JIDU tadqiqotchilari davlat hamkorlari bilan birgalikda o‘zbek migratsiyasini Janubiy Koreya va Yaponiya misolida o‘rganmoqda

Jahon iqtisodiyoti va diplomatiya universiteti huzuridagi Istiqbolli xalqaro tadqiqotlar instituti 2025-yil 1-yanvardan 31-dekabrga qadar “Markaziy Osiyodan Sharqiy Osiyoga migratsiya kontekstida: o‘zbek migratsiyasining Janubiy Koreya va Yaponiya misolidagi qiyosiy tahlili” mavzusidagi siyosatga yo‘naltirilgan tadqiqot loyihasini amalga oshirmoqda. Loyiha Koreya fondi (Korea Foundation) bilan hamkorlikda amalga oshirilmoqda.

Sharqiy Osiyo, xususan Janubiy Koreya va Yaponiya, mehnat qilish va ta’lim olish uchun xorijga chiqayotgan O‘zbekiston fuqarolari uchun muhim yo‘nalishga aylanib bormoqda.

O‘zbekistonda yoshlar soni ortib, iqtisodiy bosim kuchaymoqda. Mamlakat mehnat va ta’lim migratsiyasini boshqarishning samarali yo‘llarini izlamoqda, Sharqiy Osiyodagi hamkorlari bilan ikki tomonlama hamkorlikni mustahkamlashga intilmoqda. Loyiha ushbu maqsadlarni ilmiy dalillar bilan qo‘llab-quvvatlashga qaratilgan.

Loyihaga JIDUning ilm-fan va innovatsiyalar bo‘yicha prorektori, institutning katta assotsiatsiyalangan ilmiy xodimi, professor Timur Dadabayev rahbarlik qilmoqda. Tadqiqot guruhi tarkibiga t.f.d. Azamat Seitov, Mehriniso Abdurasulova, Jasur Soipov va Nigora Djalilova kiradi.

Tadqiqot mehnat migratsiyasi bilan ishlash uchun mas’ul davlat organlari, jumladan,

O‘zbekiston Respublikasi Kambag‘allikni qisqartirish va bandlik vazirligi hamda Tashqi ishlar vazirligi bilan hamkorlikda olib borilmoqda. Ish uchta asosiy yo‘nalishdan iborat:

· Manfaatdor tomonlarni aniqlash: mehnat migratsiyasi va diaspora bilan aloqalar qanday boshqarilishi bo‘yicha ushbu davlat organlari bilan suhbatlar;

· Migrantlar bilan tadqiqot: Janubiy Koreya va Yaponiyadagi o‘zbek migrantlari bilan ularning tajribasi, duch kelayotgan qiyinchiliklari va istiqbollari haqida yuzma-yuz va onlayn suhbatlar;

· Siyosatning qiyosiy tahlili: Janubiy Koreya va Yaponiyaning migratsiya tizimlarini taqqoslash hamda ularning o‘zbek migrantlarining integratsiyasiga ta’sirini  

o‘rganish.

Loyihaning asosiy maqsadi amaliy ahamiyatga ega. Tadqiqot natijalari asosida

O‘zbekistonda mehnat migratsiyasini boshqarishni takomillashtirish hamda qabul qiluvchi mamlakatlarda o‘zbek migrantlarining integratsiyasini yaxshilash bo‘yicha siyosiy tavsiyalar ishlab chiqiladi. Batafsil tahliliy hisobot O‘zbekistonning tegishli davlat organlariga va Koreya fondiga taqdim etiladi. Shuningdek, Koreya va Yaponiyadagi migratsiya jarayonlarining qiyosiy dinamikasiga bag‘ishlangan xalqaro seminar o‘tkazish hamda Asian Survey, Pacific Review va Journal of Eurasian Studies xalqaro jurnallarida maqolalar chop etish rejalashtirilgan.

Loyiha institutning akademik tadqiqotlarni siyosat ishlab chiqish jarayoni bilan bog‘lash missiyasini aks ettiradi va Barqaror rivojlanish maqsadlarining 16-maqsadi — “Tinchlik, adolat va samarali institutlar”ga hissa qo‘shadi.