2025-yil 1-dekabr kuni Jahon iqtisodiyoti va diplomatiya universitetida “Urikguli” taxallusi bilan tanilgan, mashhur eko-faol va bloger Mo‘tabar Xushvaqtova  ishtirokida talabalar uchun mahorat darsi bo‘lib o‘tdi.

Tadbirning asosiy maqsadi talabalarda ekologik madaniyat, zamonaviy ekologik muammolar va ularning yechimlari bo‘yicha chuqurroq tushunchani shakllantirish, shuningdek jamiyat hayotida ekologik tashabbuslarning ahamiyati haqida xabardorlikni oshirishdan iborat bo‘ldi.

Uchrashuv davomida M. Xushvaqtova ekologik ongni oshirish, mas’uliyatli iste’mol, chiqindilarni kamaytirish hamda qayta ishlash madaniyatini rivojlantirish borasidagi tajribasi bilan bo‘lishdi. U mahalliy va xalqaro amaliyotlardan hayotiy misollar keltirib, kichik ekologik odatlarning uzoq muddatli istiqbolda katta o‘zgarishlarga olib kelishi mumkinligini ta’kidladi.

Spiker talabalarni faol muloqotga chorlab, ular bilan ekologik yechimlar, yoshlarning “yashil” loyihalardagi ishtiroki hamda barqaror rivojlanish tamoyillarining zamonaviy jamiyatdagi o‘rni haqida fikr almashdi.

Shu kabi tadbirlar JIDUning ekologiya, barqaror rivojlanish va ijtimoiy mas’uliyatni targ‘ib qilishdagi faoliyatida muhim o’rin tutadi va talabalarning ekologik dunyoqarashini kengayishiga xizmat qiladi.