Joriy yilning 13-oktabr kuni Jahon iqtisodiyoti va diplomatiya universitetida O‘zbekiston-Turkiya strategik ko‘rishlar forumi bo‘lib o‘tdi. Tadbir JIDU huzuridagi Istiqbolli xalqaro tadqiqotlar instituti (IXTI) tomonidan Ibn Xaldun universitetining (Istanbul, Turkiya) Haydar Aliyev nomidagi Yevroosiyo tadqiqotlari markazi bilan hamkorlikda Jahon bankining PRIM loyihasi MUNIS granti yordamida tashkil etildi.

Forum ikki davlat diplomatlari, tadqiqotchilari va olimlarini ikki tomonlama hamkorlikning yangi jihatlari, mintaqaviy xavfsizlik va global o‘zgarishlar sharoitida turkiy dunyoning transformatsiyasi masalalarini muhokama qilish uchun bir joyga to‘pladi.

Ochilish marosimida Oliy Majlis Senati Raisining birinchi o‘rinbosari, JIDU rektori Sodiq Safoyev, Turkiyaning O‘zbekistondagi Favqulodda va Muxtor elchisi doktor Ufuk Ulutash, Turkiy davlatlar tashkiloti Bosh kotibi o‘rinbosari Mirvohid Azimov, Ibn Xaldun universiteti prezidenti professor Atilla Arkan, shuningdek Turkiya Tashqi ishlar vazirligi Diplomatiya akademiyasi prezidenti va Anqara ijtimoiy fanlar universiteti rektori professor Mesut O‘zjan ma’ruza bilan chiqish qildilar. Ular o‘z nutqlarida Toshkent va Anqara o‘rtasidagi ta’lim diplomatiyasi, strategik muloqot va institutsional hamkorlikning turkiy hamjamiyatdagi uzoq muddatli sheriklik va umumiy farovonlikning harakatlantiruvchi kuchi sifatidagi hal qiluvchi ahamiyatini ta’kidlab o‘tdilar.

“O‘zbekiston-Turkiya: strategik hamkorlikning yangi ufqlari” nomli birinchi sessiya IXTI direktor o‘rinbosari Odil G‘afforov raisligida o‘tkazildi. Munozara davomida ishtirokchilar Markaziy Osiyoning o‘zgaruvchan geosiyosiy vaziyatida siyosiy muvofiqlashtirish strategik ahamiyatga ega ekanligini ta’kidladilar, Turkiyaning ko‘p qirrali diplomatiyasi va uning Markaziy Osiyoning mintaqaviy o‘ziga xosligini shakllantirishdagi rolini tahlil qildilar. Shuningdek, raqamli transformatsiya, infratuzilmani rivojlantirish va madaniy diplomatiya orqali O‘zbekiston-Turkiya hamkorligini yangi strategik darajaga ko‘tarish imkoniyatlari muhokama qilindi.

Professor Yashar Sari boshchiligidagi “Turkiy davlatlar tashkiloti a’zolari o‘rtasidagi xavfsizlik, o‘zaro aloqalar va ko‘p tomonlama munosabatlar” mavzusidagi ikkinchi sessiya TDTning mintaqaviy barqarorlikni ta’minlash va chegaralararo hamkorlikni kengaytirish uchun umumiy platforma sifatidagi rolini ko‘rib chiqdi. Ma’ruzachilar turkiy dunyo doirasidagi xavfsizlikni muvofiqlashtirish mexanizmlari va ularni keng qamrovli Yevrosiyo tuzilmalari bilan uyg‘unlashtirish masalalarini muhokama qildilar. Nutqlarda mintaqada tinchlik, o‘zaro aloqalar va inklyuziv rivojlanishni qo‘llab-quvvatlash uchun TDT orqali tizimli muloqot shakllarini yaratish va ko‘p tomonlama muvofiqlashtirishni kuchaytirish zarurligi alohida ta’kidlandi.

Uchinchi sessiya “Parchalangan dunyo tartibi sharoitida yo‘l toppish” JIDU professori Ulug‘bek Xasanov rahbarligida o‘tkazildi. Ishtirokchilar geosiyosiy tarqoqlikning kuchayishi sharoitida Turkiyaning moslashuvchan tashqi siyosat strategiyasini har tomonlama tahlil qildilar.

Forum doirasida turkiy va o‘zbek ilm-fanining so‘nggi yutuqlarini aks ettiruvchi kitoblar taqdimoti ham bo‘lib o‘tdi.

Tadbir yakunida Akademik ishlar bo‘yicha birinchi prorektor Akram Umarov va professor Yashar Sari barcha hamkorlar va ishtirokchilarga chuqur minnatdorchilik izhor etib, Forumning O‘zbekiston va Turkiya o‘rtasidagi strategik akademik muloqotni institutlashtirish yo‘lidagi muhim qadam ekanligini ta’kidladilar. Tadbir Turkiy davlatlar tashkiloti doirasida va keng Yevroosiyoda hamkorlik - o‘zaro ishonch, madaniy yaqinlik hamda yanada bog‘liq va barqaror kelajakka intilishga asoslangan sheriklik haqidagi umumiy qarashlarni tasdiqladi.