Ta'limning yuqori sifati

Jahon iqtisodiyoti va diplomatiya universitetining bakalavriat dasturlari talabalarda global jarayonlarni chuqur anglash, murakkab masalalarni tahlil qilish hamda xalqaro darajada samarali faoliyat yuritish uchun zarur bo‘lgan fundamental bilim, amaliy ko‘nikma va zamonaviy dunyoqarashni shakllantiradi. Ta’lim jarayoni nazariy bilimlar, amaliy tayyorgarlik va fanlararo yondashuv uyg‘unligida tashkil etilgan. Bakalavriat bosqichida universitet quyidagi asosiy ta’lim yo‘nalishlarini taklif etadi: Xalqaro munosabatlar; Siyosatshunoslik; Jahon iqtisodiyoti va xalqaro iqtisodiy munosabatlar; Xalqaro-huquqiy faoliyat yo‘nalishidagi yurisprudensiya. Har bir dastur davlat boshqaruvi, diplomatiya, xalqaro hamkorlik, tahliliy faoliyat va zamonaviy mehnat bozori ehtiyojlarini hisobga olgan holda ishlab chiqilgan. Asosiy kompetensiyalar JIDU bakalavriat dasturlari bitiruvchilarda quyidagi kompetensiyalarni shakllantiradi: analitik va tanqidiy fikrlash; xalqaro siyosiy, iqtisodiy va huquqiy jarayonlarni tushunish; dalillarga asoslangan qaror qabul qilish; tadqiqot olib borish va ma’lumotlar bilan ishlash; professional yozma va og‘zaki muloqot; madaniyatlararo hamkorlik; hamda davlat, xususiy va xalqaro sektorlar uchun zarur bo‘lgan amaliy kasbiy tayyorgarlik. Ta’lim jarayonida talabalar akademik mobillik dasturlari, amaliyot, yetakchi mutaxassislar va ekspertlar bilan uchrashuvlar, ilmiy izlanishlar hamda loyiha faoliyati orqali o‘z bilim va ko‘nikmalarini amaliy muhitda rivojlantiradilar. Bu esa ularda mustaqil fikrlash, moslashuvchanlik, strategik yondashuv va professional mas’uliyatni yanada kuchaytiradi. Natijada bitiruvchilar milliy va xalqaro darajada raqobatbardosh, tashabbuskor, zamonaviy va yuqori malakali mutaxassislar sifatida shakllanadilar. Universitetda talabalarga ikkinchi xorijiy til sifatida 12 ta til ichidan tanlov qilish imkoniyati ham yaratilgan. Quyida bakalavriat dasturlari bilan tanishishingiz mumkin. Til yo‘nalishidagi fanlar Sillabus: Rus tili I,II (2025) Sillabus: O‘zbek tili I , II (2025) SHARQ TILLARI SILLABUSLARI (Barcha ta’lim yo‘nalishlari uchun) 2025 Ikkinchi chet tili sillabuslari, 2025/26 (Romano-german tillari) 2025/26 Ta’lim dasturlari bo‘yicha o‘quv jadvallari 2025/2026 o‘quv yili uchun akademik kalendar va amaliyot jadvali

Batafsil

JIDU'da o'qing

Jahon iqtisodiyoti va diplomatiya universiteti 1992-yil 23-sentabrda tashkil etilgan boʻlib, Oʻzbekiston Respublikasi Tashqi ishlar vazirligi qoshida faoliyat yuritadi.

Bu oliy taʼlim muassasasi boʻlib, mutaxassislar va ilmiy kengashni tayyorlash, qayta tayyorlash va ularning malakasini oshirish hamda quyidagi yoʻnalishlarda yuqori darajadagi fundamental va amaliy tadqiqotlar olib boradi:

Xalqaro iqtisodiyot va menejment;
Xalqaro munosabatlar va siyosatshunoslik;
Xalqaro ommaviy va xususiy huquq;
Yurisprudensiya.

Batafsil

Yangiliklar

Barcha yangiliklar

18.08.2026

JIDUda “Samarali va kuchli ijtimoiy siyosatni shakllantirishda parlamentlarning roli” mavzusida xalqaro anjuman bo‘lib o‘tdi

2026-yil 18-avgust kuni Jahon iqtisodiyoti va diplomatiya universitetida O‘zbekiston Respublikasi Tashqi ishlar vazirligi huzuridagi Tashqi siyosiy tadqiqotlar va xalqaro tashabbuslar markazi hamda JIDU qoshidagi Istiqbolli xalqaro tadqiqotlar instituti hamkorligida “Samarali va kuchli ijtimoiy siyosatni shakllantirishda parlamentlarning roli” mavzusida xalqaro anjuman o‘tkazildi. Anjuman O‘zbekiston Respublikasi Prezidenti Shavkat Mirziyoyev tashabbusi bilan 2026-yil 24-iyulda qabul qilingan BMT Bosh Assambleyasining “Ijtimoiy rivojlanishni jadallashtirishda parlamentlar rolini kuchaytirish to‘g‘risida”gi yangi rezolyutsiyasining amaliy ijrosini muhokama qilishga bag‘ishlandi. Anjuman ishida Oliy Majlis Senati va Qonunchilik palatasi, Tashqi ishlar vazirligi, mamlakatimizning yetakchi tahliliy markazlari va universitetlari, BMT tizimi, diplomatik korpus vakillari, shuningdek, O‘zbekiston Respublikasida akkreditatsiyadan o‘tgan 20 dan ortiq xorijiy davlat elchixonalari vakillari ishtirok etdi. O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev, BMTning O‘zbekistondagi doimiy koordinatori Sabine Maxl, Oliy Majlis Qonunchilik palatasining Xalqaro ishlar va parlamentlararo aloqalar, mudofaa va xavfsizlik masalalari qo‘mitasi raisi Ulug‘bek Shermatov hamda TST va XT markazi direktorining o‘rinbosari Valijon Hoshimov tabrik so‘zi bilan chiqish qildi. Oliy Majlis Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi Alisher A’zamxo‘jayev asosiy ma’ruza bilan so‘zga chiqdi. So‘zga chiqqanlar samarali ijtimoiy siyosatni shakllantirish, Barqaror rivojlanish maqsadlariga erishish, ijtimoiy adolatni mustahkamlash, shuningdek, xalqaro va parlamentlararo hamkorlikni rivojlantirishda parlamentlarning muhim o‘rni borligini ta’kidladilar. Anjumanning birinchi sessiyasi doirasida davlat ijtimoiy siyosatining qonunchilik ta’minoti, 2030-yilgacha Barqaror rivojlanish maqsadlariga erishishda parlamentlarning roli, parlament faoliyati ochiqligini oshirish hamda fuqarolik jamiyati bilan o‘zaro hamkorlikni mustahkamlash masalalari muhokama qilindi. Ishtirokchilar ijtimoiy siyosatni amalga oshirishda parlament ishtirokining zamonaviy yondashuvlarini ko‘rib chiqib, ijtimoiy rivojlanish maqsadlariga erishishda qonunchilik va jamoatchilik mexanizmlarining o‘rni haqida fikr almashdilar. Ikkinchi sessiya davomida Barqaror rivojlanish maqsadlariga erishishda parlamentlararo hamkorlikning o‘rni, parlamentlarning BMT tizimi muassasalari va xalqaro tashkilotlar bilan o‘zaro hamkorligi, shuningdek, ijtimoiy tashabbuslarni amalga oshirish va aholi turmush sifatini oshirishda xalqaro hamkorlik istiqbollari ko‘rib chiqildi. Tegishli rezolyutsiyani qabul qilish tashabbusi O‘zbekiston rahbari tomonidan 2020-yil sentyabr oyida, COVID-19 pandemiyasi avjiga chiqqan bir paytda, BMT Bosh Assambleyasining 75-sessiyasi umumiy munozaralari chog‘ida ilgari surilgan edi. Inqiroz davrida yuzaga kelgan qiyinchiliklar fonida qabul qilingan rezolyutsiya Barqaror rivojlanish maqsadlariga erishish va BMTning 2030-yilgacha bo‘lgan kun tartibini amalga oshirish, ijtimoiy adolatni mustahkamlash, xotin-qizlar va yoshlarning qonunchilik faoliyatidagi ishtirokini kengaytirish hamda ijtimoiy sohada xalqaro hamkorlikni rivojlantirishda parlamentlarning roli ortib borayotganini tasdiqladi. Hujjatda O‘zbekistonning parlament diplomatiyasini rivojlantirishga qo‘shayotgan hissasi alohida qayd etilgan. Xususan, Toshkentda Parlamentlararo ittifoqning 150-Assambleyasi o‘tkazilgani va uning yakunlari bo‘yicha ijtimoiy taraqqiyot va ijtimoiy adolat yo‘lidagi parlament harakatlari to‘g‘risidagi Toshkent deklaratsiyasi qabul qilingani yuqori baholandi. Rezolyutsiyani tayyorlashdan avval keng ko‘lamli diplomatik ishlar amalga oshirilib, BMTga a’zo 60 dan ortiq davlat vakillari ishtirokida beshta rasmiy va 50 dan ortiq norasmiy maslahatlashuvlar o‘tkazildi. Hujjatga dunyoning barcha mintaqalaridan 61 davlat, jumladan, Avstriya, Belgiya, Germaniya, Ispaniya, Braziliya, Vyetnam, Malayziya, Singapur, Marokash, Tanzaniya, Uganda, Maldiv orollari va Papua – Yangi Gvineya hammualliflik qildi. Anjuman ishtirokchilari, shuningdek, ijtimoiy siyosatning qonunchilik ta’minotiga doir zamonaviy yondashuvlarni, parlament diplomatiyasini rivojlantirish, qonun chiqaruvchi organlarning BMT tizimi va xalqaro tashkilotlar bilan o‘zaro hamkorligi, aholi turmush sifatini oshirish yo‘lida xalqaro hamkorlikni kengaytirish mexanizmlarini muhokama qildilar. Anjuman yakunida ijtimoiy rivojlanish bo‘yicha xalqaro kun tartibini amalga oshirishda parlamentlar ishtirokini kengaytirish, parlament diplomatiyasini mustahkamlash hamda Barqaror rivojlanish maqsadlariga erishish yo‘lida qonun chiqaruvchi organlar, BMT tizimi va ekspertlar hamjamiyati o‘rtasidagi hamkorlikni rivojlantirish bo‘yicha istiqbolli yo‘nalishlar va amaliy tavsiyalar belgilab olindi.

16.08.2026

“Ishonch maktabi”: Inklyuziv ta’lim — teng imkoniyatlar va yuksak kasbiy salohiyat asosi

2026-yil 11–14-avgust kunlari Yangiyo‘l shahrida ko‘rish bo‘yicha nogironligi bo‘lgan pedagoglar uchun “Ishonch maktabi” o‘quv-amaliy seminari tashkil etildi. Mazkur seminar Oliy Majlis huzuridagi Fuqarolik jamiyatini qo‘llab-quvvatlash jamoat fondi hamda O‘zbekiston Ko‘zi Ojizlar Jamiyati Markaziy boshqaruvi tomonidan tashkil etildi. Tadbir ko‘rish bo‘yicha nogironligi bo‘lgan pedagoglarning kasbiy salohiyatini rivojlantirish, zamonaviy ta’lim va raqamli texnologiyalardan foydalanish imkoniyatlarini kengaytirish, kasbiy mustaqilligini mustahkamlash hamda inklyuziv ta’lim tamoyillarini amaliyotga tatbiq etishga qaratildi. Seminar O‘zbekiston Respublikasida teng imkoniyatlar, inson huquqlari, kamsitmaslik va ijtimoiy inklyuziya tamoyillarini mustahkamlashga qaratilgan davlat siyosatining ustuvor yo‘nalishlari hamda Birlashgan Millatlar Tashkilotining Barqaror rivojlanish maqsadlari, xususan, “Sifatli ta’lim” va “Tengsizlikni kamaytirish” yo‘nalishlari bilan uyg‘un holda tashkil etildi. Tadbirda Jahon iqtisodiyoti va diplomatiya universiteti psixologi Nargiza Norova hamda 3-bosqich talabasi Inklyuziya klubi koordinatori Davlatova Kamola ishtirok etdi. N.Norova inklyuziv muhitni shakllantirishning ijtimoiy-psixologik jihatlari yuzasidan mazmunli nutq so‘zladi. U o‘z nutqida talaba-yoshlarning inklyuziv ta’lim va inklyuziv jamiyatni rivojlantirishdagi o‘rni, tengdoshlarni qo‘llab-quvvatlash, bag‘rikenglik, o‘zaro hurmat va yoshlarning ijtimoiy mas’uliyati masalalariga to‘xtaldi. K.Davlatova yoshlarning inklyuziv madaniyatni shakllantirishdagi faolligi, teng imkoniyatlarni qo‘llab-quvvatlashga qaratilgan tashabbuslari va ijtimoiy mas’uliyatining ahamiyatini ta’kidladi. Shuningdek, jamiyatdagi stereotip va ijtimoiy to‘siqlarni kamaytirish, empatiya, o‘zaro hurmat va inklyuziv madaniyatni rivojlantirishning psixologik jihatlarini yoritdi. Tadbir davomida inklyuziv ta’limni rivojlantirish, pedagoglarning kasbiy kompetensiyalarini oshirish, zamonaviy va raqamli texnologiyalardan samarali foydalanish, kasbiy mustaqillikni mustahkamlash, psixologik qo‘llab-quvvatlash hamda ta’lim muhitida teng imkoniyatlarni ta’minlash masalalariga alohida e’tibor qaratildi. Ta’kidlanganidek, inklyuziv muhitni shakllantirish faqat jismoniy va texnik shart-sharoitlarni yaratish bilan cheklanmaydi. Shaxsning o‘zini qadrlangan, tinglangan, qo‘llab-quvvatlangan va jamiyatning to‘laqonli a’zosi sifatida his qilishi ham inklyuziyaning muhim tarkibiy qismidir. Seminar doirasidagi muhokamalarda inklyuziyaga inson huquqlari, teng imkoniyatlar, ijtimoiy adolat va barqaror rivojlanish tamoyillari asosida yondashish zamonaviy jamiyat taraqqiyotining muhim sharti ekani qayd etildi. Inklyuziv ta’limni rivojlantirish BMTning Barqaror rivojlanish maqsadlari bilan uyg‘un ravishda inson kapitalini rivojlantirish, ijtimoiy tenglikni mustahkamlash, ta’lim sifatini oshirish va jamiyatning barcha a’zolari uchun munosib imkoniyatlar yaratishga xizmat qiladi. Shu ma’noda, “Ishonch maktabi” kabi o‘quv-amaliy tashabbuslar ko‘rish bo‘yicha nogironligi bo‘lgan pedagoglarning kasbiy salohiyatini rivojlantirish, ularning kasbiy mustaqilligini mustahkamlash, zamonaviy texnologiyalardan foydalanish imkoniyatlarini kengaytirish hamda inklyuziv jamiyatni shakllantirishga xizmat qiluvchi muhim amaliy platforma sifatida ahamiyat kasb etadi. Seminar yakunida faol ishtirokchilar, jumladan, Jahon iqtisodiyoti va diplomatiya universiteti vakillari ham sertifikat bilan taqdirlandi. Mazkur tashabbus ta’limda teng imkoniyatlarni kengaytirish, inson salohiyatini ro‘yobga chiqarish, o‘zaro hurmat va ijtimoiy mas’uliyatga asoslangan inklyuziv madaniyatni rivojlantirish hamda barqaror jamiyat qurish yo‘lidagi amaliy qadam sifatida e’tirof etildi.

132

12.08.2026

JIDU rektori Pokiston Islom Respublikasining yangi tayinlangan Elchisi bilan uchrashdi

Oliy Majlis Senati Raisining birinchi oʻrinbosari, Jahon iqtisodiyoti va diplomatiya universiteti rektori Sodiq Safoyev Pokiston Islom Respublikasining yangi tayinlangan Oʻzbekistondagi Favqulodda va Muxtor Elchisi Muhammad Mudassir Tipu bilan uchrashdi. Suhbat chogʻida Oʻzbekiston va Pokiston oʻrtasidagi koʻp qirrali hamkorlik munosabatlarining bugungi holati va istiqbollari muhokama qilindi. Soʻnggi yillarda ikki tomonlama munosabatlar izchil rivojlanib, siyosiy, savdo-iqtisodiy, investitsiyaviy, madaniy-gumanitar va boshqa sohalarda amaliy hamkorlik kengayib borayotganligi taʼkidlandi. Parlamentlararo aloqalarni yanada mustahkamlash masalalariga ham alohida eʼtibor qaratildi. Qonun ijodkorligi sohasida tajriba almashish, parlamentlararo hamkorlik guruhlari faoliyatini yanada jonlantirish, hududlararo aloqalarni kengaytirish hamda xalqaro parlament tashkilotlari doirasida oʻzaro qoʻllab-quvvatlash masalalari yuzasidan fikr almashildi. Uchrashuv yakunida ikki mamlakat xalqlari manfaatlarida parlamentlararo hamkorlikni yangi mazmun bilan boyitish boʻyicha hamkorlikni davom ettirishga kelishib olindi.

267