Joriy yilning 11-avgust kuni Jahon iqtisodiyoti va diplomatiya universitetida mamlakatimizda davlat boshqaruvi samaradorligini oshirish hamda barcha darajadagi davlat organlari va tashkilotlarda ijro intizomini yanada mustahkamlashga qaratilgan muhim tadbir bo‘lib o‘tdi. Ushbu tadbir O‘zbekiston Respublikasi Prezidentining 2025-yil 25-iyuldagi PF-117-sonli “Davlat organlari va tashkilotlarda ijro intizomini yanada mustahkamlashning qo‘shimcha chora-tadbirlari to‘g‘risida” Farmoni ijrosini ta’minlash doirasida tashkil etildi.

Seminarda Yoshlar masalalari va ma’naviy-ma’rifiy ishlar bo‘yicha birinchi prorektor O.Yusupdjanov boshchilik qildi. Tadbirga “Ijro.gov.uz” ijro intizomi idoralararo yagona elektron tizimida faol ishlayotgan barcha fakultet dekanlari, universitetning barcha tarkibiy bo‘limlari va markazlari rahbarlari, bo‘lim boshliqlari hamda mas’ul xodimlar taklif etildi. Bu esa masalani keng doirada muhokama qilish va barcha bo‘g‘inlarda ijro intizomini kuchaytirish choralarini birgalikda belgilash imkonini berdi.

Farmonning asosiy maqsadi — davlat organlari va tashkilotlari faoliyatida qonunlar, Prezident farmonlari va qarorlari, Vazirlar Mahkamasi hujjatlarini o‘z vaqtida va sifatli ijro etishda samarali nazorat mexanizmlarini joriy etish, ijro natijalarini aniq va shaffof hisobga olish, barcha darajadagi rahbarlar va xodimlarning shaxsiy mas’uliyatini oshirish, ijro intizomiga qat’iy rioya qilish madaniyatini shakllantirishdan iboratdir.

Seminar davomida ishtirokchilar “Ijro.gov.uz” tizimining texnik va funksional imkoniyatlari, unda hujjatlarni ro‘yxatdan o‘tkazish, ijro muddati va jarayonlarini nazorat qilish tartibi, shuningdek, kechikish yoki lozim darajada bajarilmagan topshiriqlar bo‘yicha javobgarlik mexanizmlari haqida batafsil ma’lumot oldilar. Shuningdek, tizim yordamida hujjatlarni elektron imzo bilan tasdiqlash, ijro jarayonida o‘zaro tezkor xabar almashish va hisobotlarni avtomatik shakllantirish imkoniyatlari alohida ta’kidlandi.

Tadbirda ijro intizomini mustahkamlash bo‘yicha ilg‘or tajribalar, mahalliy va xorijiy davlat organlarida qo‘llanilayotgan samarali boshqaruv uslublari ham o‘rganildi. Ishtirokchilar universitet miqyosida ham ushbu yondashuvlarni tatbiq etishning afzalliklari yuzasidan fikr almashdilar.

Seminar yakunida barcha fakultet va bo‘lim rahbarlariga Farmon talablarini amaliyotga joriy etish bo‘yicha aniq topshiriqlar berildi. Xususan:

har bir ijro hujjatini o‘z vaqtida va sifatli bajarish;

hujjatlar ijrosi bo‘yicha mas’ullarni shaxsiy javobgarlik asosida belgilash;

ijro intizomi buzilishi holatlarining oldini olish uchun muntazam ichki monitoring o‘tkazish;

“Ijro.gov.uz” tizimida ishlash bo‘yicha barcha xodimlarning malakasini oshirish.

Shuningdek, tadbir davomida universitetda ijro intizomini mustahkamlash bo‘yicha maxsus ishchi guruh faoliyatini kuchaytirish, jarayonlarni raqamlashtirish darajasini yanada oshirish, hamda hisobot berish tartibini soddalashtirish masalalari yuzasidan kelishuvlarga erishildi.

Ushbu seminar nafaqat ijro intizomini mustahkamlash, balki universitetda samarali boshqaruv, shaffoflik va mas’uliyatni oshirishga qaratilgan muhim qadam sifatida ham alohida ahamiyat kasb etdi.