Joriy yilning 17-noyabr kuni Jahon iqtisodiyoti va diplomatiya universitetiga Beligiyaning nufuzli oliy ta’lim muassasalaridan biri – Gent universiteti vakillari: Siyosatshunoslik bo‘limi dotsenti - Gent Xalqaro va Yevropa Tadqiqotlari Instituti koordinatori Fabienne Bossuyt va Gent universiteti iqtisodiyot bo‘limi professori Koen Schoors tashrif buyurdi.

Tashrif doirasida mehmonlar JIDU Akademik ishlar bo‘yicha birinchi prorektori Akram Umarov bilan uchrashuv o‘tkazdilar.

Muzokaralar boshida Akram Umarov Gent universiteti vakillariga JIDU delegatsiyasi a’zolarini tanishtirdi va universitetning faoliyati, erishilgan yutuqlari, ilmiy-pedagogik salohiyati hamda xalqaro hamkorlikdagi ustuvor yo‘nalishlari haqida batafsil ma’lumot berdi.

Fabienne Bossuyt xonim o‘z universiteti va jamoasining ilmiy-tadqiqot faoliyati, akademik dasturlari hamda fakultetning o‘quv va ilmiy salohiyatini tanishtirdi. Shundan so‘ng, Gent universitetida xorijiy talabalar uchun yaratilgan sharoitlar, almashinuv dasturlari, ilmiy loyihalar hamda boshqa tegishli yo‘nalishlar bo‘yicha mazmunli taqdimotlar JIDU delegatsiyasiga taqdim etildi va uzoq muddatli hamkorlik masalalari muhokama qildilar.

O‘z navbatida Akram Umarov JIDUning ikki tomonlama hamkorlikka tayyorligini bildirib, universitetlar o‘rtasidagi strategik aloqalarni mustahkamlash va kengaytirish istiqbollari bo‘yicha takliflar ilgari surdi. U uchrashuv doirasida, xususan, talabalar almashinuv dasturlari, yozgi va qishki maktablar kabi ta’lim yo‘nalishlarini muhokama qilib, ushbu dasturlar orqali talabalar va professor-o‘qituvchilar o‘rtasidagi tajriba almashinuvi va bilim ko‘nikmalarini rivojlantirish imkoniyatlarini ta’kidlab o‘tdi.

Uchrashuv yakunida tomonlar o‘zaro hamkorlikning kelgusida yanada samarali, tizimli va barqaror rivojlanishiga ishonch bildirdilar hamda universitetlar o‘rtasidagi aloqalarni mustahkamlash va kengaytirish bo‘yicha kelishuvga erishdilar.

Shu bilan birga, Belgiyalik professorlar tomonidan Xalqaro munosabatlar hamda Xalqaro iqtisodiyot va menejment fakulteti talabalariga mehmon ma’ruzalar tasgkil etildi.

Ma’ruza davomida talabalar iqtisodiy inqirozlar, moliyaviy tizimning dolzarb muammolari, iqtisodiy siyosat hamda ekologik talablar bo‘yicha faol savollar berishdi. Shuningdek, Gent universitetidagi ta’lim va tadqiqot imkoniyatlariga qiziqish bildirishdi. Professorlar kelgusi hamkorlik va ta’lim loyihalari bo‘yicha rejalarini ham ulashdi.