Turk tilini o‘qitish sifatini oshirish va xalqaro hamkorlikni kengaytirish maqsadida Jahon iqtisodiyoti va diplomatiya universiteti hamda Turkiya Respublikasining O‘zbekiston Respublikasidagi elchixonasi o‘rtasida yangi tashabbus amalga oshirildi. Kelishuvlar doirasida JIDU o‘quv jarayoniga xorijiy mutaxassislar - Sakarya universiteti turk tili va adabiyoti kafedrasi mudiri Yilmaz Dashchio‘g‘li va Kirklareli universiteti dotsenti Yasin Layla jalb etildi.

Mutaxassislarning universitetga tashrifi davomida 2025-yil 18-noyabrda taqdimot uchrashuvi bo‘lib o‘tdi. Tadbirda Akademik va o‘qituvchilar ishlari ofisi rahbari U.Do‘stov, Roman-german tillari kafedrasi mudiri V.Mamatkasimova va Xalqaro akademik hamkorlik ofisi xodimlari ishtirok etdi. Uchrashuv davomida hamkorlikdagi ishlarning asosiy yo‘nalishlari, xorijiy tajribani moslashtirish imkoniyatlari va turk tilini o‘qitishning zamonaviy metodikalari muhokama qilindi.

Erishilgan kelishuvlarga muvofiq, o‘quv jarayoniga amaliy mashg‘ulotlar, seminarlar, til va madaniyat bo‘yicha mahorat darslari, shuningdek, Turkiya mutaxassislari ishtirokida turli madaniy-ma’rifiy tadbirlar kiritiladi.

Universitet ushbu tashabbusga ta’lim jarayonini takomillashtirish, xalqaro aloqalarni mustahkamlash va talabalar uchun madaniyatlararo muloqot imkoniyatlarini kengaytirish yo‘lidagi muhim qadam sifatida qaraydi.