JIDUda “Yagona Vatan, yagona xalq bo‘lib birgalikda — buyuk kelajak yaratamiz” mavzusida challenge o‘tkazildi

2026-yil 17-sentabr kuni Jahon iqtisodiyoti va diplomatiya universitetida O‘zbekiston Respublikasi Mustaqilligining 35 yilligiga bag‘ishlangan “Yagona Vatan, yagona xalq bo‘lib birgalikda — buyuk kelajak yaratamiz” mavzusida ma’naviy-ma’rifiy, ijtimoiy-psixologik va ijodiy challenge o‘tkazildi.

Tadbir yoshlar qalbida Vatanga muhabbat, milliy g‘urur va fuqarolik mas’uliyatini mustahkamlash, shuningdek, universitetda o‘zaro hurmat, do‘stona munosabat, jamoaviy birdamlik va psixologik farovonlikni rivojlantirishga qaratildi.

Challenge doirasida “Milliy qadriyatlar — milliy o‘zlik timsoli” targ‘ibot burchagi tashkil etilib, unda Mustaqillik, milliy qadriyatlar, Vatanga sadoqat, tinchlik va hamjihatlik g‘oyalari aks ettirildi. Shuningdek, yoshlar klublari va tashabbuslari taqdimotlari orqali talabalar universitetdagi mavjud imkoniyatlar bilan tanishtirildi.

Ijtimoiy-psixologik yo‘nalishda universitet psixologi Nargiza Norova tomonidan “Vatanim — faxrim, kelajagim — ishonchim” mavzusida interaktiv art-terapiya mashg‘uloti o‘tkazildi. Unda talabalar ijodiy topshiriqlar orqali Vatan, tinchlik, do‘stlik, hamjihatlik va kelajak haqidagi tasavvurlarini ifodaladilar.

Shuningdek, “She’r va xalq og‘zaki ijodida Vatan ruhi” mavzusidagi biblioterapiya mashg‘ulotida Vatanga muhabbat, tinchlik, birlik va ezgulikni tarannum etuvchi she’rlar, maqollar hamda hikmatli so‘zlar asosida fikr almashildi.

Mashg‘ulotlar davomida o‘zaro tinglash, fikrlarni hurmat qilish, erkin muloqot, hamkorlik va jamoaviylik kabi ijtimoiy-psixologik ko‘nikmalarga alohida e’tibor qaratildi. Shu orqali “Sog‘lom universitet” konsepsiyasining sog‘lom ijtimoiy muhit, inklyuzivlik, hamkorlik va psixologik farovonlik kabi yo‘nalishlari targ‘ib qilindi.

Tadbir yakunida faol, tashabbuskor va ijodiy yondashuv ko‘rsatgan talabalar sertifikat va esdalik sovg‘alari bilan taqdirlandi.

Mazkur challenge Vatanga daxldorlik, milliy qadriyatlar, jamoaviy birdamlik va psixologik farovonlik g‘oyalarini o‘zida mujassam etgan holda, universitetda sog‘lom va do‘stona muhitni rivojlantirishga xizmat qildi.