2024-yil 3-dekabr kuni Jahon iqtisodiyoti va diplomatiya universitetida “Sun’iy intellekt va xalqaro huquq” mavzusida xalqaro ilmiy-amaliy konferensiya bo‘lib o‘tdi. Tadbir “O‘zbekiston – 2030” strategiyasi va 2030-yilgacha sun’iy intellekt texnologiyalarini rivojlantirish strategiyasining asosiy yo‘nalishlarini amalga oshirish doirasida tashkil etildi.

    Konferensiya raqamli texnologiyalar, adliya va ichki ishlar vazirliklari qatorida davlat va xalqaro tashkilotlar vakillarining ta’lim va malaka oshirish yo‘nalishida muhim qadamlardan biri bo‘ldi. Forum ishtirokchilari orasida Strategik tahlil va prognozlash oliy maktabi, Inson huquqlari milliy markazi, Raqamli texnologiyalar va sun’iy intellektni rivojlantirish ilmiy-tadqiqot instituti, Huquqni muhofaza qilish akademiyasi hamda Toshkent davlat yuridik universiteti vakillari bor edi.

    Konferensiyada Xitoy, Rossiya, Qirg‘iziston, Pokiston va boshqa davlatlardan kelgan ekspertlar, shuningdek, O‘zbekistondagi YuNESKO vakillari ishtirok etdi. Ishtirokchilarning bunday xilma-xilligi xalqaro miqyosda tajriba va bilim almashinuvini ta’minladi, bu esa sun’iy intellekt sohasida qonunchilikni rivojlantirishda nihoyatda muhimdir.

    Konferensiyaning asosiy maqsadi – sun’iy intellektni xalqaro-huquqiy tartibga solish masalalarini ilmiy muhokama qilishdan iborat bo‘ldi. Unda sun’iy intellekt texnologiyalarini rivojlantirish, joriy etish, etik jihatlar va huquqiy tartibga solish, shuningdek, inson huquqlariga ta’siri kabi dolzarb masalalar muhokama qilindi. Ayniqsa, Yevropa Ittifoqi, AQSh va Xitoy kabi mamlakatlarda sun’iy intellektni tartibga solishdagi yondashuvlardagi farqlarga alohida e’tibor qaratildi.

    Konferensiya yakunida ishtirokchilar O‘zbekiston Respublikasining qonunchiligini xalqaro tendensiyalar va tajribalarni inobatga olgan holda takomillashtirish bo‘yicha ilmiy asoslangan amaliy tavsiyalar ishlab chiqishdi. Ushbu tavsiyalar mamlakatning ushbu sohadagi huquqiy bazasini rivojlantirishda muhim ahamiyat kasb etadi.

      Konferensiya yakunlariga ko‘ra asosiy xulosalar va tavsiyalar o‘z aksini topadigan ilmiy tezislar to‘plami nashr etilishi rejalashtirilgan. Bu esa bilim va tajribani kengroq doiradagi mutaxassislar va siyosatchilar o‘rtasida tarqatish imkonini beradi hamda sun’iy intellekt sohasida qonunchilik va huquqiy tizimni yanada rivojlantirishga xizmat qiladi.