2025-yil 14-noyabr kuni British Management University (BMU) universitetida NAII, Freedom Broker va BMU tomonidan tashkil etilgan “Investment Challenge 2025” tanlovining yakuniy bosqichi bo‘lib o‘tdi. Tadbir yetakchi oliygohlardan iqtidorli talabalarni bir joyga to‘plab, ularga moliyaviy savodxonlik, investitsion tahlil va strategik fikrlash ko‘nikmalarini namoyish etish imkonini yaratdi.

Jahon iqtisodiyoti va diplomatiya universiteti (JIDU)ning “Xalqaro iqtisodiyot va menejment” fakulteti 3-bosqich talabalari ushbu musobaqada yuqori natijalarga erishdi. “UWED Team B” jamoasi 18 ta jamoa orasida o‘tkazilgan Sertifikatlangan moliyaviy tahlilchi (CFA) baholashida 1-o‘rinni qo‘lga kiritdi.

G‘oliblar sertifikatlar, qimmatbaho sovrinlar hamda kelajakdagi kasbiy rivojlanishlari uchun qo‘shimcha imkoniyatlar bilan taqdirlandi. Xususan, ularga Kapitalbank va Portfolio Investments kompaniyalarida amaliyot va ish takliflari taqdim etildi. Bu esa ularning tayyorgarligi va moliyaviy sohadagi salohiyati yuqori ekanini yana bir bor tasdiqladi.

Tadbir nafaqat musobaqa, balki sanoat vakillari bilan muloqot qilish, tarmoqda o‘z o‘rnini topish va kelajakdagi kasbiy yo‘nalishni belgilash uchun muhim maydon bo‘lib xizmat qildi.