2026-yil 6-yanvar kuni Jahon iqtisodiyoti va diplomatiya universitetida o‘ziga xos akademik dastur — Markaziy Osiyo qishki maktabi o‘z ishini boshladi. Tadbir ishtirokchilar va mutaxassislarni bir joyga to‘plab, besh kunlik sermazmun ta’lim marafoniga start berdi.

Tadbirni kirish so‘zi bilan ochgan O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev ushbu tashabbus mintaqani chuqur o‘rganish va madaniyatlararo muloqotni rivojlantirish uchun muhim ahamiyatga ega ekanligini ta’kidladi. U maktab fikrlarni samarali almashish va Markaziy Osiyo dinamikasini tushunishga yangicha yondashuvlarni shakllantirish maydoni bo‘lishini qayd etdi.

Tadbirda quyidagilar ma’ruzalari bilan so‘zga chiqdilar:

JIDU Akademik ishlar bo‘yicha birinchi prorektori Akram Umarov “Markaziy Osiyo istiqboli: geografiya, chegaralar va mintaqaviy o‘ziga xoslik” mavzusida.

Istiqbolli xalqaro tadqiqotlar instituti (IXTI)ning Afg‘oniston va Janubiy Osiyoni o‘rganish markazi katta ilmiy xodimi Hamza Bo‘ltayev mintaqaviy jarayonlar haqidagi o‘zining ekspertlik qarashlarini bayon etdi.

Ma’lumot uchun. Jahon iqtisodiyoti va diplomatiya universitetining (JIDU) Markaziy Osiyo Qishki Maktabi — bu zamonaviy Markaziy Osiyoni shakllantiruvchi geosiyosiy, madaniy va iqtisodiy jarayonlarni chuqur tushunishga yo‘naltirilgan akademik tashabbusdir. Ushbu besh kunlik intensiv dastur mahalliy va xorijiy talabalarni madaniyatlararo muloqot, akademik almashinuv va mintaqaviy hamkorlikni rivojlantirish maqsadida ma’ruzalar, madaniy ekskursiyalar va interaktiv tadbirlar orqali birlashtirishni ko‘zlaydi.

O‘zbekistonning yetakchi ta’lim muassasalaridan biri sifatida JIDU bo‘lajak diplomatlar, siyosatchilar va xalqaro mutaxassislarini tayyorlashda muhim rol o‘ynaydi. Xalqaro munosabatlar, jahon iqtisodiyoti va xalqaro huquq sohalarida mutaxassislar tayyorlash maqsadida tashkil etilgan JIDU mintaqaviy va global muammolarni tanqidiy tahlil qiladigan, dinamik akademik muhitni taqdim etadi.

Universitetning ko‘p sohali yondashuvi va xalqaro hamkorliklari zamonaviy geosiyosiy tendensiyalarni tahlil qilish hamda mintaqaviy hamkorlik va global aloqalar uchun amaliy yechimlar ishlab chiqishga faol hissa qo‘shadi. Markaziy Osiyo Qishki Maktabini tashkil etish JIDUning akademik mukammallikka va mintaqaviy hamda xalqaro ahamiyatga ega masalalar bo‘yicha muloqotni rivojlantirishga bo‘lgan harakatini aks ettiradi.