Ta'limning yuqori sifati

Jahon iqtisodiyoti va diplomatiya universitetining bakalavriat dasturlari talabalarda global jarayonlarni chuqur anglash, murakkab masalalarni tahlil qilish hamda xalqaro darajada samarali faoliyat yuritish uchun zarur bo‘lgan fundamental bilim, amaliy ko‘nikma va zamonaviy dunyoqarashni shakllantiradi. Ta’lim jarayoni nazariy bilimlar, amaliy tayyorgarlik va fanlararo yondashuv uyg‘unligida tashkil etilgan. Bakalavriat bosqichida universitet quyidagi asosiy ta’lim yo‘nalishlarini taklif etadi: Xalqaro munosabatlar; Siyosatshunoslik; Jahon iqtisodiyoti va xalqaro iqtisodiy munosabatlar; Xalqaro-huquqiy faoliyat yo‘nalishidagi yurisprudensiya. Har bir dastur davlat boshqaruvi, diplomatiya, xalqaro hamkorlik, tahliliy faoliyat va zamonaviy mehnat bozori ehtiyojlarini hisobga olgan holda ishlab chiqilgan. Asosiy kompetensiyalar JIDU bakalavriat dasturlari bitiruvchilarda quyidagi kompetensiyalarni shakllantiradi: analitik va tanqidiy fikrlash; xalqaro siyosiy, iqtisodiy va huquqiy jarayonlarni tushunish; dalillarga asoslangan qaror qabul qilish; tadqiqot olib borish va ma’lumotlar bilan ishlash; professional yozma va og‘zaki muloqot; madaniyatlararo hamkorlik; hamda davlat, xususiy va xalqaro sektorlar uchun zarur bo‘lgan amaliy kasbiy tayyorgarlik. Ta’lim jarayonida talabalar akademik mobillik dasturlari, amaliyot, yetakchi mutaxassislar va ekspertlar bilan uchrashuvlar, ilmiy izlanishlar hamda loyiha faoliyati orqali o‘z bilim va ko‘nikmalarini amaliy muhitda rivojlantiradilar. Bu esa ularda mustaqil fikrlash, moslashuvchanlik, strategik yondashuv va professional mas’uliyatni yanada kuchaytiradi. Natijada bitiruvchilar milliy va xalqaro darajada raqobatbardosh, tashabbuskor, zamonaviy va yuqori malakali mutaxassislar sifatida shakllanadilar. Universitetda talabalarga ikkinchi xorijiy til sifatida 12 ta til ichidan tanlov qilish imkoniyati ham yaratilgan. Quyida bakalavriat dasturlari bilan tanishishingiz mumkin. Til yo‘nalishidagi fanlar Sillabus: Rus tili I,II (2025) Sillabus: O‘zbek tili I , II (2025) SHARQ TILLARI SILLABUSLARI (Barcha ta’lim yo‘nalishlari uchun) 2025 Ikkinchi chet tili sillabuslari, 2025/26 (Romano-german tillari) 2025/26 Ta’lim dasturlari bo‘yicha o‘quv jadvallari 2025/2026 o‘quv yili uchun akademik kalendar va amaliyot jadvali

Batafsil

JIDU'da o'qing

Jahon iqtisodiyoti va diplomatiya universiteti 1992-yil 23-sentabrda tashkil etilgan boʻlib, Oʻzbekiston Respublikasi Tashqi ishlar vazirligi qoshida faoliyat yuritadi.

Bu oliy taʼlim muassasasi boʻlib, mutaxassislar va ilmiy kengashni tayyorlash, qayta tayyorlash va ularning malakasini oshirish hamda quyidagi yoʻnalishlarda yuqori darajadagi fundamental va amaliy tadqiqotlar olib boradi:

Xalqaro iqtisodiyot va menejment;
Xalqaro munosabatlar va siyosatshunoslik;
Xalqaro ommaviy va xususiy huquq;
Yurisprudensiya.

Batafsil

Yangiliklar

Barcha yangiliklar

07.11.2026

JIDU huzuridagi Diplomatik akademiyada yangi ilmiy nashrlar taqdimoti bo‘lib o‘tdi

2026-yil 6-noyabr kuni Jahon iqtisodiyoti va diplomatiya universiteti huzuridagi Diplomatik akademiyada “Diplomatik izohli lug‘at” hamda “Diplomatiya qadimgi davrlardan hozirgi kungacha” nomli nashrlarning taqdimoti bo‘lib o‘tdi. Tadbirda davlat va jamoat arboblari, diplomatiya sohasi vakillari, olimlar, professor-o‘qituvchilar hamda tadqiqotchilar ishtirok etdi. Taqdimotni Diplomatik akademiya direktori, professor Abdusamat Xaydarov ochib, mazkur nashrlarning milliy diplomatiya maktabini rivojlantirish va sohada o‘zbek tilidagi ilmiy adabiyotlar bazasini boyitishdagi ahamiyatini ta’kidladi. Tadbir davomida “Diplomatik izohli lug‘at”ning yaratilish jarayoni va ilmiy-amaliy ahamiyati haqida ma’lumot berildi. Nashr diplomatik atama va tushunchalarni o‘zbek tilida tizimli izohlash hamda milliy diplomatik terminologiyani rivojlantirishga xizmat qiladi. Shuningdek, professor Ibrahim Mavlanov Abdusamat Xaydarov bilan hammualliflikda tayyorlangan “Diplomatiya qadimgi davrlardan hozirgi kungacha” o‘quv qo‘llanmasini tanishtirdi. Unda diplomatiyaning tarixiy taraqqiyoti, nazariy-huquqiy asoslari, zamonaviy yo‘nalishlari va iqtisodiy diplomatiya masalalari yoritilgan. Tadbirda Oliy Majlis Senati Raisining birinchi o‘rinbosari, JIDU rektori Sodiq Safoyev, shuningdek, yetakchi olimlar va soha mutaxassislari so‘zga chiqib, nashrlarning diplomatik kadrlar tayyorlash, ilmiy tadqiqotlar va amaliy faoliyatdagi ahamiyatiga alohida e’tibor qaratdilar. Taqdimot yakunida mazkur kitoblar milliy diplomatiya maktabining ilmiy salohiyatini mustahkamlash, o‘zbek tilidagi sohaga oid adabiyotlarni rivojlantirish va bo‘lajak diplomatlarning kasbiy bilimlarini oshirishda muhim manba bo‘lib xizmat qilishi ta’kidlandi.

07.11.2026

JIDU professori mintaqaviy hamkorlikka bag‘ishlangan tok-shouda ishtirok etdi

JIDU professori, siyosiy fanlar doktori Q.Jo‘rayev “O‘zbekiston-24” telekanalida Markaziy Osiyodagi hamkorlik jarayonlariga bag‘ishlangan tok-shouda ishtirok etdi. Tok-shouda ishtirok etgan ekspertlarning fikricha, so‘nggi yillarda Markaziy Osiyoda mintaqaviy hamkorlik sifat jihatidan yangi bosqichga ko‘tarildi. Ayniqsa, 2016-yildan boshlab O‘zbekiston Prezidenti Shavkat Mirziyoyev tomonidan ilgari surilgan ochiq va pragmatik tashqi siyosat, yaxshi qo‘shnichilik munosabatlarini mustahkamlash tashabbusi mintaqada o‘zaro ishonch va hamjihatlik muhitini shakllantirishda muhim omil bo‘ldi. 2018-yilda boshlangan Markaziy Osiyo davlatlari rahbarlarining Maslahat uchrashuvlari esa mintaqaviy muloqotning samarali mexanizmiga aylandi. Ushbu format orqali davlatlar o‘rtasidagi ayrim chegaraviy kelishmovchiliklar bartaraf etildi, transport aloqalari tiklandi, savdo-iqtisodiy, investitsiyaviy va gumanitar hamkorlik kengaydi. Eng muhimi, mintaqadagi muammolarni tashqi vositachilarsiz, o‘zaro muloqot va kelishuv asosida hal etishga qaratilgan yangi siyosiy tafakkur qaror topdi. Hozirda mintaqaviy hamkorlikning amaliy natijalari iqtisodiyot, energetika, transport va xavfsizlik sohalarida yaqqol namoyon bo‘lmoqda. Xususan, 2025-yil mart oyida O‘zbekiston, Qirg‘iziston va Tojikiston o‘rtasida davlat chegaralarining tutashgan nuqtasi to‘g‘risidagi shartnoma hamda Xo‘jand deklaratsiyasining imzolanishi tarixiy ahamiyatga ega bo‘ldi. Suv-energetika resurslaridan birgalikda foydalanish, Qambarota GES-1 loyihasi, sanoat kooperatsiyasi va chegaraoldi savdosini rivojlantirish bo‘yicha hamkorlik yangi imkoniyatlarni ochmoqda. Shuningdek, «Markaziy Osiyo — 2040» konsepsiyasi mintaqaning uzoq muddatli taraqqiyot ustuvorliklarini belgilab berdi. 2025-yildan boshlab Ozarbayjonning Maslahat uchrashuvlari formatiga to‘la huquqli ishtirokchi sifatida qo‘shilishi esa Markaziy Osiyo va Janubiy Kavkaz o‘rtasida yagona iqtisodiy va transport-logistika makonini shakllantirish uchun yangi istiqbollarni ochmoqda. Ayni paytda mintaqaviy hamkorlik oldida iqlim o‘zgarishi, suv resurslari taqchilligi, energetika va oziq-ovqat xavfsizligi, Afg‘onistonda barqarorlikni ta’minlash kabi muhim vazifalar turibdi. «Xitoy — Qirg‘iziston — O‘zbekiston» temir yo‘li, Transafg‘on transport yo‘lagi va Transkaspiy yo‘nalishlarini rivojlantirish mintaqaning xalqaro iqtisodiy aloqalarini kengaytirishga xizmat qiladi. Shu ma’noda, Markaziy Osiyo davlatlari hamkorligini yanada institutsional mustahkamlash, umumiy manfaatlar asosida tashqi siyosiy yondashuvlarni muvofiqlashtirish va o‘zaro iqtisodiy bog‘liqlikni kuchaytirish dolzarb ahamiyat kasb etmoqda. Bugun Markaziy Osiyo shunchaki geografik tushuncha emas, balki umumiy maqsadlar, mushtarak manfaatlar va kelajak uchun mas’uliyat birlashtirgan mintaqaviy hamkorlik makoni sifatida shakllanmoqda. Bu jarayonning muvaffaqiyati esa, eng avvalo, davlatlar o‘rtasidagi ishonch, teng huquqlilik va yaxshi qo‘shnichilik tamoyillariga qanchalik sodiq qolinishiga bog‘liq.

06.11.2026

JIDUda “Think Road Forum 2026” xalqaro forumi bo‘lib o‘tdi

2026-yil 4–5-noyabr kunlari Jahon iqtisodiyoti va diplomatiya universiteti huzuridagi Istiqbolli xalqaro tadqiqotlar instituti tomonidan “Global o‘zgarishlar va mintaqaviy dinamika: Markaziy Osiyo shakllanayotgan xalqaro tartibda” mavzusida “Think Road Forum 2026” xalqaro forumi o‘tkazildi. Tadbir global geosiyosiy va iqtisodiy o‘zgarishlar, shuningdek, zamonaviy xalqaro munosabatlar tizimida Markaziy Osiyoning rolini muhokama qilish maqsadida davlat idoralari, xalqaro tashkilotlar, yetakchi tahlil markazlari va akademik hamjamiyat vakillarini birlashtirdi. Forumning ochilish marosimida JIDUning Akademik ishlari bo‘yicha birinchi prorektori Akram Umarov, “Taldau AI Analytics” Vasiylik kengashi raisi Maulen Ashimbayev, Yevropa Ittifoqining O‘zbekistondagi delegatsiyasi rahbari o‘rinbosari Renata Vrobel, Oksford universiteti dotsenti Mariya Adel Karrai hamda CAPS Unlock tashkilotining grantlar bo‘yicha katta menejeri Askar Kushqunbayev qutlov nutqlari bilan ishtirok etdilar. Shuningdek, O‘zbekiston Respublikasi Prezidenti maslahatchisining o‘rinbosari, Markaziy Osiyo xalqaro instituti direktori Javlon Vahobov dasturiy ma’ruza bilan chiqish qildi. Forumning birinchi kuni xalqaro tartibotning transformatsiyasi, geosiyosiy raqobatning kuchayishi va Markaziy Osiyoning strategik ahamiyati ortib borayotganiga bag‘ishlandi. Panel muhokamalarida ekspertlar yetakchi jahon davlatlarining mintaqaga ta’siri, Xitoy bilan hamkorlik istiqbollari, mintaqaviy barqarorlikni ta’minlash va tashqi siyosiy aloqalarni diversifikatsiya qilish masalalarini muhokama qildilar. Britaniya akademiyasi, Oksford universiteti, “Mapping Global China” loyihasi hamda Yevropa Ittifoqining O‘zbekistondagi delegatsiyasi bilan hamkorlikda tashkil etilgan alohida sessiyalarda mintaqaviy integratsiya, transport yo‘laklarini rivojlantirish, savdo-iqtisodiy aloqalarni kengaytirish va xalqaro sheriklikni mustahkamlash masalalari ko‘rib chiqildi. Forumning ikkinchi kuni barqaror rivojlanish, mintaqaviy o‘zlik, iqtisodiy transformatsiya va texnologik innovatsiyalar masalalariga bag‘ishlandi. Dastur JIDUning ilm-fan va innovatsiyalar bo‘yicha prorektori, Sukuba universiteti professori Timur Dadabayevning Markaziy Osiyoda mintaqaviy o‘zlik va hamkorlik istiqbollariga bag‘ishlangan ma’ruzasi bilan boshlandi. Forum doirasidagi muhim voqealardan biri BMTning Barqaror rivojlanish yechimlari tarmog‘i (SDSN)ning O‘zbekistondagi faoliyati yo‘lga qo‘yilishi bo‘ldi. Mazkur tashabbus barqaror rivojlanish maqsadlariga erishishda ilmiy va institutsional hamkorlikni kengaytirishga qaratilgan. Keyingi muhokamalarda ekspertlar iqlim o‘zgarishi, suv resurslarini boshqarish, mintaqaviy savdoning transformatsiyasi, davlat boshqaruviga sun’iy intellekt texnologiyalarini joriy etish hamda Markaziy Osiyoning 2030-yilgacha bo‘lgan rivojlanish istiqbollarini ko‘rib chiqdilar. Forum yakunida ishtirokchilar mintaqaviy hamkorlikni mustahkamlash, xalqaro ekspertlar muloqotini kengaytirish va zamonaviy global muammolarga nisbatan umumiy yondashuvlarni ishlab chiqish zarurligini ta’kidladilar. “Think Road Forum 2026” xalqaro forumining o‘tkazilishi JIDU va Istiqbolli xalqaro tadqiqotlar institutining xalqaro akademik hamkorlikni rivojlantirishdagi o‘rnini, shuningdek, Toshkentning mintaqaviy va global taraqqiyotning dolzarb masalalari yuzasidan ekspertlar muloqoti uchun muhim maydon sifatidagi mavqeyini yana bir bor tasdiqladi.

111