2025-yil 18-dekabrdagi №295-T sonli buyruq ijrosini ta’minlash maqsadida universitetda inklyuziv ta’lim jarayonlarini rivojlantirish, Barqaror rivojlanish maqsadlari doirasida yaratilayotgan imkoniyatlarni samarali amalga oshirish hamda barcha talabalar uchun teng ta’lim muhitini shakllantirishga qaratilgan seminar-trening tashkil etildi.

Xususan, 2026-yil 6–7-yanvar kunlari universitet xodimlari uchun “Oliy ta’lim muassasalarida alohida ta’lim ehtiyojlari bo‘lgan talabalar bilan ishlash ko‘nikmalarini shakllantirish” mavzusida seminar-trening o‘tkazildi. Mazkur tadbir Toshkent shahridagi Sharoit plyus nogironlar jamoat birlashmasi bilan hamkorlikda tashkil etildi.

Seminar-trening davomida inklyuziv ta’limning zamonaviy modellari, alohida ta’lim ehtiyojlari bo‘lgan talabalar bilan samarali muloqot o‘rnatish, ularning ta’lim jarayonidagi ishtirokini ta’minlash mexanizmlari yuzasidan nazariy va amaliy bilimlar berildi. “Sharoit plyus” jamoat birlashmasi vakillari tomonidan ta’lim muhitini moslashtirish, o‘quv jarayonida individual yondashuvni ta’minlash, inklyuziv muloqot etikasi va psixologik yondashuvlarni kuchaytirish bo‘yicha aniq amaliy tavsiyalar taqdim etildi.

Amaliy mashg‘ulotlar jarayonida ishtirokchilar real vaziyatlar asosida ishlash orqali inklyuziv ta’lim modellari bilan batafsil tanishib, ularni oliy ta’lim muassasalari faoliyatiga joriy etish bo‘yicha ko‘nikmalarni mustahkamladi. Muhokamalar davomida oliy ta’lim muassasalarida inklyuziv ta’lim etikasi va madaniyatini rivojlantirish, xodimlarning psixologik tayyorgarligini oshirish hamda amaliy yondashuvlarni kuchaytirish zarurligi alohida ta’kidlandi.

Mazkur seminar-trening universitetda inklyuziv ta’lim muhitini izchil rivojlantirish, alohida ta’lim ehtiyojlari bo‘lgan talabalar uchun qulay shart-sharoitlar yaratish hamda Barqaror rivojlanish maqsadlariga erishishga qaratilgan tizimli ishlarning muhim bosqichi sifatida baholandi.