2026-yil 25-aprel kuni Jahon iqtisodiyoti va diplomatiya universitetida har yili an’anaviy tarzda o‘tkaziladigan “Say ‘Yes’ to Friendship!” nomli Madaniyatlararo muloqot festivali bo‘lib o‘tdi.

Festival Ingliz tili kafedrasi tomonidan birinchi bosqich talabalari ishtirokida loyiha ishi shaklida tashkil etildi. Bu yil talabalar 21 ta mamlakatni namoyish etdilar: O‘zbekiston, Germaniya, Saudiya Arabistoni, AQSh, Rossiya, Buyuk Britaniya, Meksika, Qozog‘iston, Xitoy, Gruziya, Hindiston, Gretsiya, Braziliya, Gruziya, Italiya, Armaniston, Janubiy Koreya, Misr, Ozarbayjon, Tojikiston va Turkiya. Butun tadbir ingliz tilida olib borildi va bu jonli xalqaro muloqot hamda madaniy almashinuv muhitini yaratdi.

Festival dasturidan madaniyat va milliy taomlar yarmarkasi, mamlakatlar taqdimotlari, sahnalashtirilgan chiqishlar, an’analar namoyishi, shuningdek, milliy raqs va qo‘shiqlar ijrosi o‘rin oldi. Har bir jamoa o‘z stendini ijodiy tarzda bezab, tanlangan mamlakatning taomlari, ramzlari, esdalik buyumlari va madaniy xususiyatlarini namoyish etdi.

Tadbirning faxriy mehmonlari qatorida Arman madaniyat markazi vakillari, mahalla vakillari, universitet professor-o‘qituvchilari, talabalarning ota-onalari hamda boshqa oliy ta’lim muassasalari talabalari ishtirok etdilar.

Festivalning eng yorqin lahzalari sifatida O‘zbekiston jamoasi tomonidan ijro etilgan lapar, Germaniya jamoasi tomonidan tayyorlangan intellektual viktorina va mamlakat haqidagi qiziqarli taqdimot, Italyan jamoasi tomonidan tayyorlangan skit, Amerika jamoasining Maykl Jeksonga bag‘ishlangan mashhur qo‘shiq va raqs chiqishi, Misr jamoasi tomonidan ijro etilgan maftunkor Tanura raqsi va qadimgi Misr liboslari namoyishi, Saudiya Arabistonidagi to‘y marosimlariga xos milliy raqslar, Buyuk Britaniya, Turkiya, Xitoy, Janubiy Koreya, Ozarbayjon, Hindiston, Qozog‘iston, Braziliya va Meksikaning milliy raqslari, shuningdek, Gretsiya, Armaniston va Tojikiston jamoalari tomonidan namoyish etilgan an’anaviy to‘y marosimlarini alohida ta’kidlash mumkin.

Barcha jamoalar yuqori darajadagi tayyorgarlik, san’atkorlik mahorati va namoyish etilgan mamlakatlar madaniyatiga chuqur qiziqishlarini ko‘rsatdilar. Ishtirokchilar yorqin liboslari, ijodiy yondashuvi va ushbu bayramning bosh ramziga aylangan do‘stlik muhiti bilan tomoshabinlarda katta taassurot qoldirdilar.

 “Say ‘Yes’ to Friendship!” festivali turli mamlakatlar yoshlari o‘rtasida madaniyatlararo o‘zaro anglashuv, jamoaviy ish va ochiq muloqotning naqadar muhim ekanini yana bir bor tasdiqladi.