2025-yil 7-may kuni Jahon iqtisodiyoti va diplomatiya universitetida Yevropa Ittifoqining O‘zbekistondagi elchisi janob Toyvo Klaar talabalarga ma’ruza qildi. Tadbir «Zamonaviy xalqaro munosabatlar, jahon iqtisodiyoti va O‘zbekiston manfaatlari» kursi doirasida o‘tkazildi va keng doiradagi qiziquvchilarni o‘ziga jalb etdi.

Ma’ruza davomida elchi yaqinda Samarqandda bo‘lib o‘tgan Yevropa Ittifoqi va Markaziy Osiyoning 2025-yilgi sammiti haqida batafsil ma’lumot berdi. U ushbu tadbirning Yevropa Ittifoqi va mintaqa mamlakatlari, jumladan, O‘zbekiston o‘rtasidagi siyosiy muloqotni mustahkamlash hamda iqtisodiy hamkorlikni kengaytirishdagi muhim ahamiyatini ta’kidladi.

Janob Klaar Yevropa Ittifoqi va O‘zbekiston o‘rtasidagi ikki tomonlama munosabatlarni rivojlantirish masalalariga alohida e’tibor qaratdi. U ma’ruza davomida hamkorlik strategiyasining asosiy yo‘nalishlarini, jumladan, savdo, investitsiyalar, barqaror rivojlanish, yashil energetika va inson huquqlarini eslatib o‘tdi. Shuningdek, elchi Yevropa Ittifoqi va O‘zbekiston xalqaro siyosatning dolzarb jihatlariga ham to‘xtalib o‘tdi.

Ma’ruzadan so‘ng talabalar o‘zlarini qiziqtirgan savollarni berish imkoniyatiga ega bo‘ldilar. Muloqot jonli va mazmunli tarzda kechdi - elchi barcha savollarga batafsil javob berdi, yoshlar bilan muloqot qilishda ochiqlik namoyish etdi.

Uchrashuv ta’lim jarayoniga qimmatli hissa qo‘shdi va talabalarga Yevropa Ittifoqining mintaqadagi tashqi siyosati ustuvor yo‘nalishlari, shuningdek, O‘zbekistonning zamonaviy xalqaro munosabatlar tizimidagi o‘rni haqida bevosita tasavvur hosil qilish imkonini berdi.