Nishanbay Sirajiddinov, iqtisod fanlari doktori, professor, Jahon iqtisodiyoti va diplomatiya universitetining Xalqaro iqtisodiyot kafedrasida 1998 yildan dotsent, professor lavozimlarida ishlab kelmoqda. Universitetda u Xalqaro iqtisodiyot I va Xalqaro iqtisodiyot II fanlaridan ma’ruza o‘qiydi.

N.Sirajiddinov xalqaro iqtisodiyot boʻyicha mutaxassis, tashqi savdo va tashqi savdo siyosati, valyuta siyosati, xorijiy investitsiyalar, mintaqaviy va xalqaro integratsiya masalalariga ixtisoslashgan. Uning xalqaro iqtisodiyotning turli masalalariga bag‘ishlangan 140 dan ortiq ilmiy ishlari chop etilgan. Jumladan u “Oʻzbekiston tashqi savdosi samaradorligini oshirish muammolari: nazariy va uslubiy jihatlari”, “Iqtisodiy islohotlarni erkinlashtirish va chuqurlashtirish sharoitida O‘zbekiston iqtisodiyotining raqobatbardoshligini oshirish” “Inson taraqqiyoti maqsadida savdo siyosatini takomillashtirish”, “Markaziy Osiyo: o‘z qarashimiz”, “O‘zbekiston: tarix – jamiyat – siyosat” kabi monografiyalar muallifi va hammuallifidir. Uning “Tashqi savdo operatsiyalarini liberallashtirish va milliy iqtisodiyotning raqobatbardoshligini oshirish”, “O‘zbekiston valuta siyosati: muammolar va istiqbollar”, “O‘zbekiston: eksportga yo‘naltirilgan rivojlanish yo‘li”, “O‘zbekiston valyuta bozorini liberallashtirish jarayonida tashqi savdo siyosatini isloh qilish”, “O‘zbekiston Respublikasini eksportga yo‘naltirilgan rivojlantirish strategiyasiga o‘tish to‘g‘risida”, "Import o'rnini bosishmi yoki eksportga yo'naltirilganlikmi?", “O‘zbekistonda eksportni moliyaviy qo‘llab-quvvatlash mexanizmi”, “MDH va O‘zbekiston o‘rtasidagi erkin savdo hududi: yoqlab va qarshi argumentlar”, “O‘zbekistonning Yevroosiyo iqtisodiy ittifoqiga qo‘shilishi: afzalliklar va xavflar” kabi maqolalari nafaqat O‘zbekistonda, balki xorijiy mamlakatlar ilmiy doiralari orasida ham keng tanilgan.

Professor N.Sirajiddinov xalqaro iqtisodning turli yo‘nalishlari bo‘yicha muntazam ravishda kurslar olib boradi va ilmiy anjumanlarda ma’ruza qiladi. 1996 yildan 2016 yilgacha BMTning Taraqqiyot dasturi loyihalarida katta koordinatori va Iqtisodiy tadqiqotlar markazi direktorining ilmiy ishlar bo‘yicha o‘rinbosari, 1998-2006 yillarda Jahon iqtisodiyoti va diplomatiya universitetining “Xalqaro iqtisodiy munosabatlar” kafedrasi mudiri lavozimlarida ishlagan, 2021 yildan O‘zbekiston Respublikasi Markaziy banki Boshqaruv kengashining mustaqil a’zosi.

Professor N.Sirajiddinov Jahon bankining Qoʻshma Vena maktabining Toshkent filiali ma’ruzachisi boʻlib ishlagan (1995-2003), AQSH Davlat departamenti Taʼlim va madaniyat masalalari byurosining Fulbrayt stipendiyasi stipendianti boʻlgan va Indiana universitetida malaka oshirgan va ilmiy tadqiqit olib borgan (1996-1997 yillar), O‘zbekiston Respublikasi Innovatsion rivojlanish vazirligi loyihasiga rahbarlik qilgan (2018-2021).