Nazarova Madina Ataxanovna — dotsent, pedagogika fanlari bo‘yicha falsafa doktori (PhD). U Jahon Iqtisodiyoti va Diplomatiya Universiteti Til-ta’lim markazi, Ingliz tili kafedrasi dotsenti lavozimida faoliyat yuritadi. Ingliz tili o‘qitish metodikasi bo‘yicha yetuk mutaxassis bo‘lib, ilmiy maqolalar, kitoblar va monografiyalar chop etishda muntazam ishtirok etadi.

Fidoyi va tajribali pedagog sifatida  M. A. Nazarova bir qator muhim lavozimlarni ham egallab keladi. Jumladan, u OTMlarda Davlat imtihon komissiyasi raisi, doktorantlar uchun imtihon komissiyasi a’zosi, universitet qabul komissiyasi a’zosi, Xalqaro TESOL assotsiatsiyasi a’zosi hamda O‘zbekiston Respublikasi Oliy ta’lim, fan va innovatsiyalar vazirligining ilmiy loyihalar bo‘yicha eksperti sifatida faoliyat yuritadi.

M. A. Nazarovaning pedagogik tajribasi keng ko‘lamli bo‘lib, u Chet tillarini o‘qitish metodikasi, Analitik o‘qish, Mamlakatshunoslik, Fonetika, Ingliz tilining amaliy kursi (gapirish, o‘qish, yozish va tinglash), Tarjima nazariyasi, Ritorika va Diskurs tahlili kabi fanlardan dars beradi. Shuningdek, u Pre-foundation va Foundation kurslarida ham o‘quv mashg‘ulotlarini olib boradi. Nazarova M. A. bakalavr, magistr va doktorantlar uchun ESL, EFL va ESP yo‘nalishlari bo‘yicha dars berish tajribasiga ega. Bundan tashqari, oliy o‘quv yurtlari o‘qituvchilari uchun mo‘ljallangan malaka oshirish kurslarida ham faol dars beradi.

Ilmiy faoliyatdan tashqari, M. A. Nazarova tadbirlar tashkilotchisi va jamoatchilik bilan aloqalar koordinatori sifatida ham faoliyat yuritib keladi. U xalqaro ilmiy-amaliy anjumanlar tashkil qiladi, ommaviy axborot vositalari uchun press-relizlar tayyorlaydi va universitetning ijtimoiy hayotida faol ishtirok etadi. Shuningdek, u “American Journal of Language, Literacy and Learning in STEM Education” nomli xalqaro ilmiy jurnalining faxriy muharriri hisoblanadi.