Jahon iqtisodiyoti va diplomatiya universitetida Mentorlik dasturi va uning amalga oshirishga doir  tasdiqlangan Rejaga  asoslanib Xotin-qizlar maslahat kengashi doirasida tashkil etilgan “Lider qizlar klubi” o‘z faoliyatini boshladi. Klubning asosiy maqsadi – iqtidorli va tashabbuskor qizlarni qo‘llab-quvvatlash, ularda liderlik salohiyatini rivojlantirish, shuningdek, yoshlarning ijtimoiy hayotda faol ishtirokini ta’minlashdan iboratdir.

Tanishtiruv soati Universitet Xotin-qizlar maslahat kengashi tashabbusi bilan tashkil etildi. Tadbir davomida ishtirokchilar klub faoliyatining asosiy yo‘nalishlari, kelgusida amalga oshiriladigan loyihalar hamda yosh qizlarning rivojlanishiga qaratilgan tashabbuslar bilan yaqindan tanishdilar.

Xotin-qizlar maslahat kengashi raisi professor E.Sultonova o‘z nutqida shunday ta’kidladi:

— “Bugungi tashabbus — yosh qizlarimizning bilim, salohiyat va imkoniyatlarini yuzaga chiqarish, ularda liderlik ko‘nikmalarini shakllantirish yo‘lidagi muhim qadamdir. Bizning asosiy maqsadimiz — kelajakda jamiyatda faol, bilimli va mas’uliyatli ayollar safini kengaytirishdir.”

Tadbirda shuningdek universitet professor-o‘qituvchilar ham ishtirok etib, “Lider qizlar klubi” yoshlarning ijodiy, ilmiy va tashkiliy faoliyatini qo‘llab-quvvatlashda muhim maydon bo‘lishini ta’kidladilar.

Mazkur tashabbus yoshlar, ayniqsa, xotin-qizlarning intellektual va ijtimoiy faolligini oshirish, ularda mustaqil fikrlash, tashabbuskorlik hamda liderlik qobiliyatlarini shakllantirishga xizmat qiladi.