Joriy yilning 26-noyabr kuni Jahon iqtisodiyoti va diplomatiya universitetida AQShning Toshkentdagi elchixonasi tomonidan to‘liq moliyalashtiriladigan Young Professional Internships Program (YPIP) amaliyot dasturining taqdimoti bo‘lib o‘tdi. Tadbir biznes yoki STEM sohasida amaliy tajriba orttirish va kasbiy ko‘nikmalarni rivojlantirish istagida bo‘lgan 3-4 kurs talabalari uchun tashkil etildi.

Taqdimotni Toshkentdagi American Councils for International Education’ning YPIP dasturi koordinatori Aziza Nuriddinova o‘tkazdi. U ishtirokchilarga dastur modelini taqdim etib, talabalar ega bo‘ladigan asosiy imkoniyatlar haqida so‘zlab berdi: Toshkentning yetakchi kompaniyalarida to‘liq yozgi amaliyot o‘tash, professional treninglar, mutaxassislar bilan uchrashuvlar, muntazam mentorlik sessiyalari va netvorking tadbirlarida ishtirok etish. Shuningdek, spiker hujjat topshirish jarayoni, nomzodlarga qo‘yiladigan talablar, saralash bosqichlari va 2026-yil yoziga mo‘ljallangan dasturning dastlabki jadvali haqida batafsil ma’lumot berdi.

Talabalar muhokamada faol ishtirok etib, hamkor kompaniyalarni tanlash, ular egallashi mumkin bo‘lgan kasbiy ko‘nikmalar, shuningdek, kelajakdagi karyera istiqbollari haqida savollar berishdi.

Tadbir axborot va rag‘batlantiruvchi muhitda o‘tkazilib, talabalarga O‘zbekistondagi eng nufuzli kasbiy rivojlanish dasturlaridan biri bilan yaqindan tanishish imkonini berdi.