Joriy yilning 13-noyabr kuni Jahon iqtisodiyoti va diplomatiya universiteti Yoshlar masalalari va ma‘naviy-marifiy ishlar bo‘yicha birinchi prorektori O.Yusupdjanov va “Xalqaro huquq va ommaviy huquq fanlari” kafedrasi katta o‘qituvchisi D.Soliyev tashabbusi bilan “Xalqaro huquq” fakulteti 2- va 3-kurs talabalari uchun Jinoyat ishlari bo‘yicha Mirzo Ulug‘bek tuman sudida amaliy dars tashkil etildi. Bu tashabbus nazariy bilimlarni amaliyot bilan bog‘lashga qaratilgan bo‘lib, talabalarning kasbiy mahoratini oshirishga xizmat qiladi.

Amaliy darslar doirasida bo‘lajak xalqaro huquqshunoslarga O‘zbekistonning milliy sud tizimi, jinoyat huquqi va jinoyat-protsessual qonunchiligining amalda qo‘llanilishi bilan yaqindan tanishish imkoniyati berildi. Talabalar haqiqiy sud muhitini his qilish, sud majlisining tartib-qoidalari, ishtirokchilarning vakolatlari va sud etikasi haqida chuqur tushunchaga ega bo‘lishdi.

Sud majlisida talabalar O‘zbekiston Respublikasi Jinoyat kodeksining quyidagi moddalari bo‘yicha ko‘rib chiqilgan ishlar bilan tanishdilar:

Jinoyat kodeksining 276-moddasi: Giyovandlik vositalari, ularning analoglari yoki psixotrop moddalarni oʻtkazish maqsadini koʻzlamay qonunga xilof ravishda tayyorlash, egallash, saqlash va boshqa harakatlar.

Jinoyat kodeksining 126¹-moddasi: Oilaviy(maishiy) zo‘ravonlik.

Talabalar ko‘rib chiqilgan ishlar misolida dalillarni tekshirish, guvohlarni so‘roq qilish, prokurorning ayblov nutqi va himoyachining himoya nutqini tinglash jarayonlarini bevosita kuzatishdi. Bu, ayniqsa, xalqaro huquqni milliy huquq bilan o‘zaro bog‘liqligini o‘rganishda katta amaliy ahamiyatga ega bo‘ldi.