Jahon iqtisodiyoti va diplomatiya universitetida 1-bosqich talabalarini kutib olish va joylashtirish jarayonlari davom etmoqda!

Bugun, 6-sentabr kuni Jahon iqtisodiyoti va diplomatiya universitetida 1-bosqich talabalari uchun yangi o‘quv yiliga tayyorgarlik doirasida ularni munosib kutib olish va talabalar turar joylariga joylashtirish jarayonlari faol davom etmoqda.

Universitetga ilk bor qadam qo‘yayotgan yoshlarni kutib olish, ularni turar joy bilan ta’minlash, zarur ma’lumotlarni yetkazish, manzil va yo‘nalishlar bo‘yicha ko‘maklashish, shuningdek, yuzaga kelayotgan tashkiliy masalalarni tezkor hal etish maqsadida mas’ul xodimlar, faol talabalar va volontyorlar jalb etilgan. Mazkur jarayonda Talabalarni turar joy bilan ta’minlash bo‘yicha mas’ul xodimlar, Yoshlar ittifoqi faollari, “Qalqon” jamoatchilik guruhi a’zolari hamda volontyor talabalar faol ishtirok etib, yangi talabalarni kutib olish, ularni turar joylarga yo‘naltirish va joylashish jarayonida amaliy yordam ko‘rsatmoqda.

Ayniqsa, Toshkent shahriga boshqa hududlardan tahsil olish uchun kelgan talabalar uchun dastlabki kunlarda yo‘l-yo‘riq ko‘rsatish, talabalar turar joylariga joylashishida ko‘maklashish hamda yangi muhitga moslashib olishlari uchun zarur shart-sharoitlarni yaratishga alohida e’tibor qaratilmoqda. Talabalarni turar joy bilan ta’minlash imkoniyatlarini kengaytirish maqsadida universitetning o‘z talabalar turar joyi bilan bir qatorda, xostel va ijara xonadonlaridan ham foydalanilmoqda. Bu esa talabalarni imkon qadar qisqa muddatlarda turar joy bilan ta’minlash va ularning Toshkent shahridagi ilk kunlarini qulay tashkil etishga xizmat qilmoqda.

Aziz 1-bosqich talabalari!

Sizlarni Jahon iqtisodiyoti va diplomatiya universitetida samimiy kutib olamiz! Universitet jamoasi tomonidan sizning yangi muhitga moslashishingiz, turar joy bilan ta’minlanishingiz va talabalik hayotingizni qulay boshlashingiz uchun barcha zarur ko‘mak ko‘rsatilmoqda.

Xush kelibsiz, aziz talabalar!

JIDUdagi ilk kunlaringiz xayrli va unutilmas bo‘lsin!