
Sharq Renessansi merosi bo‘lajak diplomat va iqtisodchilar nigohida: JIDU talabalarining Islom sivilizatsiyasi markaziga tashrifi
Sharq Renessansi merosi bo‘lajak diplomat va iqtisodchilar nigohida: JIDU talabalarining Islom sivilizatsiyasi markaziga tashrifi

2026-yil 13-noyabr kuni Jahon iqtisodiyoti va diplomatiya universiteti “Xalqaro iqtisodiyot va menejment” fakultetining 2-bosqich talabalari XIM seksiyasi ingliz tili o‘qituvchilari, N. B. Tashpulatova, R. A. Arslonbekova, D.I. Allaberganova, X. A. Axmadjanov, F. Sh. Zaripova, Z. N. Akmalova hamrohligida O‘zbekistondagi Islom sivilizatsiyasi markaziga madaniy-ma’rifiy ekskursiya uyushtirdilar. Mazkur tashrif yoshlarni ma’naviy-ma’rifiy ruhda tarbiyalash hamda madaniyatlararo muloqot ko‘nikmalarini rivojlantirish dasturi doirasida tashkil etildi.
Ekskursiya davomida bo‘lajak xalqaro iqtisodchilar ushbu noyob ilmiy-ma’rifiy majmuaning me’morchiligi va boy ekspozitsiyasi bilan yaqindan tanishdilar. Tashrif dasturi asosiy mavzuli bo‘limlarni qamrab oldi:
“Shon-sharaf zali” galereyasi. Ikkinchi kurs talabalari jahon ilm-fani va savdosi rivojiga asos solgan Sharqning buyuk alloma va mutafakkirlari — Al-Xorazmiy, Ibn Sino, Al-Beruniy va Al-Forobiylarga bag‘ishlangan mozaikali pannolar hamda multimedia installyatsiyalarini tomosha qildilar.
Tarixiy davrlar. Talabalar islomgacha bo‘lgan davr artefaktlari, shuningdek, Birinchi va Ikkinchi Sharq Renessansi davriga oid eksponatlar, jumladan, nodir qo‘lyozmalar, qadimiy tangalar va Sharq miniatyuralarini o‘rgandilar.
Muqaddas Qur’on zali. Zamonaviy interaktiv texnologiyalar yordamida namoyish etilgan eng qadimiy qo‘lyozmalar, xususan, VII asrga oid mashhur Usmon Mushafi ishtirokchilarda alohida taassurot qoldirdi.
XIM seksiyasi ingliz tili o‘qituvchilarining ishtiroki safarga qo‘shimcha amaliy ahamiyat bag‘ishladi. Ekskursiya davomida talabalar tarixiy va madaniy atamalar, muzey ekspozitsiyalari hamda milliy merosning xalqaro diplomatiyadagi o‘rnini ingliz tilida muhokama qildilar.




