O'zbekiston Respublikasi Prezidentining Jahon iqtisodiyoti va diplomatiya universitetini tashkil etish to'g'tisidagi Farmoni
Sentabr 22, 1992 y.
¹ UP - 474
O'zbekiston Respublikasi Presidentining "Jahon iqtisodiyoti va diplomatiya universitetini tashkil etish to'g'risida" 1992 yil 23 sentabrdagi Farmoniga binoan barpo etilgan Jahon iqtisodiyoti va diplomatiya universiteti xalqaro munosabatlar, davlatlararo va tashqi iqtisodiy aloqalar, diplomatiya, xalqaro huquq va xalqaro jurnalistika sohasida yuqori malakali kardlar tayyorlash bo'yicha bosh muassasa bo'lib hisoblanadi.
Universitetning asosiy vazifalari quyidagilardan iborat:
- Xalqaro munosabatlar, diplomatiya, jahon iqtisodiy va savdo aloqalari, xalqaro huquq va xalqaro jurnalistika sohasida malakali mutaxassislar tayyorlash;
- Valyuta-kredit va moliyaviy munosabatlar, menejment, marketing va savdo reklamalari, investisiya faoliyati, xalqaro va savdo, bojxona va ma'muriy huquq, shuningdek, hozirgi zamon siyosiy va iqtisodiy rivojlanishining muhim yo'nalishlari sohasida davlat va tijorat tuzilmalari boshqaruv kadrlarini bosqichma-bosqich tayyorlash va qayta tayyorlash;
- Xalqaro iqtisodiy va siyosiy-huquqiy munosabatlarning o'tkir muammolari sohasida fundamental va amaliy ilmiy tadqiqotlarni tashkil etish va muvofiqlashtirish, ularning natijalarini respublikaning turli siyosiy tuzilmalari amaliy faoliyatlariga joriy etish;
- Universitetning ixtisosini belgilovchi bilimlar tarmoqlari bo'yicha yuqori sifatli darsliklar, o'quv qo'llanmalari, o'quv-uslubiy materiallar va ilmiy ishlar yaratish;
- Xalqaro iqtisodiy, moliyaviy, davlatlararo tashkilotlar va muassasalar, yetakchi xorijiy ilmiy va o'quv markazlari, elchixonalar va savdo vakolatxonalari bilan amaliy aloqalar asosida xalqaro munosabatlar, iqtisodiyot, menejment, tashqi iqtisodiy aloqalar, xalqaro huquq, diplomatiya va jurnalistika sohalarida mutaxassislar tayyorlashning jahon tajribalarini o'rganish, umumlashtirish va ulardan faol foydalanish;
- Xorijiy mamlakatlarning shunga o'xshash ixtisosdagi universitetlari bilan ilmiy, madaniy va boshqa amaliy aloqalarni rivojlantirish va mustahkamlash, ular bilan hamkorlik qilish va oz'aro yordamlashish to'g'risida uzoq muddatli shartnomalar tuzish;
- Yuqorida qayd qilingan mutaxassisliklar bo'yicha yuqori malakali kadrlar tayyorlashda boshqa mamlakatlarning o'quv yurtlari, davlat, jamoat va xususiy tuzilmalari, firmalari, banklari bilan o'zaro hamkorlik qilish.
ISLOM KARIMOV
O'zbekiston Respublikasi Prezidenti