Joriy yilning 08-may kuni Jahon iqtisodiyoti va diplomatiya universitetida an’anaviy “Ochiq eshiklar kuni” bo‘lib o‘tdi. Ushbu tadbir abituriyentlar va ularning ota-onalari uchun universitet bilan yaqindan tanishish, ta’lim dasturlari, qabul shartlari va talabalar hayoti bilan tanishish uchun ajoyib imkoniyat bo‘ldi.

 Tadbirda 1200 nafardan ortiq abituriyent, shuningdek, ularning ota-onalari va ta’lim muassasalari vakillari ishtirok etdi. “Ochiq eshiklar kuni”da Toshkent shahri, Toshkent viloyati hamda respublikaning boshqa hududlaridan kelgan 60 dan ortiq umumta’lim maktablari, shuningdek, 17 ta akademik litsey o‘quvchilari qatnashdi.

Tadbir davomida universitet faoliyati, uning tuzilishi, shartlari, o'quv rejasi, erishilgan yutuqlar va istiqbolli rejalar haqida ma'lumot berildi. Fakultet dekanlari ta'lim dasturlari, o'qitish xususiyatlari va bitiruvchilarni ish bilan ta'minlash istiqbollari haqida gapirib berishdi. Shuningdek, ular bo'lajak talabalarni qiziqtirgan barcha savollarga javob berishdi.

So‘ngra JIDU mehmonlari universitet hududi bo'ylab ekskursiya qilishdi, o'quv binolari, auditoriyalarni ko'zdan kechirishdi, kutubxona va sport majmuasiga tashrif buyurishdi.

“Ochiq eshiklar kuni” universitetning bo‘lajak abituriyentlar, ularning ota-onalari va ta’lim muassasalari vakillari bilan bevosita muloqot qilishida muhim platforma bo‘ldi. Tadbir yoshlarning JIDUda ta’lim olish imkoniyatlari haqidagi xabardorligini oshirish, xalqaro munosabatlar, diplomatiya, jahon iqtisodiyoti, huquq va siyosiy fanlar yo‘nalishlariga bo‘lgan qiziqishini kuchaytirish, shuningdek, universitetning respublika maktablari, kollej va litseylari bilan hamkorligini yanada rivojlantirishga xizmat qildi.