tashabbusini qo‘llab-quvvatlashga qaratilgan edi. Bunday tadbirlar ekologik ma’rifat, sog‘lom turmush tarzini targ‘ib qilish va yoshlarni jipslashtirishda muhim ahamiyatga ega.

Mamlakatimiz oliy ta’lim muassasalarida shunday tadbirlarning muntazam o‘tkazilishi ekologik fikrlaydigan va faol avlodni tarbiyalashga xizmat qiladi.