2026 yil 9 aprel kuni “Harbiy-siyosiy diplomatiya” o‘quv fani doirasida O‘zbekiston Respublikasi Ichki ishlar vazirligi xodimi -  podpolkovnik Berdiev Zohid Zokirovich ishtirokida ochiq mahorat darsi tashkil etildi.

Tadbir davomida podpolkovnik Z. Berdiev ichki ishlar organlarining tuzilmasi va asosiy faoliyat yo‘nalishlari bo‘yicha keng qamrovli tahlilni taqdim etdi hamda ularning jamoat xavfsizligini ta’minlash va huquq-tartibotni saqlashdagi muhim rolini alohida ta’kidladi. Shuningdek, zamonaviy global va mintaqaviy tahdidlar sharoitida davlat institutlari o‘rtasidagi hamkorlik masalalariga alohida e’tibor qaratildi.

Mahorat darsining alohida qismi O‘zbekiston Respublikasining tashqi siyosiy yo‘nalishiga bag‘ishlandi. Ta’kidlanganidek, davlat harbiy bloklarga qo‘shilmaslik tamoyiliga izchil amal qilib, muvozanatli, pragmatik va tinchlikparvar tashqi siyosatni amalga oshirmoqda hamda bu orqali mintaqaviy barqarorlikni mustahkamlash va xalqaro hamkorlikni rivojlantirishga xizmat qilmoqda.

Shuningdek, ma’ruza davomida kiberxavfsizlikni ta’minlashning dolzarb jihatlari ham ko‘rib chiqildi. Podpolkovnik Z. Berdiev raqamli makondagi zamonaviy tahdidlarni yoritib berdi hamda ularning oldini olish va samarali qarshi kurashish maqsadida ichki ishlar organlari tomonidan amalga oshirilayotgan chora-tadbirlar majmuasini so’zlab berdi.

Bundan tashqari, talabalarga uyushgan jinoyatchilikni aniqlash va fosh etish mexanizmlari, jumladan zamonaviy texnologik yechimlardan foydalanish va idoralararo hamkorlikni rivojlantirish masalalari bo‘yicha tizimli ma’lumot berildi.

Tadbir ochiq muloqot shaklida o‘tkazilib, talabalar muhokamalarda faol ishtirok etdilar hamda mutaxassisdan dolzarb savollariga batafsil javoblar olish imkoniyatiga ega bo‘ldilar.

Bunday tadbirlar universitet va tashkilotlar o‘rtasidagi hamkorlikni mustahkamlashga, shuningdek, xalqaro munosabatlar sohasida kelajak mutaxassislarining kasbiy tayyorgarligini oshirishga xizmat qiladi.